ທ່ານ ໜູຮັກ ພູມສະຫວັນ ຜູ້ເປັນແບບຢ່າງໃຫ້ຊາວໜຸ່ມລາວ ເປັນແບບຢ່າງໃຫ້ກັບຜູ້ນຳໃນຍຸກຕໍ່ໄປ

ໂອກາດວັນເກີດທ່ານ ໜູຮັກ ພູມສະຫວັນ ຄົບຮອບ 108 ປີ( 9 ເມສາ 1914-9 ເມສາ 2022), ຂໍນຳເອົາຄຳຄິດເຫັນອັນຊາບຊຶ້ງ ໜັກແໜ້ນ ທີ່ສ່ອງແສງໃຫ້ເຫັນເຖິງຄວາມບໍ່ໂລບມາກໂລພາ ຄວາມເປັນຫ່ວງເປັນໃຍຕໍ່ປະ ຊາຊົນ ເມື່ອພັກ-ລັດ ຈະປຸກເຮືອນໃໝ່ໃຫ້ເພິ່ນ “ ຖ້າປະຊາຊົນຍັງທຸກຢູ່ ເຖິງຈະປຸກເຮືອນຫລັງໃໝ່ໃຫຍ່ໆງາມໆໃຫ້ ເຮົາຈະບໍ່ຢູ່ເພາະຄິດອາຍປະຊາຊົນ”.

ທ່ານ ໜູຮັກ ພູມສະຫວັນ ປະທານປະເທດຄົນທີ 3 ຂອງ ສປປ ລາວ ເຄີຍກ່າວວ່າ:“ມີຫລາຍເທື່ອ, ພະ ນັກງານການຈັດຕັ້ງມາບອກເຮົາ ເພື່ອຈະມ້າງຫລັງເກົ່າ ແລ້ວປຸກຫລັງໃໝ່ໃຫ້ໃຫຍ່ງາມກວ່າເກົ່ານັບທັງຮົ້ວ ກໍາແພງກໍເອນງ່ຽງຈະລົ້ມຢູ່ແລ້ວເຊິ່ງເຮົາບອກກັບພະນັກງານທີ່ມີຄວາມຫວັງດີນັ້ນວ່າ: “ຂອບໃຈທີ່ມີຄວາມຫວັງດີຕໍ່ເຮົາ, ເຮົາວ່າຢູ່ຄືແນວນີ້ກໍດີແລ້ວ ຄິດເຖິງສະໄໝທຳການຕໍ່ສູ້ກູ້ຊາດພວກ ເຮົາຍັງພາກັນນອນຢູ່ໃນປ່າດົງ, ນອນຢູ່ໃນຖ້ຳ ຫລື ກ້ອງກົກໄມ້ໃຫຍ່ ທາກກັດ ຍຸງກິນ ຝົນຕົກຮໍາຫົວ ກໍຍັງຢູ່ໄດ້.

ເພິ່ນ ເວົ້າອີກວ່າ: ຢູ່ຄືແນວນີ້ແມ່ນດີຫລາຍແລ້ວ ກຳແພງວ່າມັນເອນອ່ຽງຈະລົ້ມກໍເອົາໄມ້ແຂງໆໄປຄໍ້າໄວ້ບໍ່ໃຫ້ມັນລົ້ມ ເອົາເງິນກ້ອນນັ້ນໄປຊ່ວຍເຫລືອປະຊາຊົນທີ່ພວກເຂົາຍັງທຸກຍາກຢູ່ຈະດີກວ່າເນີ…ເນີ!ຖ້າປຸກໃຫ້ເຮົາໃໝ່ໃຫຍ່ງາມ ເຮົາຈະບໍ່ຢູ່ ເພາະຄິດອາຍປະຊາຊົນເນີ!

