ພະນັກງານສ່ວຍສາອາກອນ ນວ ຝຶກອົບຮົມການນຳໃຊ້ລະບົບ TaxRIS ເພື່ອຮັບປະກັນເກັບລາຍຮັບໄດ້ບັນລຸຄາດໝາຍ
ວັນທີ 18 ເມສາ 2022 ນີ້, ກົມສ່ວຍສາອາກອນຮ່ວມກັບສ່ວຍສາອາກອນ ປະຈໍານະຄອນຫຼວງວຽງຈັນ (ນວ) ໄດ້ຈັດຊຸດຝຶກອົບຮົມວຽກງານຄຸ້ມຄອງ ແລະ ນຳໃຊ້ລະບົບ TaxRIS ໃຫ້ພະນັກງານສ່ວຍສາອາກອນ ປະຈໍານະຄອນຫຼວງວຽງຈັນປະຈຳປີ 2022 ຂຶ້ນໂດຍການເປັນປະທານຂອງ ທ່ານ ສູນທອນ ສຸລິສັກ ຫົວໜ້າພະແນກຝຶກອົບຮົມ ແລະ ພັດທະນາບຸກຄະລາກອນ ກົມສ່ວຍສາອາກອນ ກະຊວງການເງິນ, ມີທ່ານ ຄໍາພັນ ພັນທຸລັກ ຫົວໜ້າສ່ວຍສາອາກອນ ປະຈໍານະຄອນຫຼວງວຽງຈັນ, ມີຄະນະພະແນກ, ຄະນະຮັບຜິດຊອບ, ວິທະຍາກອນ ແລະ ນັກສໍາມະນາກອນເຂົ້າຮ່ວມ.
ໂອກາດດັ່ງກ່າວ,ທ່ານ ສູນທອນ ສຸລິສັກ ໄດ້ມີຄໍາເຫັນຕໍ່ຊຸດຝຶກອົບຮົມ ແລະ ໃຫ້ຮູ້ວ່າ: ການຈັດຊຸດຝຶກອົບຮົມການນຳໃຊ້ລະບົບ TaxRIS ນີ້ແມ່ນມີຄວາມໝາຍຄວາມສຳຄັນຫຼາຍສໍາລັບໜງສ່ວຍສາອາກອນໃນຂອບເຂດທົ່ວປະເທດ, ວຽກງານການຫັນເປັນທັນສະໄໝແມ່ນເປັນວຽກງານໜຶ່ງທີ່ຂະແໜງສ່ວຍສາອາກອນຈະຕ້ອງໄດ້ຈັດເປັນບຸລິມະສິດສຳຄັນຫົວຂໍ້ໜຶ່ງໃນການຜັນຂະຫຍາຍແຜນຍຸດທະສາດຂອງຂະແໜງການເງິນ ຕໍ່ກັບການຫັນວຽກງານການຄຸ້ມຄອງການເງິນໄປສູ່ລະບົບທັນສະໄໝ ເວົ້າລວມ, ເວົ້າສະເພາະແມ່ນການຄຸ້ມຄອງການເກັບລາຍຮັບສ່ວຍສາອາກອນໄປສູ່ລະບົບທັນສະໄໝ ແນໃສ່ປັບປຸງກົນໄກການເກັບລາຍຮັບໃຫ້ມີປະສິດທິພາບ, ໂປ່ງໃສທັນເວລາ ແລະ ສາມາດກວດສອບໄດ້.
ຊຸດຝຶກອົບຮົມວຽກງານຄຸ້ມຄອງ ແລະ ນຳໃຊ້ລະບົບ TaxRIS ໃຫ້ພະນັກງານຫຼັກແຫຼ່ງສ່ວຍສາອາກອນ ຢູ່ສ່ວຍສາອາກອນນະຄອນຫຼວງ ແລະ ບັນດາເມືອງ 09 ເມືອງໃນນະຄອນຫຼວງວງຈັນ. ໃນຄັ້ງນີ້, ແມ່ນໄດ້ແບ່ງອອກເປັນ 03 ຊຸດລວມມີພະນັກງານເຂົ້າຮ່ວມທັງໝົດ 60 ຄົນ ແລະ ຝຶກອົບຮົມໃນ 5 ຫົວຂໍ້ຄື: ການຄຸ້ມຄອງຜູ້ເສຍອາກອນ, ການຄຸ້ມຄອງການແຈ້ງ-ມອບອາກອນ, ການຄຸ້ມຄອງລາຍຮັບສ່ວຍສາອາກອນ, ການຄຸ້ມຄອງເກັບລາຍຮັບບໍ່ ແມ່ນພາສີ ແລະ ສ່ວຍສາອາກອນ, ການກວດກາຫຼັງການແຈ້ງຜ່ານລະບົບ TaxRIS ຊຶ່ງຈະໃຊ້ເວລາໃນການຝຶກອົບຮົມຊຸດລະ 10 ວັນທາງລັດຖະການ.
ທັງນີ້, ເພື່ອກໍເຮັດໃຫ້ພະນັກງານລັດຖະກອນຂະແໜງສ່ວຍສາອາກອນນະຄອນຫຼວງວຽງຈັນ ແລະ ບັນດາເມືອງໃນນະຄອນຫຼວງວຽງຈັນມີຄວາມຮູ້ຄວາມສາມາດ ແລະ ເຂົ້າໃຈການນໍາໃຊ້, ກົນໄກການເຮັດວຽກຂອງລະ ບົບ TaxRIS ໃນການຄຸ້ມຄອງການຈັດເກັບລາຍຮັບສ່ວຍສາອາກອນ ແລະ ເຮັດໃຫ້ວຽກງານຫັນເປັນທັນສະໄໝ ໃນການຄຸ້ມຄອງລາຍຮັບສ່ວຍສາອາກອນໃຫ້ໄດ້ຮັບຜົນສໍາເລັດຕາມຄາດໝາຍທີ່ວາງໄວ້.
