ກຸ່ມແຟນບານແມນຢູ ກຽມວາງແຜນປະທ້ວງເຈົ້າຂອງທີມກ່ອນເກມພົບກັບນໍຣິສ ຫລັງທົນມາດົນ 17 ປີ

ກຸ່ມແຟນບານ ແມນເຊສເຕີ ຢູໄນເຕັດ ທີ່ໃສ່ຊື່ວ່າ : ‘‘ The 1958 ’’ ປະກາດຜ່ານສັງຄົມມີເດຍເຖິງເຫລົ່າແຟນບານ ແມນເຊສເຕີ ຢູໄນເຕັດ ວ່າຈະມີການລວມຕົວປະທ້ວງ ‘‘  ຕະກູນເກລເຊີ ’’ ເຈົ້າຂອງສະໂມສອນຊາວອາເມລິກາ ກ່ອນເກມພຣີເມຍລີກ ອັງກິດ ນັດທີ 32 ເຊິ່ງຈະເປີດບ້ານຕ້ອນຮັບ ນໍຣີສ ຊິຕີ ທີມອັນດັບສຸດທ້າຍໃນວັນເສົາທີ 16 ເມສານີ້.

ການເຄື່ອນໄຫວດັ່ງກ່າວເກີດຂຶ້ນເພື່ອເປັນການກົດດັນ ແລະ ຂັບໄລ່ ‘‘ ຕະກູນເກລເຊີ ’’ ທີ່ເປັນເຈົ້າຂອງສະໂມສອນ ແມນເຊສເຕີ ຢູໄນເຕັດ ຄົບ 17 ປີໃນປີນີ້ ແຕ່ໄລຍະຫລັງເລີ່ມຫ່າງໄກຈາກໂອກາດປະສົບຄວາມສຳເລັດ ເຊິ່ງລະດູການນີ້ ແມນຢູ ຫມົດໂອກາດຄວ້າແຊ໊ມໃນທຸກລາຍການເປັນປີທີ 5 ຕິດຕໍ່ກັນແລ້ວ ໂດຍນັດຫລ້າສຸດກໍອອກໄປເສຍໃຫ້ ເອຟເວີຕັນ ທີມຫນີຕົກຊັ້ນ 0-1 ເຮັດໃຫ້ຕອນນີ້ຕົກມາຢູ່ອັນດັບ 7 ຂອງພຣີເມຍລີກ ມີ 51 ຄະແນນ ຕາມຫລັງສະເປີ ອັນດັບ 4 ຢູ່ 6 ຄະແນນ ໂອກາດຄວ້າໂກຕາໄປຫລິ້ນ ຢູແຊ໊ມ ແຊ໊ມປຽນລີກ ລະດູການຫນ້າເລີ່ມຢາກເຕັມທີ່.

ກຸມແຟນບານແມນຢູດັ່ງກ່າວ ຍັງເນັ້ນຂໍ້ຄວາມເຖິງ ‘‘ ຕະກູນເກລເຊີ ’’ ອີກວ່າ : ‘‘ ສະໂມສອນຈະບໍ່ມີຫຍັງປ່ຽນແປງ ຖ້າຫາກບໍ່ຖອດອະສໍລະພິດອອກ ມັນເນົ່າເປື່ອຍ ເລີ່ມຕົ້ນຈາກເທິງລົງລຸ່ມຄືທຸລະກິດອື່ນໆ ສະໂມສອນນີ້ມັນຫຍຸ້ງໄປຫມົດ ເຮົາຈຶ່ງຕ້ອງລົງມື ແລະ ປຸກຈິດສຳນຶກອີກເທື່ອຫນຶ່ງ ’’.

ສຳລັບແຜນການປະທ້ວງຈະເລີ່ມຕົ້ນດ້ວຍການລວມຕົວກັນບໍລິເວນດ້ານນອກສະຫນາມ ໂອນ ແທຣ໊ຟຟອດ ໃນເວລາທ້ອງຖິ່ນ 11:00 ນາທີ ກ່ອນນຳຂະບວນໃນພື້ນທີ່ອ້ອມຮອບ ແລະ ຈະບໍ່ເຂົ້າໄປຊົມເກມລະຫວ່າງ ແມນຢູ ກັບ ນໍຣິສ ທີ່ຈະເຕະເວລາ 15:00 ນາທີ  ໃນໄລຍະ 17 ນາທີທຳອິດ ຕາມຈຳນວນປີທີ່ ‘‘ ຕະກູນເກລເຊີ ’’ ເຂົ້າມາບໍລິຫານສະໂມສອນ.

ແນວໃດກໍຕາມ ກຸ່ມແຟນບານແມນຢູ The 1958 ຢືນຢັນຈະບໍ່ມີການປະທ້ວງທີ່ລຸກລາມຄືກັບປີທີ່ຜ່ານມາທີ່ບຸກເຂົ້າໄປເຖິງສະຫນາມດ້ານໃນ ຈົນຕ້ອງເລື່ອນເກມ ແດງເດືອດ ທີ່ເປີດບ້ານຕ້ອນຮັບ ລີເວີພູລ ອອກໄປແຂ່ງຂັນມື້ຕໍ່ໄປ ພ້ອມກັບງົດແຟນບານເຂົ້າສະຫນາມໃນນັດແຂ່ງໃຫມ່.