ເບລ ຖືກແຟນບານໂຫ່ໃສ່ ຫລັງລົງສະຫນາມໃນຮອບ 2 ປີ
ແກເຣັດ ເບລ ກອງຫນ້າຊາວເວລ ຂອງ ຣິນ ມາດຣິດ ຖືກແຟນບານທີມຕົວເອງໂຫ່ດັງສະນັ່ນຫວັ່ນໄຫວ ເມື່ອລົງຫລິ້ນໃນສະຫນາມຊານຕີອາໂກ ເບນາເບລ ເປັນຄັ້ງທຳອິດໃນຮອບກວ່າສອງປີ ໃນເກມທີ່ເອົາຊະນະ ເກຕາເຟ 2-0 ເມື່ອວັນເສົາທີ່ຜ່ານມາ.
ນັກເຕະອາຍຸ 32 ປີ ຫາກໍລົງຫລິ້ນໃຫ້ ມາດຣິດ ໃນລີກພຽງ 4 ນັດໃນລະດູການນີ້ ເຊິ່ງເປັນເກມນອກບ້ານທັງຫມົດ ແລະ ເກມສຸດທ້າຍຂອງເຂົາທີ່ສະຫນາມຕົນເອງຄືເດືອນ ກຸມພາ 2020 ທີ່ເສຍ ແມນເຊສເຕີ ຊິຕີ 2-1 ໃນແຊ໊ມປຽນລີກ.
ເບລ ມີບັນຫາສະພາບຮ່າງກາຍຢູ່ເລື້້ອຍໆ ແລະ ແຟນບານບໍ່ພໍໃຈທີ່ອະດີດດາວຍິງກິນຄ່າເມື່ອຍໄປຫລາຍ ແຕ່ເກືອບບໍ່ຖືກໃຊ້ງານ ແຕ່ພໍເຖິງໄລຍະທີມຊາດ ພັດລົງຫລິ້ນໄດ້ ເມື່ອບໍ່ດົນມານີ້ ‘‘ມາກາ’’ ສື່ໃນສະເປນຍັງວິຈານ ເບລ ວ່າ ຄື ‘‘ປະລະສິດ’’ ທີ່ດູດເງິນຈາກສະໂມສອນ.
ຄາໂລ ອັນເຊລັອດຕິ ຜູ້ຈັດການທີມທີ່ເວລານີ້ນຳດົ່ງຫນີຫ່າງ ເຊບີຢາ 12 ຄະແນນ ກ່າວວ່າ : ‘‘ ສຽງໂຫ່ເປັນເລື່ອງທີ່ເຂົ້າໃຈໄດ້ ແຕ່ແຟນບານຂອງເຮົາຕ້ອງເຂົ້າໃຈວ່າການສະໜັບສະໜູນຂອງພວກເຂົາກໍສຳຄັນຫລາຍເຊັ່ນກັນ ເບລ ຖືກໂຫ່ ແຕ່ເຂົາເປັນມືອາຊີບ ເຂົາເຮັດໄດ້ດີໃນການຝຶກຊ້ອມ ແລະ ຫາກຈຳເປັນ ລາວຈະຫລິ້ນໄລຍະສຸດທ້າຍຂອງລະດູການນີ້ ແຟນບານຕ້ອງເຂົ້າໃຈເລື່ອງນີ້ ’’.
