ຫົວໜ້າດ່ານພາສີສາກົນທົ່ວປະເທດ ຕ້ອງເຂັ້ມງວດລະບຽບການ, ມີທັກສະ ແລະ ຫັນປ່ຽນສະພາບການຫັນໄປສູ່ວິທີການໃໝ່

ວັນທີ 6 ເມສາ 2022 ນີ້, ໄດ້ເປີດຊຸດຝຶກອົບຮົມຫຼັກສູດມາດຕະຖານສະເພາະຂອງຫົວໜ້າດ່ານພາສີຊາຍແດນ(ດ່ານສາກົນ) ທົ່ວປະເທດ, ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະ ຊວງການເງິນ,ມີທ່ານ ພູເຂົາຄຳ ວັນນະວົງໄຊ ຫົວໜ້າກົມພາສີ ກະຊວງການເງິນ, ຄະນະຮັບຜິດຊອບຝຶກອົບຮົມ, ວິທະຍາກອນຈາກບັນດາກົມອ້ອມຂ້າງກະຊວງການເງິນ, ກະຊວງພາຍໃນ, ອົງການກວດສອບບັນຊີ ກະຊວງແຜນການ ແລະ ການລົງທຶນ, ກະຊວງອຸດສາຫະກຳ ແລະ ການຄ້າ, ສານປະຊາຊົນນະຄອນຫຼວງວຽງຈັນ,ທຄຕລ, ນັກສຳມະນາກອນ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ຊຸດຝຶກອົບຮົມດັ່ງກ່າວຈະໃຊ້ເວລາ 60 ວັນທາງລັດຖະການ, ຈຸດປະສົງເພື່ອສ້າງໃຫ້ພະນັກງານ-ລັດຖະ ກອນຂັ້ນຫົວໜ້າດ່ານ ແລະ ຮອງຫົວໜ້າດ່ານ ປະຈຳຢູ່ດ່ານພາສີສາກົນໃຫ້ມີຄວາມຮູ້, ລົງເລີກດ້ານວິຊາສະເພາະໃນການຄຸ້ມຄອງ, ນໍາພາ, ເສີມສ້າງຄວາມຮູ້, ທັກສະ, ຈັນຍາບັນຈັນຍາທຳຂອງພະນັກງານ, ປະກອບສ່ວນສ້າງລະດັບການເຮັດວຽກທີ່ເໝາະສົມກັບຕຳແໜ່ງງານ. ພ້ອມກັນນັ້ນ, ຍັງເປັນການຍົກລະດັບວຽກງານວິຊາສະເພາະກົດໝາຍວ່າດ້ວຍພາສີ, ມູນຄ່າແຈ້ງພາສີ, ການຈັດລະ ຫັດສິນຄ້າ, ເຄື່ອງຂອງ, ແຫຼ່ງກຳເນີດສິນຄ້າ, ການແຈ້ງພາສີການບໍລິຫານຄວາມສ່ຽງ, ລະບົບເຄື່ອງມືທັນສະໄໝ, ການນຳໃຊ້ລະບົບອາຊີກູດາ, ການກວດສອບຄຶນການແຈ້ງພາສີ, ການຮ່ວມມືພາສີສາກົນ, ວຽກງານສຶບສວນ-ສອບສວນ ແລະ ປາບປາມການລັກລອບໜີພາສີ ແລະ ອື່ນໆ.

ຄຽງຄູ່ກັນນີ້, ຍັງໄດ້ຍົກລະດັບຄວາມຮູ້ພື້ນຖານກ່ຽວກັບກົດໝາຍລະບຽບການທີ່ກ່ຽວຂ້ອງເປັນຕົ້ນ: ກົດໝາຍອາກອນມູນຄ່າເພີ່ມ, ອາກອນຊົມໃຊ້, ກົດໝາຍວ່າດ້ວຍການບັນຊີ, ກົດໝາຍວ່າດ້ວຍການກວດສອບ, ກົດໝາຍວ່າດ້ວຍສົ່ງເສີມການລົງທຶນ, ກົດໝາຍວ່າດ້ວຍວິສາຫະກິດ, ກົດໝາຍວ່າດ້ວຍການດຳເນີນຄະດີທາງອາຍາ, ກົດໝາຍວ່າດ້ວຍດຳເນີນຄະດີແພ່ງ, ຄວາມຮູ້ກ່ຽວກັບວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍພ້ອມດ້ວຍວິທີການບັນທຶກການນຳເຂົ້າ-ສົ່ງອອກເງິນ ແລະ ວັດຖຸທີ່ປ່ຽນເປັນເງິນ ຜ່ານລະບົບ (Cross Border Record-CBR), ຄວາມຮູ້ກ່ຽວກັບ CITES ແລະ ອື່ນໆ.