ຄຳເວົ້າຂອງທ່ານ ໜູຮັກ ພູມສະຫວັນ ໄດ້ກາຍເປັນແບບຢ່າງໃຫ້ການນຳພັກ-ລັດແຕ່ລະຮຸ່ນແລະ ຍຸກຕໍ່ໆໄປ ດັ່ງເຫັນໄດ້ຈາກການສະເໜີຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີຕໍ່ກອງປະຊຸມສະ ໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IXເມື່ອເດືອນພະຈິກ 2021 ຜ່ານມາ ໂດຍສະເພາະວຽກຈຸດສຸມທີ 12 ເຊິ່ງປີ 2022 ລັດຖະບານພ້ອມຍົກປະສິດທິພາບການບໍລິຫານລັດດ້ວຍກົດໝາຍໂດຍການບັງຄັບໃຊ້ກົດໝາຍ-ນິຕິກໍາລຸ່ມກົດໝາຍໃຫ້ສູງຂຶ້ນ, ແກ້ໄຂການສໍ້ລາດບັງຫລວງ, ແກ້ໄຂປາກົດການສວຍໃຊ້ໜ້າທີ່ຂອງພະນັກງານໃນທາງທີ່ບໍ່ຖືກຕ້ອງ.
ທ່ານ ໜູຮັກ ພູມສະຫວັນ ເກີດເມື່ອວັນທີ 9 ເມສາ 1914 ທີ່ບ້ານພະລຸກາ ມຸກດາຫານ ປະເທດໄທ ເປັນບຸດຂອງທ້າວ ທອງພັກ ແລະ ນາງ ບັນທູນ ໄດ້ສ້າງຄອບຄົວກັບນາງ ຈັນທົມ ປີ 1933 ແລະ ມີລູກຮ່ວມກັນ 4 ຄົນ ແລະ ຕໍ່ມາໄດ້ສ້າງຄອບຄົວກັບນາງ ບຸນມາ ປີ 1944.

ທ່ານເປັນນັກປະຕິວັດທີ່ເຮັດເພຶ່ອຊາດຢ່າງສຸດກົດສຸດປາຍ ແລະ ຍຶດຫມັ້ນໃນອຸດົມການຈົນເສຍຊີວິດ, ທ່ານໄດ້ຮັບການຈັດເຂົ້າເປັນຜູ້ນຳປະຕິວັດຜູ້ທີສອງ ຮອງຈາກ ທ່ານ ໄກສອນ ພົມວິຫານ. ເຖິງວ່າທ່ານ ຈັດເຂົ້າເປັນຜູ້ທີສອງ, ແຕ່ທ່ານກໍເປັນບຸກຄົນທີ່ຄົນລາວທັງຊາດເຄົາລົບ ແລະ ນັບຖືຢ່າງສູງ, ແມ່ນແຕ່ ທ່ານ ໄກສອນ ພົມວິຫານເອງ ກໍຍອມຮັບ ແລະ ເຮັດຕາມຄວາມຄິດເຫັນຂອງເພິ່ນເຊັ່ນດຽວກັນ.

