ນາຍົກເເຕ່ງຕັ້ງ ຄະນະປະຕິຮູບ ລັດວິສາຫະກິດໄຟຟ້າລາວ ໂດຍເນັ້ນໜັກຮັບປະກັນ- ປົກປ້ອງຊັບສິນຂອງລັດບໍ່ໃຫ້ຕົກເຮ່ຍເສຍຫາຍ ແລະ ເເກ້ໄຂບັນຫາໜີ້ສິນຄຸມເຄືອ

ວັນທີ 22 ເມສາ 2022 ຢູ່ຫ້ອງປະຊຸມໃຫຍ່ລັດວິສາຫະກິດໄຟຟ້າລາວ, ນະຄອນຫລວງວຽງຈັນ ໄດ້ມີພິທີປະກາດການເເຕ່ງຕັ້ງ ຄະນະປະຕິຮູບ ລັດວິສາຫະກິດໄຟຟ້າລາວ (ຟຟລ) ຈໍານວນ 9 ທ່ານ ຕາມຂໍ້ຕົກລົງຂອງນາຍົກລັດຖະມົນຕີ ສະບັບເລກທີ 22/ນຍ, ລົງວັນທີ 4 ເມສາ 2022 ເປັນປະທານຮ່ວມຂອງ ທ່ານ ດາວວົງ ພອນເເກ້ວ ລັດຖະມົນຕີກະຊວງພະລັງງານ ເເລະ ບໍ່ເເຮ່ ເເລະ ທ່ານ ບຸນໂຈມ ອຸບົນປະເສີດ, ລັດຖະມົນ ຕີກະຊວງ ການເງິນ, ມີຄະນະພັກ-ຄະນະນໍາ, ພະນັກງານຫລັກເເຫລ່ງຂອງລັດວິສາຫະກິດໄຟຟ້າລາວ, ພ້ອມດ້ວຍພາກ ສ່ວນກ່ຽວຂ້ອງເຂົ້າຮ່ວມ.

ທ່ານ ກົງຄໍາ ສິທິວໍລະດາ, ຫົວຫນ້າກົມຈັດຕັ້ງພະນັກງານ ກະຊວງການເງິນ ໄດ້ຜ່ານຂໍ້ລົງຂອງນາຍົກ ລັດຖະມົນຕີ ສະບັບເລກທີ22/ນຍ, ລົງວັນທີ 4 ເມສາ 2022 ວ່າດ້ວຍການເເຕ່ງຕັ້ງຄະນະປະຕິຮູບລັດວິສາຫະກິດໄຟຟ້າລາວ ຈໍານວນ 9 ທ່ານ ຄື:

1. ທ່ານ ປອ. ພູທະນູເພັດ ໄຊສົມບັດ, ຮອງລັດຖະມົນຕີ ກະຊວງການເງິນ, ເປັນຫົວຫນ້າຄະນະ
2. ທ່ານ ທອງພັດ ອິນທະວົງ, ຮອງລັດຖະມົນຕີ ກະຊວງພະລັງງານ ເເລະ ບໍ່ເເຮ່, ເປັນຮອງຫົວໜ້າຄະນະ.
3. ທ່ານ ຈັນທະບູນ ສຸກອາລຸນ, ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ, ເປັນຄະນະ
4. ທ່ານ ສຸລິວັດ ສຸວັນນະຈູມຄໍາ, ຫົວໜ້າກົມຄຸ້ມຄອງຫນີ້ສິນສາທາລະນະ, ກະຊວງການເງິນ, ເປັນຄະນະ
5. ທ່ານ ປອ.ສອນເພັດ ອິນທະວົງ, ຫົວໜ້າກົມປູຕິຮູບລັດວິສາຫະກິດ ເເລະ ການປະກັນໄພ ກະຊວງການເງິນ,
ເປັນຄະນະ
6. ທ່ານ ສົມພິດ ເເກ້ວວິຈິດ, ຫົວໜ້າກົມທຸລະກິດພະລັງງານ, ກະຊວງພະລັງງານ ເເລະ ບໍ່ເເຮ່, ເປັນຄະນະ
5. ທ່ານ ຮສ. ປອ. ພູເພັດ ກ້ຽວພິລາວົງ, ຄະນະບໍດີ ຄະນະເສດຖະສາດ, ມະຫາວິທະຍາໄລແຫ່ງຊາດ, ເປັນຄະນະ
8. ທ່ານ ນາງ ເຄືອວັນ ຈັນທະພູວົງ, ຮອງຫົວໜ້າກົມພັດທະນາການບໍລິຫານລັດ, ກະຊວງພາຍໃນ, ເປັນຄະນະ
9. ທ່ານ ບຸນເອື້ອ ສີວັນເພັງ, ຫົວໜ້າຝ່າຍບໍລິຫານ, ປະທານສະຫະພັນກໍາມະບານລັດວິສາຫະກິດໄຟຟ້າລາວ,
ເປັນຄະນະ.