ໂອກາດດັ່ງກ່າວ,ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ໄດ້ໃຫ້ກຽດໂອລົມ ແລະ ໃຫ້ທິດຊີ້ນຳໃນການຝຶກອົບຮົມຄັ້ງນີ້, ໂດຍສະເພາະແມ່ນພະນັກງານກົມພາສີການຝຶກອົບຮົມມາດຕະຖານຕຳແໜ່ງງານ, ສືບຕໍ່ປະຕິບັດຕາມລະບຽບການຝຶກຫົວໜ້າດ່ານພາສີທົ່ວປະເທດ, ການຫັນປ່ຽນສະພາບການຫັນໄປສູ່ວິທີການໃໝ່, ຕ້ອງຍົກລະດັບຄວາມຮູ້ບັນດາຜູ້ຮັບຜິດຊອບ, ສອບເສັງຕາມມາດຕະຖານຕໍາແໜ່ງງານ, ມີຄວາມຮູ້ໃນການນຳໃຊ້ລະບົບ, ຕ້ອງລົງເລີກວຽກງານວິຊາສະເພາະໃຫ້ເຈົ້າໜ້າທີ່ພາສີມີຄຸນນະພາບຮັບປະກັນເຂົ້າຮ່ວມຝຶກອົບ ຮົມຍົກລະດັບ, ເອົາຜູ້ທີ່ໄດ້ຮັບມອບໝາຍມາສືບຕໍ່, ຫັນເປັນມາດຕະຖານ, ຫັນການແຈ້ງພາສີແບບເປັນລາຍລະອຽດ (ເອເລັກໂຕຣນິກ), ເອົາໃຈໃສ່ເລັ່ງແກ້ໄຂ້ຕາມວາລະແຫ່ງຊາດ, ຂອດການນຳເຂົ້າ, ຄຸ້ມຄອງການເກັບລາຍຮັບອາກອນ, ເລັ່ງໃສ່ສ້າງຄວາມສາມາດໃນການຄຸ້ມຄອງວຽກງານລະບົບເອເລັກໂຕຣນິກ, ເພີ່ມທັກສະໃຫ້ຫົວໜ້າດ່ານສາມາດຊີ້ນຳ-ຄຸ້ມຄອງການນຳເຂົ້າຕາມມາດຕະຖານສາກົນ, ຮັບປະກັນຄຸນນະພາບການຄຸ້ມຄອງສ້າງທ່າຫັນ ປ່ຽນໃໝ່ຄຸ່ມຄອງພາສີ, ຕ້ອງລົງເລີກກຳໄດ້ບັນຫາ, ນຳໄປບັນຊາຊີ້ນຳ, ໃຫ້ມີລະບົບບັນຊາໃຫ້ແທດເຖິງ, ຕ້ອງມີທັກສະຂອງການບັນຊາວຽກງານ, ສະພາບການຍັງມີການຜັນແປຢ່າງສັບສົນ, ຕ້ອງໄດ້ມີການພັດທະນາຕົນເອງໃຫ້ທັນສະພາບການ, ບໍລິຫານອົງກອນໃຫ້ມີປະສິດທິພາບຮັບປະກັນວຽກງານ, ບໍລິຫານດ້ວຍລະບົບເຄື່ອງມືທັນສະໄໝຫັນໄປສູ່ອັນໃໝ່, ແກ້ໄຂ້ການບໍລິຫານຄຸ້ມຄອງໄປສູ່ຄຸນນະພາບໃໝ່, ເພີ່ມຂີດຄວາມສາມາດໃຫ້ມີຄຸນນະພາບໃໝ່.