ອຢ ອາເມລິກາ ໄຟຂຽວໃຫ້ ເຣມເດຊິເວຍ ປິ່ນປົວໂຄວິດ-19 ໃນເດັກອາຍຸ 28 ວັນຂຶ້ນໄປ
ວັນທີ 25 ເມສາ 2022, ສຳນັກຂ່າວຊິນຮົວລາຍງານວ່າ: ສຳນັກງານຄະນະກຳມະການອາຫານ ແລະ ຢາອາເມລິກາ ໄດ້ອະນຸມັດ “ເວກຄລູຣີ” (Veklury) ຢາຕ້ານໄວຣັສທີ່ຮູ້ຈັກກັນໃນຊື່ເຣມເດຊິເວຍ (Remdesivir) ສຳລັບປິ່ນປົວພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ໃນຜູ້ຕິດເຊື້ອເດັກທີ່ມີອາຍຸ 28 ວັນຂຶ້ນໄປ ແລະ ນ້ຳໜັກຢ່າງໜ້ອຍ 3 ກິໂລກຣາມ.
ສຳນັກງານອາຫານ ແລະ ຢາອາເມລິກາ ລະບຸວ່າ: ການອະນຸມັດດັ່ງກ່າວເຮັດໃຫ້ເວກຄລູຣີເປັນຢາປິ່ນປົວພະຍາດໂຄວິດ-19 ຊະນິດທຳອິດສຳລັບເດັກອາຍຸຕໍ່າກວ່າ 12 ປີ ໂດຍຢາດັ່ງກ່າວໄດ້ຮັບອະນຸມັດສຳລັບເດັກນ້ອຍທີ່ປິ່ນປົວໃນໂຮງໝໍ ຫລື ປ່ວຍດ້ວຍພະຍາດໂຄວິດ-19 ອາການເລັກໜ້ອຍເຖິງປານກາງ ແລະ ມີຄວາມສ່ຽງສູງຈະປ່ວຍໜັກ.
ກ່ອນໜ້ານີ້ມີການອະນຸມັດເວກຄລູຣີສຳລັບປິ່ນປົວພະຍາດໂຄວິດ-19 ໃນຜູ້ຕິດເຊື້ອໄວຜູ້ໃຫຍ່ບາງກຸ່ມ ແລະ ຜູ້ຕິດເຊື້ອເດັກອາຍຸ 12 ປີຂຶ້ນໄປທີ່ມີນ້ຳໜັກຢ່າງໜ້ອຍ 40 ກິໂລກຣາມເທົ່ານັ້ນ.
ແພດຣິເຊຍ ຄາວາໂຊນີ ຜູ້ອຳນວຍການສູນເພື່ອການປະເມີນ ແລະ ວິໄຈຢາ ສັງກັດສຳນັກງານອາຫານ ແລະ ຢາອາເມລິກາ ລະບຸວ່າ: ຕົວເລກການປິ່ນປົວພະຍາດໂຄວິດ-19 ໃນເດັກທີ່ປອດໄພ ແລະ ມີປະສິດທິພາບເປັນສິ່ງຈຳເປັນ ເພາະພະຍາດໂຄວິດ-19 ເຮັດໃຫ້ປະຊາກອນກຸ່ມດັ່ງກ່າວປ່ວຍໜັກໄດ້ ແລະ ປັດຈຸບັນຜູ້ຕິດເຊື້ອບາງສ່ວນຍັງບໍ່ສາມາດສັກວັກຊີນໄດ້.
