ລາຍງານສະບັບໃໝ່ຊີ້ ເດັກນ້ອຍເກືອບທຸກປະເທດ ຜະເຊີນການຮຽນຮູ້ຫລຸດຖອຍເນື່ອງຈາກໂຄວິດ
ວັນທີ 5 ເມສາ 2022, ລາຍງານສະບັບໃໝ່ໂດຍອົງການ UNESCO, ອົງການ UNICEF ແລະ ທະນາຄານໂລກ ພົບວ່າ: ເດັກນັກຮຽນໃນເກືອບທຸກປະເທດທົ່ວໂລກກຳລັງຜະເຊີນສະພາບຫລຸດຖອຍທາງຄວາມຮູ້ ເຊິ່ງເປັນຜົນມາຈາກການປິດໂຮງຮຽນຢ່າງຕໍ່ເນື່ອງໃນໄລຍະການແພ່ລະບາດຂອງໂຄວິດ ໂດຍສະເພາະເດັກຈາກຄອບຄົວທຸກຍາກ, ເດັກທີ່ຢູ່ໃນພື້ນທີ່ຫ່າງໄກ, ເດັກພິການ ແລະ ເດັກນ້ອຍ ເຊິ່ງຕ້ອງຜະເຊີນບັນຫານີ້ຮຸນແຮງທີ່ສຸດ.
ລາຍງານສະບັບດັ່ງກ່າວເຊິ່ງເຜີຍແຜ່ໃນອາທິດຜ່ານມາ ໂດຍມີທ່ານ ນາງ ສເຕຟາເນຍ ຈານິນີ ຜູ້ຊ່ວຍຜູ້ອຳນວຍການໃຫຍ່ດ້ານການສຶກສາ ອົງການ UNESCO ພ້ອມທ່ານ ໂຣເບິດ ເຈນກິສ ຜູ້ອຳນວຍການຝ່າຍການສຶກສາ ອົງການ UNICEF ແລະ ທ່ານ ເຈມີ ຊາເວດຣາ ຜູ້ອຳນວຍການຝ່າຍການສຶກສາທະນາຄານໂລກ ອອກຖະແຫລງການຮ່ວມກັນ ເພື່ອຮຽກຮ້ອງໃຫ້ບັນດາປະເທດອອກມາດຕະການຮີບດ່ວນ ເພື່ອຊ່ວຍໃຫ້ເດັກທຸກຄົນໄດ້ກັບມາຮຽນໜັງສື ແລະ ຊົດເຊີຍຄວາມຮູ້ທີ່ຫລຸດຖອຍ ເຊິ່ງອາດສົ່ງຜົນກະທົບໃນໄລຍະຍາວຕໍ່ສຸຂະພາບ, ການເປັນຢູ່ ຕະຫລອດຈົນການຮຽນຮູ້ ແລະ ໜ້າທີ່ການງານໃນອະນາຄົດຂອງເດັກ.
ຄຳຖະແຫລງການຮ່ວມລະບຸວ່າ: “ນັບແຕ່ມີການປິດໂຮງຮຽນໃນເດືອນມີນາ 2020 ເດັກນັກຮຽນທົ່ວໂລກສູນເສຍຊົ່ວໂມງຮຽນໄປຫລາຍກວ່າ 2 ພັນຕື້ຊົ່ວໂມງ ແລະ ເດັກຫລາຍກວ່າ 4 ໃນ 5 ປະເທດມີການຮຽນຮູ້ທີ່ຫລຸດຖອຍ, ທັກສະຂັ້ນພື້ນຖານໃນທຸກມິຕິທີ່ເດັກໄດ້ສະສົມໄວ້ກຳລັງຫາຍໄປ, ເດັກລືມວິທີການອ່ານ ແລະ ຂຽນ, ບາງຄົນຈື່ບໍ່ໄດ້ຮອດຕົວອັກສອນ, ເດັກນ້ອຍໃນເກືອບທຸກປະເທດ ເຊິ່ງກຳລັງຈະເລີ່ມເຂົ້າຮຽນ ຕ່າງບໍ່ມີໂອກາດໄດ້ຮຽນຮູ້ທັກສະເຫລົ່ານີ້ ເນື່ອງຈາກການສຶກສາຂັ້ນປະຖົມທີ່ຂາດຫາຍໄປ”.
ຄຳຖະແຫລງຮ່ວມລະບຸຕໍ່ໄປວ່າ: “ນັບແຕ່ຫົກເດືອນທຳອິດຫລັງການແພ່ລະບາດ ເປັນທີ່ຮູ້ກັນແລ້ວວ່າ: ເດັກຢ່າງໜ້ອຍ 1 ໃນ 3 ຄົນທົ່ວໂລກຖືກຕັດຂາດຈາກການສຶກສາໂດຍສິ້ນເຊີງ ເພາະບໍ່ສາມາດເຂົ້າເຖິງການຮຽນຮູ້ທາງໄກ, ພວກເຮົາຮູ້ດີວ່າເດັກ ແລະ ເຍົາວະຊົນປະມານ 24 ລ້ານຄົນມີຄວາມສ່ຽງຕ້ອງຫລຸດອອກຈາກລະບົບການສຶກສາ, ພວກເຮົາຮູ້ວ່າແຮງງານເດັກ ແລະ ການແຕ່ງດອງໃນໄວເດັກຈະເພີ່ມຂຶ້ນ ເຖິງວ່າຂໍ້ມູນຕ່າງໆຈະຖືກຍົກຂຶ້ນມາເວົ້າເລື້ອຍໆ, ແຕ່ຍັງບໍ່ມີການດຳເນີນງານພຽງພໍທີ່ຈະຊ່ວຍໃຫ້ເດັກຟື້ນຟູສິ່ງທີ່ພວກເຂົາຕ້ອງເສຍໄປ”.
ລາຍງານຂອງອົງການ UNESCO, ອົງການ UNCEF ແລະ ທະນາຄານໂລກ ລະບຸຕື່ມອີກວ່າ: ມີປະເທດທີ່ໄດ້ມີການສຳຫລວດບໍ່ຮອດເຄິ່ງໜຶ່ງທີ່ອອກມາດຕະການຟື້ນຟູການຮຽນຮູ້ທີ່ຫລຸດຖອຍຂອງເດັກ. ຂະນະດຽວກັນ ງົບປະມານດ້ານການສຶກສາຍັງຫລຸດລົງຕໍ່ເນື່ອງ ໂດຍສະເລ່ຍປະເທດຕ່າງໆຈັດສັນງົບປະມານດ້ານການສຶກສາພຽງ 3% ຈາກແຜນຟື້ນຟູໂຄວິດ ໂດຍປະເທດລາຍໄດ້ຕໍ່າ ຫລື ຂ້ອນຂ້າງຕໍ່າ ຈັດສັນງົບປະມານດ້ານການສຶກສາພຽງ 1% ເທົ່ານັ້ນ.
