ອົງການກາແດງສະວິດສ໌ສະໜັບສະໜູນ ອົງການກາແດງແຫ່ງຊາດລາວມູນຄ່າທັງໝົດ 714.540 ຝຣັງສະວິດສ໌ ຫລື ປະມານ 8,5 ຕື້ກີບ

ເມື່ອບໍ່ດົນມານີ້, ອົງການກາແດງແຫ່ງຊາດລາວ ໄດ້ເຊັນບົດບັນທຶກຄວາມເຂົ້າໃຈການຈັດຕັ້ງປະຕິບັດ “ໂຄງການສະໜັບສະໜູນການພັດທະນາວຽກງານປຸກລະດົມບໍລິຈາກເລືອດ ແລະ ສະໜອງເລືອດທີ່ປອດໄພ” ກັບອົງການກາແດງສະວິດສ໌ ປະຈຳ ສປປ ລາວ ໂດຍການຮ່ວມລົງນາມ ລະຫວ່າງ ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ແລະ ທ່ານ ຊັງມາກ ໂຕເມ ຜູ້ຕາງໜ້າອົງການກາແດງສະວິດສ໌ ປະຈຳ ສປປ ລາວ ໂດຍມີພາກສ່ວນກ່ຽວຂ້ອງ ເຂົ້າຮ່ວມ.

ໂຄງການດັ່ງກ່າວ, ເປັນການຮ່ວມມືສະໜັບສະໜູນດ້ານວິຊາການ ແລະ ງົບປະມານ ເພື່ອປະກອບສ່ວນເຂົ້າໃນການຈັດຕັ້ງປະຕິບັດ ແຜນຍຸດທະສາດຂອງອົງການກາ ແດງແຫ່ງຊາດລາວ ກໍຄື ແຜນຈັດຕັ້ງປະຕິບັດວຽກງານປຸກລະດົມຂົນຂວາຍບໍລິຈາກເລືອດ ແລະ ສະໜອງເລືອດທີ່ປອດໄພ ໂດຍການສະໜັບສະໜູນ ໃຫ້ມີການຮັບບໍລິຈາກເລືອດໃຫ້ຫລາຍຂຶ້ນ, ຂະບວນການທີ່ເຮັດໃຫ້ເລືອດມີຄວາມປອດໄພ ແລະ ມີຄຸນນະພາບ ແນໃສ່ໃຫ້ສາມາດຕອບສະໜອງເລືອດທີ່ພຽງພໍ ແລະ ປອດໄພໃຫ້ຄົນເຈັບທີ່ຕ້ອງການໃຫ້ນັບມື້ນັບດີຂຶ້ນ ເຊິ່ງຈະໄດ້ເລີ່ມຈັດຕັ້ງປະຕິບັດນັບແຕ່ມື້ລົງລາຍເຊັນບົດບັນທຶກຄວາມເຂົ້າໃຈ ເປັນຕົ້ນໄປ ແລະ ໂຄງການຈະສິ້ນສຸດໃນວັນທີ 31 ທັນວາ 2024 ໂດຍແມ່ນທຶນສະໜັບສະໜູນຂອງອົງການກາແດງສະວິດສ໌ລວມມູນຄ່າທັງໝົດ 714.540 ຝຣັງສະວິດສ໌ ຫລື ປະມານ 8,5 ຕື້ກີບ.

ທ່ານ ດຣ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ອົງການກາແດງແຫ່ງຊາດ ໄດ້ໃຫ້ຮູ້ວ່າ: ໂຄງການສະໜັບສະໜູນ ການພັດທະນາວຽກງານປຸກລະດົມບໍລິ ຈາກເລືອດ ແລະ ສະໜອງເລືອດປອດໄພ ແນໃສ່ເພີ່ມທະວີການເຂົ້າເຖິງການບໍລິຈາກເລືອດ ແລະ ປັບປຸງຄຸນນະພາບຂອງການບໍລິຈາກເລືອດ ເພື່ອໃຫ້ສັງຄົມປະກອບສ່ວນໃນວຽກງານການບໍລິຈາກເລືອດຫລາຍຂຶ້ນ ເພື່ອໃຫ້ບັນລຸຕາມຄາດໝາຍ 100% ໂດຍສະ ເພາະເລັ່ງໃສ່ກຸ່ມເປົ້າໝາຍທີ່ສາມາດບໍລິຈາກເລືອດໄດ້. ນອກຈາກນັ້ນ, ກໍຍັງເປັນການສ້າງຄວາມເຂັ້ມແຂງໃຫ້ແກ່ອົງການກາແດງແຫ່ງຊາດລາວ ໃນການຄຸ້ມຄອງບໍລິຫານວຽກງານເລືອດ ໃຫ້ມີຄວາມຍືນຍົງ.

ໂອກາດນີ້, ທ່ານ ພູທອນ ເມືອງປາກ ກໍໄດ້ສະແດງຄວາມຂອບໃຈ ມາຍັງອົງການກາແດງສະວິດສ໌ ຕໍ່ການຂົນຂວາຍ ແລະ ສະໜັບສະໜູນດ້ານງົບປະມານ ໃຫ້ແກ່ອົງການກາແດງແຫ່ງຊາດລາວ ຕະຫລອດມາ ເຊິ່ງເຫັນໄດ້ເຖິງຄວາມມີນ້ຳໃຈມະນຸດສະທຳ ແລະ ເຊື່ອໝັ້ນວ່າ ໂຄງການດັ່ງກ່າວ ຈະຊ່ວຍພັດທະນາວຽກງານການປຸກລະດົມ ບໍລິຈາກເລືອດ ແລະ ສະໜອງເລືອດທີ່ປອດໄພ ຂອງສະຖາບັນເລືອດແຫ່ງຊາດ ໃຫ້ສາມາດຕອບສະ ໜອງເລືອດແກ່ຄົນເຈັບ ໃຫ້ພຽງພໍ, ປອດໄພ ແລະ ທັນກັບເວລາ ເພື່ອເປັນພັດທະນາການຮ່ວມມື ລະຫວ່າງ ອົງການກາແດງແຫ່ງຊາດລາວ ແລະ ອົງການກາແດງສະວິດສ໌ ໃຫ້ມີຄວາມເຂັ້ມແຂງ ແລະ ເສີມຂະຫຍາຍການພົວພັນຮ່ວມມື ໃຫ້ແໜ້ນແຟ້ນຂຶ້ນກວ່າເກົ່າ.