UN ລະບຸລັດຖະບານເວເນຊູເອລາໃຊ້ກຳລັງ ເກີນຄວນໃນການລະງັບເຫດປະທ້ວງ
ສຳນັກງານຂ້າຫລວງໃຫຍ່ເພື່ອສິດທິມະນຸດແຫ່ງອົງການສະຫະປະຊາຊາດ (UN) ເປີດເຜີຍວ່າ: ກອງກຳລັງຄວາມໝັ້ນຄົງຂອງເວເນຊູເອລາໃຊ້ກຳລັງຫລາຍເກີນຄວນໃນການຄວບຄຸມເຫດປະທ້ວງພາຍໃນປະເທດ ສົ່ງຜົນໃຫ້ມີຜູ້ຖືກກັກຂັງ ແລະ ເສຍຊີວິດຈຳນວນຫລາຍ.
ສຳນັກງານຂ້າຫລວງໃຫຍ່ເພື່ອສິດທິມະນຸດຂອງ ສປຊ ຂໍໃຫ້ລັດຖະບານເວເນຊູເອລາ ເຊິ່ງນຳໂດຍປະທານາທິບໍດີ ນິໂກລັດ ມາດູໂຣ ຈຳກັດອຳນາດຂອງເຈົ້າໜ້າທີ່ຄວາມໝັ້ນຄົງ ລວມທັງກວດສອບການໃຊ້ອຳນາດເກີນເຫດ, ປ່ອຍຕົວຜູ້ຖືກກັກຂັງ ແລະ ຮັບປະກັນຄວາມປອດໄພຂອງນາງ ລຸຍຊາ ອໍເຕກາ ທີ່ຫາກໍຖືກປົດອອກຈາກຕຳແໜ່ງໄອຍະການສູງສຸດ.
ທ່ານ ເຊອິດ ຣາອັດ ອັນ-ຮຸສເຊນ ຂ້າຫລວງໃຫຍ່ຂອງ UN ຖະແຫລງວ່າ: ການລະເມີດຫລັກສິດທິມະນຸດເກີດຂຶ້ນທ່າມກາງການລົ້ມສະຫລາຍຂອງຫລັກນິຕິທຳໃນເວເນຊູເອລາ ໂດຍຝ່າຍລັດຖະບານມຸ່ງເປົ້າໂຈມຕີສະພາແຫ່ງຊາດ ແລະ ອົງການໄອຍະການສູງສຸດໃນປະເທດຢ່າງຕໍ່ເນື່ອງ.
ສ່ວນໂຄສົກຂອງສຳນັກງານດ້ານສິດທິມະນຸດຂອງ UN ກ່າວວ່າ: UN ຮູ້ສຶກກັງວົນຕໍ່ສະຖານະການການລະເມີດສິດທິມະນຸດຫລາຍ ແລະ ກ່າວວ່າ: ເຈົ້າໜ້າທີ່ມີການຍິງແກັສນ້ຳຕາໃສ່ກຸ່ມຜູ້ປະທ້ວງ ໂດຍບໍ່ມີການແຈ້ງເຕືອນລ່ວງໜ້າ ແລະ ເປັນການຍິງທີ່ບໍ່ເປັນໄປຕາມມາດຕະຖານສາກົນ. ນອກຈາກນີ້ ຍັງໄດ້ຮັບລາຍງານເລື່ອງການທໍລະມານຜູ້ຊຸມນຸມທີ່ຖືກຄວບຄຸມຕົວ ແລະ ໃຫ້ສານທະຫານເປັນຜູ້ຕັດສິນລົງໂທດ ແທນສານພົນລະເຮືອນ.
