ຄຳມ່ວນ-ນະຄອນພະນົມ ເພີ່ມທະວີການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ

ວັນທີ 22 ເມສາ 2022, ຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ ແຂວງຄຳມ່ວນ (ສປປ ລາວ) ແລະ ນະຄອນພະນົມ (ຣາຊະອານາຈັກໄທ) ໄດ້ຮ່ວມປຶກສາຫາລື, ແລກປ່ຽນບົດຮຽນ ແລະ ແກ້ໄຂວຽກງານຕ່າງໆ ເຊັ່ນ: ການຮັກສາຄວາມສະຫງົບ, ຄວາມເປັນລະບຽບ ຮຽບຮ້ອຍຕາມຊາຍແດນ, ການອໍານວຍຄວາມສະດວກໃຫ້ແກ່ການຂົນສົ່ງສິນຄ້າ, ການສະກັດກັ້ນ-ປາບປາມຢາເສບຕິດ, ການດູດແຮ່ຊາຍຕາມລຳແມ່ນ້ຳຂອງ, ການປ້ອງກັນຕາຝັ່ງເຈື່ອນ ແລະ ອື່ນໆທີ່ຈຳເປັນເພື່ອຕອບສະໜອງຕາມນະໂຍບາຍຂອງສອງລັດຖະບານ ລາວ-ໄທ ກໍຄືຄວາມມຸ່ງມາດປາຖະໜາຂອງປະ ຊາຊົນສອງຊາດ ລາວ-ໄທ, ເຮັດໃຫ້ຊາຍແດນ ລາວ-ໄທ ກໍຄື 2 ແຂວງເປັນຊາຍແດນແຫ່ງສັນຕິພາບ, ມິດຕະພາບ, ເປັນລະບຽບຮຽບຮ້ອຍຕະຫລອດໄປ.

ໃນກອງປະຊຸມດັ່ງກ່າວ, ໄດ້ທົບທວນຄືນຜົນການຈັດຕັ້ງປະຕິບັດເນື້ອໃນບົດບັນທຶກກອງປະຊຸມຜ່ານມາ ເຊິ່ງປະສົບຜົນສຳເລັດຫລາຍດ້ານ ເປັນຕົ້ນ ຄະນະຜູ້ແທນລະດັບຕ່າງໆ ໄດ້ໄປມາ-ຢ້ຽມຢາມ ແລະ ເຮັດວຽກຮ່ວມກັນເປັນປົກກະຕິ. ແນວໃດກໍດີຍັງມີບາງບັນຫາຄົງຄ້າງທີ່ຈະຕ້ອງຮ່ວມມື, ປະສານສົມທົບຕື່ມອີກ ເພື່ອແກ້ໄຂໃຫ້ດີຂຶ້ນ ໂດຍສອງແຂວງ ໄດ້ລະບຸໃນບົດບັນທຶກທີ່ທ່ານ ວັນໄຊ ພອງສະຫວັນ ເຈົ້າແຂວງໆຄຳມ່ວນ, ປະທານຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລາວ-ໄທ (ຄຳມ່ວນ), ທ່ານ ຊາທິບ ຣຸດຈະນະເສຣີ ເຈົ້າແຂວງໆນະຄອນພະນົມ, ປະທານຄະນະກຳມະການຮ່ວມມື ຮັກ ສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ (ນະຄອນພະນົມ) ລົງນາມຮ່ວມກັນ 10 ຂໍ້ ໄດ້ແກ່ 1. ການຮ່ວມມືການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, 2. ການຮ່ວມມືຮັກສາເສັ້ນຊາຍແດນ ລາວ-ໄທ ( ຄໍາມ່ວນ-ນະຄອນພະນົມ ), 3. ການຮ່ວມມືອຳນວຍຄວາມສະ ດວກ ແລະ ຮັກສາຄວາມປອດໄພການເຂົ້າ-ອອກເມືອງຕາມຈຸດຜ່ານດ່ານຊາຍແດນ, 4. ການຮ່ວມມືປ້ອງກັນ ແລະ ປາບປາມຢາເສບຕິດຕາມບໍລິເວນຊາຍແດນ, 5. ການຮ່ວມມືຮັກສາ, ປ້ອງກັນຕາຝັ່ງເຈື່ອນ ແລະ ການແກ້ໄຂບັນຫາການດູດແຮ່-ຊາຍຕາມແມ່ນໍ້າຂອງ, 6. ການຮ່ວມມືໃນກໍລະນີບຸກຄົນຂອງແຕ່ລະຝ່າຍຖືກກັກຕົວຄຸມຂັງ, 7. ການຮ່ວມມືດ້ານແຮງງານ, 8. ການຮ່ວມມືດ້ານເສດຖະກິດ, 9. ກົນໄກການປະສານງານສອງຝ່າຍ ແລະ 10. ການກຳນົດເວລາ ແລະ ສະຖານທີ່ຈັດກອງປະຊຸມຄັ້ງຕໍ່ໄປ.