ມອບໃບຍ້ອງຍໍການປະຕິບັດວຽກງານ ປະຈຳປີ 2020ໃຫ້ພະນັກງານ-ລັດຖະກອນ ກົມງົບປະມານແຫ່ງລັດ

ວັນທີ 20 ເມສາ 2022 ນີ້, ທີ່ຫ້ອງປະຊຸມໃຫຍ່ກົມສ່ວຍສາອາກອນ, ກົມງົບປະມານແຫ່ງລັດ ກະຊວງການເງິນ ໄດ້ຈັດພິທີມອບໃບຍ້ອງຍໍຜົນງານ ປະຈຳປີ 2020 ໃຫ້ພະນັກງານ-ລັດຖະກອນ ກົມງົບປະມານແຫ່ງລັດ ກະຊວງການເງິນ, ໂດຍການເປັນກຽດຕາງໜ້າມອບຂອງທ່ານ ພູວົງ ກິດຕະວົງ ຫົວໜ້າກົມງົບປະມານແຫ່ງລັດ ກະ ຊວງການເງິນ, ມີຄະນະກົມ, ຄະນະພະແນກ, ພະນັກງານວິຊາການເຂົ້າຮ່ວມ.

ໃນພິທີໄດ້ຜ່ານຂໍ້ຕົກລົງ ສະບັບເລກທີ 6022/ກງ, ລົງວັນທີ 03 ທັນວາ 2021 ວ່າດ້ວຍການຍ້ອງຍໍຜົນງານໃຫ້ພະນັກງານ-ລັດຖະກອນກົມງົບປະມານແຫ່ງລັດ ກະຊວງການເງິນ, ລັດຖະມົນຕີກະຊວງການເງິນຍ້ອງຍໍຜົນງານດີເດັ່ນປະເພດ I ຈໍານວນ 33 ທ່ານ, ຍິງ 12 ທ່ານ, ຍ້ອງຍໍຜົນງານດີຫຼາຍປະເພດ II ຈໍານວນ 13 ທ່ານ, ຍິງ 6 ທ່ານ, ທີ່ໄດ້ປະກອບສ່ວນສຸມສະຕິປັນຍາເຂົ້າໃນການຈັດຕັ້ງປະຕິບັດວຽກງານວິຊາສະເພາະໃນໄລຍະທີ່ຜ່ານມາເຊິ່ງເປັນການປະກອບສ່ວນສຳຄັນເຂົ້າໃສ່ໜ້າທີ່ການເມືອງທີ່ໄດ້ຮັບມອບໝາຍໄດ້ຮັບຜົນສໍາເລັດຢ່າງສູງ.

ໂອກາດດັ່ງກ່າວ, ຍັງໄດ້ມອບໃບຍ້ອງຍໍການຈັດຕັ້ງປະຕິບັດວຽກງານ 3 ດີຂອງປະທານຄະນະບໍລິຫານງານສູນກາງສະຫະພັນແມ່ຍິງລາວໃຫ້ຄະນະໜ່ວຍສະຫະພັນແມ່ຍິງ, ສະມາຊິກເອື້ອຍນ້ອງແມ່ຍິງ ກົມງົບປະມານແຫ່ງລັດ, ທີ່ມີຜົນງານດີເດັ່ນໃນການປະກອບສ່ວນເຂົ້າໃນການປະຕິບັດຂໍ້ແຂ່ງຂັນ 3 ດີ ສະໄໝທີ VIII (2016-2020) ແລະ ມອບໃບຍ້ອງຍໍຂອງຄະນະບໍລິຫານງານ ຊາວໜຸ່ມປະຊາຊົນ ປະຕິວັດລາວ ກະຊວງການເງິນ, ໃຫ້ຄະນະໜ່ວຍຊາວໜຸ່ມ ແລະ ສະມາຊິກຊາວໜຸ່ມ ກົມງົບປະມານແຫ່ງລັດ, ທີ່ມີຜົນງານດີເດັ່ນໃນການເຄື່ອນໄຫວວຽກງານຊາວ ໜຸ່ມ, ວຽກງານວິຊາສະເພາະ ແລະ ກິລາຊີງຂັນສະຫາຍເລຂາຄະນະພັກກະຊວງການເງິນ ຄັ້ງທີ I ປະຈຳປີ 2020 ນໍາອີກດ້ວຍ.

ໃນໂອກາດນີ້, ທ່ານ ພູວົງ ກິດຕະວົງ ຫົວໜ້າກົມງົບປະມານແຫ່ງລັດ ກະຊວງການເງິນ ໄດ້ໃຫ້ການໂອ້ລົມເພື່ອເປັນທິດທາງໃນການຈັດຕັ້ງປະຕິບັດວຽກງານໃນຕໍ່ໜ້າ, ຊຶ່ງທ່ານໄດ້ເນັ້ນໃຫ້ພະນັກງານ-ລັດຖະກອນສຸມສະຕິປັນຍາປະກອບສ່ວນເຂົ້າໃນການປະຕິບັດວຽກງານວິຊາສະເພາະ, ເອົາໃຈໃສ່ພັດທະນາບຸກບືນຕົນເອງໃນທຸກໆດ້ານໃຫ້ແຂງແຮງໃນການປະຕິບັດພາລະກິດ ແລະ ໜ້າທີ່ຮັບຜິດຊອບທີ່ຂັ້ນເທິງມອບໝາຍໃຫ້ສໍາເລັດ.