ອິນໂດເນເຊຍໄຟຂຽວ “ພົນລະເມືອງອາຊຽນ” ເຂົ້າປະເທດບໍ່ຕ້ອງຂໍວີຊາ

ວັນທີ 5 ເມສາ 2022, ສຳນັກຂ່າວຊິນຮົວລາຍງານວ່າ: ທ່ານ ອຳຣານ ອາຣິສ ຜູ້ອຳນວຍການກົມອຳນວຍການກວດຄົນເຂົ້າເມືອງ ສັງກັດກະຊວງກົດໝາຍ ແລະ ສິດທິມະນຸດອິນໂດເນເຊຍ ເປີດເຜີຍວ່າ: ລັດຖະບານອິນໂດເນເຊຍກັບມາອະນຸຍາດພົນລະເມືອງຂອງກຸ່ມປະເທດສະມາຊິກອາຊຽນອີກ 9 ປະເທດ ເດີນທາງເຂົ້າອິນໂດເນເຊຍໂດຍບໍ່ຕ້ອງຂໍວີຊາ.

ປະຊາຊົນຈາກກຸ່ມປະເທດສະມາຊິກອາຊຽນພຽງສະແດງຫລັກຖານການສັກວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ແລະ ຜົນການກວດພະຍາດແບບພີຊີອາຣ (PCR) ທີ່ເປັນລົບ ເຊິ່ງທົດສອບພາຍໃນ 48 ຊົ່ວໂມງກ່ອນເດີນທາງເຖິງອິນໂດເນເຊຍ.

ຂະນະດຽວກັນ, ນັກເດີນທາງຂາເຂົ້າຕ້ອງຕິດຕັ້ງແອັບພລິເຄຊັນທົດສອບ ແລະ ຕິດຕາມຜົນ (PeduliLindungi) ໃນໂທລະສັບມືຖື ແລະ ບໍ່ຈຳເປັນຕ້ອງເຂົ້າຮັບການກວດພະຍາດແບບພີຊີອາຣອີກເມື່ອເດີນທາງເຖິງ ຖ້າຜ່ານການກວດວັດແທກອຸນຫະພູມຮ່າງກາຍ.

ທັງນີ້, ອິນໂດເນເຊຍກັບມາເປີດໃຫ້ບໍລິການຢູ່ສະໜາມບິນນາໆຊາດໃນເມືອງຢອກຢາກາຕາ, ມາກັສຊາ, ເມດານ ແລະ ເປກັນບາຣູແລ້ວ.