ໃນໂອກາດນີ້, ທ່ານ ດາວວົງ ພອນເເກ້ວ, ລັດຖະມົນຕີກະຊວງ ພະລັງງານ ເເລະ ບໍ່ເເຮ່ ມີຄໍາເຫັນວ່າ: ການເເຕ່ງຕັ້ງຄະນະປະຕິຮູບລັດວິສາຫະກິດໄຟຟ້າລາວຂອງລັດຖະບານໃນຄັ້ງນີ້ ເພື່ອໃຫ້ສອດຄ່ອງກັບສະພາບ, ຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກເຮົາໃນໄລຍະໃໝ່ ເເລະ ນອນຢູ່ໃນຂະບວນວິວັດຂອງການປັບປຸງລັດວິສາຫະກິດໃຫ້ເປັນໄປຕາມເງື່ອນໄຂປັດຈຸບັນ ເເນໃສ່ເພື່ອບັນລຸທິດທາງ ເເລະ ຄາດໝາຍກ່ຽວກັບການປັບປຸງລັດວິສາຫະກິດ ຕາມມະຕິກອງປະຊຸມໃຫຍ່ຄັ້ງທີ XI ຂອງພັກ ທີ່ກໍານົດໄວ້ຢ່າງຈະແຈ້ງ ແລະ ປະຕິບັດຢ່າງເຂັ້ມງວດຫລັກການຈັດຕັ້ງ ແລະ ການເຄື່ອນໄຫວ, ທັງຮັບປະກັນ ແລະ ປົກປ້ອງຊັບສິນຂອງລັດບໍ່ໃຫ້ຕົກເຮ່ຍເສຍຫາຍ, ປະຕິບັດການຄຸ້ມຄອງຕາມກົນໄກເສດຖະກິດຕະຫລາດ, ປັບປຸງໂຄງການທາງດ້ານການຈັດຕັ້ງກົນໄກຄຸ້ມຄອງວິສາຫະກິດທີ່ມີການໄລ່ລຽງທຸລະກິດທີ່ສອດຄ່ອງກັບກົດເກນຂອງຕະຫລາດ.

ທ່ານ ບຸນໂຈມ ອຸບົນປະເສີດ, ລັດຖະມົນຕີກະຊວງການເງິນ ມີຄໍາເຫັນວ່າ: ການຈັດຕັ້ງປະ ຕິບັດວຽກງານຂອງຄະນະປະຕິຮູບລັດວິສາຫະກິດໄຟຟ້າ ເພື່ອເປັນບ່ອນອີງເຮັດໃຫ້ວຽກງານນີ້ກາຍເປັນວຽກງານຮີບດ່ວນໃນການແກ້ໄຂວິການການທີ່ເກີດຂຶ້ນກັບລັດວິສາຫະກິດໄຟຟ້າລາວໃນໄລຍະຜ່ານມາ ໂດຍສະເພາະການເເກ້ໄຂບັນຫາໜີ້ສິນຄຸມເຄືອ, ລວມເຖິງວຽກງານປີ່ນອ້ອມຕ່າງໆ ໃຫ້ເປັນໄປຕາມທິດຊີ້ນໍາຂອງລັດຖະບານໃນເເຕ່ລະໄລຍະ ໃຫ້ດີຂຶ້ນກວ່າເກົ່າ.