ຈີນພັດທະນາ “ວັກຊີນ RNA ວົງມົນ” ຕ້ານໂຄວິດສາຍພັນໂອມິຄຣອນ-ເດວຕາ
ນັກວິທະຍາສາດຈີນສະເໜີກົນລະຍຸດພັດທະນາວັກຊີນອາຣເອັນເອແບບວົງມົນ (circRNA) ຫວັງເປັນອີກທາງເລືອກຕ້ານໄວຣັສໂຄວິດ-19 ສາຍພັນໂອມິຄຣອນ-ເດວຕາ.
ວັນທີ 6 ເມສາ 2022, ເວັບໄຊຊິນຮົວເປີດເຜີຍວ່າ: ຄະນະນັກວິທະຍາສາດຈີນໄດ້ສະເໜີກົນລະຍຸດການຜະລິດວັກຊີນປ້ອງກັນພະຍາດໂຄວິດ-19 ແບບໃໝ່ ເຊິ່ງອາດກະຕຸ້ນການສ້າງແອນຕິບໍດີຊະນິດລຶບລ້າງລິດເຊື້ອໄວຣັສສາຍພັນໂອມິຄຣອນ ແລະ ສາຍພັນເດວຕາ.
ຜົນການສຶກສາໃນວາລະສານເຊລ (Cell) ລະບຸວ່າ: ຄະນະນັກວິໄຈນຳໂດຍທ່ານ ເວ່ຍເຫວິນເຊິງ ຈາກມະຫາວິທະຍາໄລປັກກິ່ງ ໄດ້ພັດທະນາແພກຟອມຜະລິດວັກຊີນປ້ອງກັນພະຍາດໂຄວິດ-19 ລຸ້ນໃໝ່ ຫລື ວັກຊີນອາຣເອັນເອແບບວົງມົນ (circRNA).
ຄະນະນັກວິໄຈລະບຸໃນລາຍງານວ່າ: ວັກຊີນຊະນິດເອັມອາຣເອັນເອ (mRNA) ມຸ້ງໂຈມຕີໂປຣຕີນໜາມຂອງເຊື້ອໄວຣັສທີ່ສ້າງພະຍາດໂຄວິດ-19 ເປັນຫລັກ, ແຕ່ວັກຊີນທີ່ມີໂຄງສ້າງອາຣເອັນເອແບບເສັ້ນ ມັກພາດເປົ້າໝາຍໃນການລຶບລ້າງລິດເຊື້ອໄວຣັສຊະນິດກາຍພັນທີ່ເກີດຂຶ້ນມາໃໝ່.
ຂະນະທີ່ວັກຊີນອາຣເອັນເອແບບວົງມົນ ເຊິ່ງມາພ້ອມໂຄງສ້າງວົງມົນລັກສະນະປິດ ມີຄວາມສະຖຽນຫລາຍກວ່າວັກຊີນເອັມອາຣເອັນເອ ແລະ ສາມາດກະຕຸ້ນການຕອບສະໜອງທາງພູມຕ້ານທານທີ່ອາໄສສານນ້ຳ ແລະ ເຊລຢ່າງມີປະສິດທິພາບຫລາຍຂຶ້ນ.
ວັກຊີນອາຣເອັນເອແບບວົງມົນຍັງກະຕຸ້ນແອນຕິບໍດີຊະນິດລຶບລ້າງລິດໃນລະດັບສູງ ສາມາດປ້ອງກັນເຊື້ອໄວຣັສໃນໜູ ແລະ ລີງວອກ. ອີກທັງສ້າງການຕອບສະໜອງຂອງທີເຊລ (T cell) ໜຶ່ງໃນເຊລສຳຄັນຂອງຮ່າງກາຍທີ່ເຮັດໜ້າທີ່ປ້ອງກັນພະຍາດໂຄວິດ-19 ເຊິ່ງອາດຊ່ວຍຫລຸດຄວາມສ່ຽງອາການໜັກໃນກຸ່ມຄົນທີ່ເຄີຍສັກວັກຊີນ ແລະ ຕິດເຊື້ອໄວຣັສໃນເວລາຕໍ່ມາ (VAED) ເມື່ອທຽບໃສ່ຜູ້ທີ່ຍັງບໍ່ສັກວັກຊີນ.
ການສຶກສາພົບວ່າ: ໜຶ່ງໃນວັກຊີນອາຣເອັນເອແບບວົງມົນທີ່ມຸ້ງໂຈມຕີເຊື້ອໄວຣັສສາຍພັນໂອມິຄຣອນ ສາມາດສ້າງແອນຕິບໍດີຊະນິດລຶບລ້າງລິດຕໍ່ໂອມິຄຣອນ, ແຕ່ບໍ່ຄວບຄຸມສາຍພັນເດວຕາ. ຂະນະທີ່ວັກຊີນອີກຊະນິດທີ່ມີເປົ້າໝາຍເປັນສາຍພັນເດວຕາ ສາມາດປ້ອງກັນເຊື້ອໄວຣັສໄດ້ທັງສອງສາຍພັນ ຫລື ເຮັດໜ້າທີ່ເປັນວັກຊີນໂດສກະຕຸ້ນຕາມຫລັງການສັກວັກຊີນສອງໂດສກ່ອນໜ້າ.
ດ້ວຍເຫດນີ້, ຄະນະນັກວິໄຈຈຶ່ງສະຫລຸບວ່າ: ວັກຊີນອາຣເອັນເອແບບວົງມົນມີປະສິດທິພາບສຳລັບພັດທະນາເປັນວັກຊີນປ້ອງກັນພະຍາດໂຄວິດ-19 ທາງເລືອກສຳລັບການນຳໃຊ້ໃນວົງກວ້າງຕໍ່ໄປ.
ອ້າງອີງ:
https://www.xinhuathai.com/high/275387_20220406
