ກິ່ນຂອງດອກໄມ້ ປະໂຫຍດທີ່ທຳມະຊາດມອບໃຫ້

ດັ່ງທີ່ທຸກທ່ານຮູ້ກັນດີວ່າດອກໄມ້ບາງຊະນິດມີກິ່ນຫອມ, ແຕ່ບາງຄົນອາດຈະບໍ່ຮູ້ວ່າກິ່ນຂອງດອກໄມ້ບໍ່ໄດ້ມີແຕ່ຄວາມຫອມ ເພາະມັນມີປະໂຫຍດຫລາຍກ່ວານັ້ນ. ກ່ອນອື່ນຕ້ອງຮູ້ກ່ອນວ່າເປັນຫຍັງດອກໄມ້ຈຶ່ງມີກິ່ນຫອມໃຫ້ເຮົາໄດ້ເອົາມາສະກັດໃຊ້ປະໂຫຍດ ເຊິ່ງສາເຫດທີ່ເຮັດໃຫ້ດອກໄມ້ມີກິ່ນຫອມມາຈາກນຳ້ມັນຫອມລະເຫີຍ Essential Oil ຫລື Volatile Oil ທີ່ພືດສັງເຄາະຂຶ້ນ ແລ້ວລຳລຽງໄປເກັບໄວ້ໃນຕ່ອມ ຫລື ແຊນພິເສດ ເຊິ່ງມີຢູ່ໃນເກສອນເພດຜູ້, ເກສອນເພດແມ່, ຖານຮອງດອກ ແລະ ກີບດອກ. ເມື່ອດອກໄມ້ບານ ນຳ້ມັນຫອມລະເຫີຍທີ່ແຊກຢູ່ຕາມພາກສ່ວນຕ່າງໆຈະລະເຫີຍອອກມາເຮັດປະຕິກິລິຍາກັບອາກາດ ເກີດເປັນກິ່ນຫອມໃຫ້ເຮົາໄດ້ກິ່ນນັ້ນເອງ ແລະ ຍ້ອນແຕ່ລະດອກມີການຜະລິດໂມເລກຸນ ແລະ ສານໃນນຳ້ມັນຫອມລະເຫີຍບໍ່ຄືກັນ ເຮັດໃຫ້ກິ່ນຫອມຂອງແຕ່ລະດອກແຕກຕ່າງກັນ.

ນັກວິທະຍາສາດໄດ້ທົດລອງກ່ຽວກັບກິ່ນຂອງດອກໄມ້ ຈາກການສຶກສາພົບວ່າ ກິ່ນຂອງມັນມີສ່ວນຊ່ວຍໃຫ້ເຮົານອນຫລັບຝັນດີໄດ້ ໂດຍຜູ້ທີ່ທົດລອງແມ່ນນັກວິທະຍາສາດຈາກມະຫາວິທະຍາໄລ ມານໄຮ ປະເທດເຢຍລະມັນ ເພິ່ນໄດ້ໃຫ້ອາສາສະໝັກຍິງທົດລອງນອນຫລັບໃນລະຫ່ວາງນັ້ນກໍປ່ອຍກິ່ນຫອມອື່ນໆຂອງດອກໄມ້ຫລາຍຊະນິດ ເຊັ່ນ : ດອກກຸຫລາບ, ດອກມະລິ ແລະ ດອກອື່ນໆ ຫລັງຈາກຕື່ນນອນ ອາສາສະໝັກຍິງລ້ວນແຕ່ບອກວ່າພວກນາງນອນຫລັບຝັນດີ ແລະ ຮູ້ສຶກຜ່ອນຄາຍຫລາຍ, ແຕ່ເມື່ອທົດລອງໂດຍການໃຫ້ພວກນາງດົມກິ່ນໄຂ່ເນົ່າໃນລະຫ່ວາງຫລັບ ພົບວ່າ ຫລາຍຄົນຝັນຮ້າຍ ຈາກການສອບຖາມອາສາສະໝັກທີ່ທົດລອງ ພວກນາງຢັ້ງຢືນວ່າ ບໍ່ໄດ້ຝັນວ່າກຳລັງດົມຫຍັງຢູ່ ແຕ່ເນື້ອໃນຄວາມຝັນປ່ຽນໄປຈາກກິ່ນທີ່ລອຍມາ. ນັກວິທະຍາສາດຈຶ່ງສະຫລຸບຜົນການທົດລອງໄວ້ວ່າ : ກິ່ນອາດຈະມີບົດບາດສຳຄັນໃນການຄວບຄຸມຄວາມຝັນຂອງມະນຸດໄດ້ ດັ່ງນັ້ນ ໃຜທີ່ຢາກນອນຫລັບຝັນດີ ຂໍແນະນຳໃຫ້ສີດນຳ້ຫອມທີ່ຊ່ວຍໃນເລື່ອງຂອງການຜ່ອຍຄາຍບໍລິເວນໝອນ ເຊື່ອວ່າຄືນນັ້ນທ່ານຈະຫລັບສະບາຍ ຝັນດີຕະຫລອດຄືນ. ນອກຈາກກິ່ນຂອງດອກໄມ້ຈະສົ່ງຜົນກ່ຽວກັບການນອນແລ້ວ ຍັງສົ່ງຜົນຕໍ່ເລື່ອງຕໍ່ໄປນີ້ນຳອີກ :

• ສົ່ງຜົນຕໍ່ການໃຊ້ຈ່າຍ : ຟັງເບິ່ງບໍ່ໜ້າເຊື່ອແມ່ນບໍ່ ແຕ່ກໍເປັນຄວາມຈິງທີ່ວ່າກິ່ນຫອມຊ່ວຍໃຫ້ເຮົາໃຊ້ຈ່າຍສິນຄ້າຫລາຍຂຶ້ນ. ຈາກການທົດລອງຂອງນັກວິທະຍາສາດມະຫາວິທະຍາໄລຊິກາໂກ ພວກເຂົາພົບວ່າ 84% ຂອງນັກຊ໊ອບຍອມຈ່າຍເງິນຊື້ເກີບໃໝ່ ເມື່ອພວກເຂົາຢູ່ໃນບໍລິເວນທີ່ມີກິ່ນຫອມໜ້າເພິງພໍໃຈ ເມື່ອປຽບທຽບກັບບໍລິເວນທີ່ບໍ່ມີກິ່ນ.
• ສົ່ງຜົນຕໍ່ຄວາມເຄັ່ງຄຽດ ແລະ ອາການນອນບໍ່ຫລັບ : ຈາກການສຶກສາຂອງມະຫາວິທະຍາໄລແມຣີແລນ ພົບວ່າ ກິ່ນຂອງລາເວັນເດີຈະຊ່ວຍໃຫ້ຮູ້ສຶກຜ່ອນຄາຍ ຊ່ວຍຫລຸດຄວາມຄຽດ ແລະ ຊ່ວຍໃຫ້ນອນຫລັບໄດ້ງ່າຍຂຶ້ນ.​ ນອກຈາກນີ້, ການສຶກສາຂອງມະຫາວິທະຍາໄລກາລິຟໍເນຍ ຍັງພົບວ່າ ກິ່ນຂອງກາເຟຈະຊ່ວຍໃຫ້ຮູ້ສຶກສະຫງົບ ລວມໄປເຖິງມີອີກຫລາຍຂໍ້ມູນທີ່ບອກວ່າກິ່ນຂອງດອກກຸຫລາບຈະຊ່ວຍໃນເລື່ອງຂອງການຫລຸດອັດຕາການຫາຍໃຈ ແລະ ອັດຕາຄວາມດັນເລືອດ.
• ສົ່ງຜົນຕໍ່ລະດັບນຳ້ຕານໃນເລືອດ : ຢູ່ມະຫາວິທະຍາໄລຄາດິຟ ມີການທົດລອງໃນເລື່ອງຂອງກິ່ນວ່າຈະຊ່ວຍຫລຸດລະດັບນຳ້ຕານໃນເລືອດໄດ້ ໂດຍນັກທົດລອງໄດ້ສີດອິນຊູລິນໃຫ້ຊາຍຜູ້ໜຶ່ງທຸກມື້ ເປັນເວລາ 4 ມື້ ລະດັບນຳ້ຕານໃນເລືອດຂອງລາວຫລຸດລົງ ເຊິ່ງທຸກເທື່ອທີ່ສີດອິນຊູລິນເຂົ້າໄປ ລາວຈະຕ້ອງສືບດົມກິ່ນຂອງດອກໄມ້ນຳ ໃນມື້ທີ 5 ນັກທົດລອງໃຫ້ລາວດົມແຕ່ກິ່ນດອກໄມ້ເທົ່ານັ້ນ ແລະ ເມື່ອເອົາຜົນໄປກວດພົບວ່າ ລະດັບນຳ້ຕານໃນເລືອດຂອງລາວຫລຸດລົງຄືເກົ່າ.
