“ເດືອດທະລຸ 100 ອົງສາ” ອາເຊນໍລ ບຸກພັງເຊວຊີຄາບ້ານ 4-2 ໃກ້ຂື້ນທັອບໂຟພຣີເມຍລີກ

ເປັນເກມທີ່ເອີ້ນໄດ້ວ່າຫົວໃຈເຕັ້ນຕະຫຼອດ 90 ນາທີ ອາເຊນໍລ ບຸກມາຍິງ ເຊວຊີ 2 ຄັ້ງ ແຕ່ກໍ່ຖືກຕີສະເໝີ 2 ຄັ້ງ ກ່ອນເຄິ່ງເວລາທີ 2 ເຊວຊີຈະເສຍທ່າ ຖືກ ເອັນເຄເທຍ ແລະ ຊາກາ ມາຍິງປະຕູຮ່ວມກັນໃຫ້ ອາເຊນໍລ ບຸກມາຊະນະຢ່າງຕື່ນເຕັ້ນ 4-2

ເລີ່ມເກມຂຶ້ນມາກໍເດືອດເລີຍ ໃນນາທີ 13 ເອັນເຄເທຍ ຍິງໃຫ້ ອາເຊນໍລ ຂຶ້ນນຳກ່ອນ 1-0, ແຕ່ 5 ນາທີຕໍ່ມາ ຕີໂມ ແວນເນີ ມາຕີສະເໝີໃຫ້ ເຊວຊີ 1-1 ທັນຄວັນ ໃນນາທີ 17, ຈາກນັ້ນ ທັງ 2 ທີມ ກໍ່ສ້າງຄວາມວຸ້ນວາຍໃຫ້ກັບແຟນບານອີກຄັ້ງ ເມື່ອ ສະມິດ ໂຣວ ຍິງແຊງໃຫ້ “ປືນໃຫຍ່” ໄດ້ປະຕູຂຶ້ນນຳອີກຄັ້ງໃນນາທີ 27, ແຕ່ພຽງອຶດໃຈດຽວໃນນາທີ 32 ຂອງ ເຊຊ່າ ອັສປິລິໄກວຕ້າ ຍິງປະຕູຕີສະເໝີໃຫ້ “ສິງບູລ” 2-2 ກ່ອນຈົບເຄິ່ງເວລາທຳອິດດ້ວຍຜົນປະຕູນີ້ ຊະນິດທີ່ແຟນທີ່ຫົວໃຈເຕັ້ນສຸດໆ

ແຕ່ໃນເຄິ່ງເວລາທີສອງນາທີ 57, ເອັນເຄເທຍ ຍິງໄດ້ປະຕູທີ 2 ໃນເກມນີ້ ຫຼັງຈາກທີ່ແນວປ້ອງກັນຂອງ ເຊວຊີ ໄດ້ຜ່ານບານໄປມາຫຼາຍຄັ້ງຈົນຜິດພາດເຮັດໃຫ້ ອາເຊນໍລ ຂຶ້ນນໍາ 3-2, ຈາກນັ້ນໃນນາທີ 90 + 1 ອັສປິລິໄກວຕ້າ ໄດ້ໄປດືງ ຊາກ້າ ຢູ່ໃນກອບເຂດໂທດ ແລະ ຊາກ້າ ສັງຫານບໍ່ພາດນີ້ຈົບເກມ 90 ນາທີ ອາເຊນໍລ ຊະນະ ເຊວຊີ 4-2.

ສຳລັບນັດຕໍ່ໄປຂອງທັງສອງທີມ ເຊວຊີ ຈະພົບກັບ ເວັສແຮມ ໃນຄືນວັນອາທິດທີ 24 ເມສາ ເວລາ 20:00 ໂມງ ສ່ວນ ອາເຊນໍລ ຈະພົບກັບ ແມນເຊັສເຕີ ຢູໄນເຕັດ ໃນວັນເສົາທີ 23 ເມສາ ເວລາ 18:30 ໂມງ.