WHO ເຕືອນປະຊາກອນໂລກຜະເຊີນ “ມົນລະພິດທາງອາກາດ” ຮຸນແຮງ
ວັນທີ 4 ເມສາ 2022, ສຳນັກຂ່າວຊິນຮົວລາຍງານວ່າ: ອົງການອະນາໄມໂລກ (WHO) ເປີດເຜີຍວ່າ: ປະຊາກອນໂລກເກືອບທັງໝົດ ຫລື 99% ສູດດົມອາກາດທີ່ມີມົນລະພິດເກີນລະດັບທີ່ WHO ກຳນົດ.
ເຖິງວ່າປັດຈຸບັນເມືອງຫລາຍກວ່າ 6.000 ແຫ່ງໃນ 117 ປະເທດຈະເຝົ້າຕິດຕາມຄຸນນະພາບອາກາດ, ແຕ່ປະຊາຊົນໃນເມືອງເຫລົ່ານັ້ນຍັງສູດດົມອະນຸພາກຂະໜາດນ້ອຍ ແລະ ແກັສໄນໂຕຣເຈນໄດອອກໄຊໃນລະດັບອັນຕະລາຍ ໂດຍປະຊາຊົນໃນກຸ່ມປະເທດລາຍໄດ້ຕໍ່າ ແລະ ປານກາງຜະເຊີນຜົນກະທົບດັ່ງກ່າວສູງສຸດ.
WHO ຮຽກຮ້ອງໃຫ້ຫລຸດການໃຊ້ເຊື້ອໄຟຟໍຊິລ ແລະ ໃຊ້ມາດຕະການອັນເປັນຮູບປະທຳອື່ນໆ ເພື່ອຫລຸດມົນລະພິດໃນອາກາດ ໂດຍທ່ານ ທີໂດສ ອັດຮານອມ ກີບຣີເຢຊຸສ ຜູ້ອຳນວຍການໃຫຍ່ອົງການອະນາໄມໂລກ ຊີ້ວ່າ: ລາຄາເຊື້ອໄຟຟໍຊິລທີ່ສູງ, ຄວາມໝັ້ນຄົງທາງພະລັງງານ ແລະ ການເລັ່ງຮັບມືຄວາມທ້າທາຍຈາກມົນລະພິດທາງອາກາດ ແລະ ການປ່ຽນແປງສະພາບອາກາດ ເນັ້ນເຖິງຄວາມຈຳເປັນຮີບດ່ວນໃນການກ້າວສູ່ໂລກທີ່ອາໄສເຊື້ອໄຟຟໍຊິລໜ້ອຍລົງໄວຂຶ້ນ.
ອີກອັນໜຶ່ງ, ຝຸ່ນລະອອງຂະໜາດນ້ອຍ ໂດຍສະເພາະ PM2.5 ສາມາດແຊກຊຶມເຂົ້າປອດ ແລະ ກະແສເລືອດ ກໍ່ໃຫ້ເກີດພະຍາດຫົວໃຈ ແລະ ຫລອດເລືອດ, ພະຍາດຫລອດເລືອດສະໝອງ ແລະ ພະຍາດລະບົບທາງເດີນຫາຍໃຈ. ສ່ວນແກັສໄນໂຕຣເຈນໄດອອກໄຊມີການກ່ຽວຂ້ອງກັບພະຍາດລະບົບທາງເດີນຫາຍໃຈ ໂດຍສະເພາະພະຍາດຫອບຫືດ.
WHO ຄາດການວ່າ: ແຕ່ລະປີມີຜູ້ເສຍຊີວິດຈາກສາເຫດດ້ານສິ່ງແວດລ້ອມທີ່ປ້ອງກັນໄດ້ສູງເກີນ 13 ລ້ານຄົນ ເຊິ່ງລວມທັງຜູ້ເສຍຊີວິດທີ່ກ່ຽວຂ້ອງກັບມົນລະພິດທາງອາກາດຈຳນວນ 7 ລ້ານຄົນ.
ທັງນີ້, WHO ແນະນຳການສ້າງລະບົບ ແລະ ເຄືອຂ່າຍຂົນສົ່ງສາທາລະນະທີ່ປອດໄພ ແລະ ລາຄາຕໍ່າ ເຊິ່ງເໝາະສົມກັບຄົນຍ່າງ ແລະ ຂີ່ລົດຖີບ. ການລົງທຶນດ້ານທີ່ຢູ່ອາໄສ ແລະ ໂຮງໄຟຟ້າທີ່ມີປະສິດທິພາບທາງພະລັງງານ, ການຈຳກັດຂີ້ເຫຍື້ອທີ່ດີຂຶ້ນ, ການຫລຸດການຈູດຂີ້ເຫຍື້ອທາງກະສິກຳ ແລະ ກິດຈະກຳທາງກະສິກຳບາງສ່ວນເຊັ່ນ: ການຜະລິດຖ່ານໄມ້ ເພື່ອພັດທະນາຄຸນນະພາບອາກາດ ແລະ ສຸຂະພາບ.