• ສົ່ງຜົນຕໍ່ສະມາທິ : ກິ່ນເປັບເປີມິ້ນ, ກິ່ນໝາກສະຕໍເບີຣີ ແລະ ກິ່ນດອກລາເວັນເດີ ສາມາດຊ່ວຍທ່ານໄດ້ ຫາກທ່ານຕ້ອງການສະມາທິ. ຈາກການສຶກສາພົບວ່າ ເມື່ອໃຫ້ນັກກິລາດົມກິ່ນເປັບເປີມິ້ນ ຈະຊ່ວຍໃຫ້ພວກເຂົາແລ່ນໄດ້ໄວຂຶ້ນ ແລະ ມີສະມາທິຫລາຍຍິ່ງຂຶ້ນຫລາຍກ່ວາຄົນທີ່ບໍ່ໄດ້ດົມກິ່ນ. ນອກຈາກນີ້ຍັງມີການທົດລອງກ່ຽວກັບເລື່ອງຂອງກິ່ນໝາກສະຕໍເບີຣີວ່າຫາກເດັກນ້ອຍໄດ້ກິ່ນໝາກສະຕໍເບີຣີສົດຈະຊ່ວຍໃຫ້ພວກເຂົາສອບເສັງໄດ້ດີຫລາຍຍິ່ງຂຶ້ນ.
• ສົ່ງຜົນຕໍ່ຄວາມຈື່ຈຳ : ກິ່ນເປັນເຄື່ອງມືທີ່ດີໃນການກະຕຸ້ນຄວາມຊົງຈຳ ທ່ານເຄີຍໄດ້ຍິນຄົນເວົ້າກັນຢູ່ຕະຫລອດແມ່ນບໍ່ວ່າເວລາໄດ້ກິ່ນແລ້ວເຮັດໃຫ້ນຶກເຖິງສະຖານທີ່ ຫລື ໃຜບາງຄົນ ເຊິ່ງເປັນແບບນັ້ນຍ້ອນວ່າຂະບວນການຮັບກິ່ນໃນສະໝອງຂອງເຮົານັ້ນເຊື່ອມຕໍ່ກັບສະໝອງພາກສ່ວນຂອງອາລົມ ແລະ ຄວາມຊົງຈຳໂດຍກົງນັ້ນເອງ ຍ້ອນເຫດນີ້ຈຶ່ງເຮັດໃຫ້ມີບາງຄົນໃຊ້ກິ່ນຫອມໃນການປິ່ນປົວ ຟື້ນຄືນຄວາມຊົງຈຳທີ່ຫາຍໄປໄດ້.
• ສົ່ງຜົນຕໍ່ຄວາມຮັກ : ຈາກການສຶກສາຂອງມະຫາວິທະຍາໄລຊິກາໂກ້ ພົບວ່າ ແມ່ຍິງສາມາດຮັບຮູ້ກິ່ນຄວາມຕ່າງຂອງກຳມະພັນໄດ້. ນັກວິທະຍາສາດກ່າວວ່າ : ພວກເຂົາໄດ້ທົດລອງໂດຍການໃຫ້ອາສາສະໝັກຍິງດົມກິ່ນຂອງຄົນທີ່ມີພູມຕ້ານທານບໍ່ຄືກັນ ທີ່ເປັນແບບນັ້ນກໍຍ້ອນການຈັບຄູ່ກັບຄົນທີ່ມີເອກະລັກສະເພາະໂຕຈະຊ່ວຍໃນເລື່ອງຂອງການສືບທອດກຳມະພັນທີ່ແຂງແຮງຍິ່ງຂຶ້ນ.