ການເຄື່ອນໄຫວປະຕິວັດຂອງທ່ານໜູຮັກ ພູມສະຫວັນ ແຕ່ລະໄລຍະ:
– ປີ 1945 ທ່ານເປັນໜຶ່ງໃນບັນດາຜູ້ກໍ່ຕັ້ງ ຂະບວນການປະຕິວັດຂອງປະເທດລາວເຮົາ.
– ປີ 1949 ໄດ້ຮັບການແຕ່ງຕັ້ງເປັນປະທານຄະນະກຳມະການລາວຕໍ່ຕ້ານ ປະຈຳພາກຕາເວັນອອກ ທັງຮັບຜິດຊອບກະກຽມກອງປະຊຸມໃຫຍ່ຜູ້ແທນທົ່ວປະເທດ ເພື່ອຈັດຕັ້ງລັດຖະບານລາວຕໍ່ຕ້ານ.
– ປີ 1950 ໄດ້ຮັບການແຕ່ງຕັ້ງເປັນລັດຖະມົນຕີວ່າການກະຊວງການເງິນຂອງລັດຖະບານລາວຕໍ່ຕ້ານ.
– ປີ 1954 ໄດ້ຮັບການແຕ່ງຕັ້ງເຂົ້າໃນຄະນະເຈລະຈາຂອງຝ່າຍແນວລາວຮັກຊາດຢູ່ວຽງຈັນ.
– ປີ 1955 ກອງປະຊຸມໃຫຍ່ຄັ້ງທີ I ເຊິ່ງເປັນກອງປະຊຸມໃຫຍ່ສ້າງຕັ້ງພັກປະຊາຊົນລາວ (ໃນປັດຈຸບັນພັກປະຊາຊົນປະຕິວັດລາວ) ໄດ້ຖືກເລືອກຕັ້ງເປັນກຳມະການສູນກາງພັກ.
– ປີ 1958 ເປັນສະມາຊິກສະພາຜູ້ແທນລາສະດອນໃນສະໄໝລວມລາວຄັ້ງທີ I ທັງເປັນເລຂາພັກ ພາກ ສ່ວນສູນກາງຢູ່ວຽງຈັນ.
– ປີ 1959 ຖືກລັດຖະບານລາຊະອານາຈັກຈັບກຸມຄຸມຂັງພ້ອມດ້ວຍສະເດັດເຈົ້າສຸພານຸວົງ ແລະ ຜູ້ນຳລວມ 16 ທ່ານຂອງຝ່າຍແນວລາວຮັກຊາດ ຢູ່ຄຸກໂພນເຄັງ.
– ປີ 1960-1962 ເປັນກຳມະການໃນຄະນະເຈລະຈາເພື່ອຈັດຕັ້ງລັດຖະບານປະສົມຄັ້ງທີ 2 ທັງເປັນເລ ຂາພັກພາກສ່ວນສູນກາງຢູ່ຄັງໄຂ (ແຂວງຊຽງຂວາງ) ເປັນຜູ້ຊີ້ນຳພາກສ່ວນເຂົ້າຮ່ວມໃນລັດຖະບານປະ ສົມ.
– ປີ 1966 ເປັນຜູ້ປະຈຳການຂອງຄະນະປະຈຳສູນກາງພັກ ຮັບຜິດຊອບວຽກງານຈັດຕັ້ງ ແລະວຽກງານເສດຖະກິດການເງິນ.
– ເດືອນ 2 ປີ 1972 ໄດ້ຮັບການແຕ່ງຕັ້ງເປັນຜູ້ຮັບຜິດຊອບຊີ້ນຳວຽກງານເສດຖະກິດ.
– ວັນທີ 2 ທັນວາ 1975 ກອງປະຊຸມໃຫຍ່ຜູ້ແທນປະຊາຊົນທົ່ວປະເທດ ໄດ້ເລືອກຕັ້ງເປັນຮອງນາຍົກລັດ ຖະມົນຕີ ທັງເປັນລັດຖະມົນຕີວ່າການກະຊວງການເງິນຂອງລັດຖະບານ ແຫ່ງ ສປປ ລາວ.
– ເດືອນ 4 ປີ 1982 ແລະ ເດືອນ 11 ປີ 1986 ໄດ້ຮັບການແຕ່ງຕັ້ງເປັນຮອງປະທານສະພາລັດຖະ ມົນຕີ ຜູ້ທີ 1 ທັງເປັນຜູ້ປະຈຳການສະພາລັດຖະມົນຕີ ຊີ້ນຳກຸ່ມເສດຖະກິດ.
– ປີ 1989 ໄດ້ຮັບເລືອກຕັ້ງເປັນຜູ້ແທນສະພາປະຊາຊົນສູງສຸດ ແລະ ໄດ້ຮັບການເລືອກຕັ້ງເປັນປະທານ ສະພາປະຊາຊົນສູງສຸດ ຊຸດທີ 2 ທັງເປັນປະທານຄະນະກຳມະການຮ່າງລັດຖະທຳມະນູນ.
– ວັນທີ 25/11/1992 ໄດ້ຮັບການເລືອກຕັ້ງໂດຍກອງປະຊຸມສະໄໝວິສາມັນຂອງສະພາປະຊາຊົນສູງສຸດ ຊຸດທີ 2 ເປັນປະທານປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຈົນເຖິງວັນທີ 24 ກຸມພາ 1998.

ທ່ານ ໜູຮັກ ພູມສະຫວັນ ໄດ້ຮັບການເລືອກຕັ້ງເປັນກຳມະການສູນກາງພັກໃນກອງປະຊຸມໃຫຍ່ຄັ້ງທີ I, ຄັ້ງທີ II, ຄັ້ງທີ III, ຄັ້ງທີ IV ແລະ ຄັ້ງທີ V ຂອງພັກໃນປີ 1955, ປີ 1972, ປີ 1982, ປີ 1986 ແລະ ປີ 1991, ໄດ້ຮັບເລືອກຕັ້ງເປັນກຳມະການກົມການເມືອງສູນກາງພັກ ນັບແຕ່ກອງປະຊຸມໃຫຍ່ຄັ້ງທີ 2 ເຖິງກອງປະຊຸມໃຫຍ່ຄັ້ງທີ 5. ໄດ້ຮັບການແຕ່ງຕັ້ງເປັນທີ່ປຶກສາຄະນະບໍລິຫານງານສູນກາງພັກໃນກອງປະຊຸມໃຫຍ່ຄັ້ງທີ VI ແລະ ຄັ້ງທີ VII ປີ 1996 ແລະ ປີ 2001. ທ່ານມໍລະນະກຳທ້າຍປີ 2008.