ເມືອງເມີງ ແຂວງບໍ່ແກ້ວ ທຳລາຍສິນຄ້າໝົດອາຍຸ ແລະ ສິນຄ້າປອມແປງລິຂະສິດ

ຫ້ອງການ ຖວທ ເມືອງເມິງ ແຂວງບໍ່ແກ້ວ ໃຫ້ຮູ້ວ່າ: ວັນທີ 1 ເມສາ 2022 ນິີ້ ຢູ່ທີ່ຫ້ອງການສາທາລະນະສຸກເ ໄດ້ມີພິທີທຳລາຍສິນຄ້າໝົດອາຍຸ ແລະ ສິນຄ້າປອມແປງລິຂະສິດ ຢູ່ພາຍໃນເມືອງ ໂດຍການເປັນປະທານ ຂອງທ່ານ ວັນນາ ຄຳສີປະເສີດ, ຮອງເລຂາພັກເມືອງ, ຜູ້ຊີ້ນຳວຽກງານຂົງເຂດພັກ-ພະນັກງານ, ເປັນກຽດເຂົ້າຮ່ວມຂອງທ່ານ ດຣ ຄໍາສິນ ພົມມະຫານ, ຮອງຫົວໜ້າພະແນກສາທາລະນະສຸກແຂວງ ບໍ່ແກ້ວ, ມີບັນດາທ່ານຫົວໜ້າ-ຮອງຫົວໜ້າຫ້ອງການ, ສອງກອງບັນຊາການ ປກຊ-ປກສ ແລະ ຄະນະຮັບຜິດຊອບຂະແໜງການທີ່ກ່ຽວຂ້ອງເຂົ້າຮ່ວມ.

ການລົງກວດກາສິນຄ້າໝົດອາຍຸ ແລະ ສິນຄ້າປອມແປງໃນຄັ້ງນີ້ ຄະນະຮັບຜິດຊອບຂອງເມືອງ ແມ່ນໄດ້ເລີ່ມຈັດຕັ້ງປະຕິບັດມາແຕ່ວັນທີ 10 ມິນາ -1 ເມສາ 2022 ເຊີ່ງປະກອບມີວິຊາການຈາກພາກສ່ວນທີ່ກ່ຽວຂ້ອງຄື: ຫ້ອງການສາທາລະນະສຸກ, ຫ້ອງການ-ການຄ້າ, ຫ້ອງການ-ການເງີນ ແລະ ເຈົ້າໜ້າທີ່ ປກສ ເມືອງ ລົງກວດແຕ່ລະຮ້ານ ຢູ່ພາຍໃນເມືອງເມີງ ເຊິ່ງໄດ້ພົບເຫັນສິນຄ້າໝົດອາຍຸ ແລະ ສິນຄ້າປອມແປງລິຂະສິດ ລວມທັງໝົດມີ 35 ລາຍການ; ປະກອບມີເຄື່ອງບໍລິໂພກ ປະເພດເຂົ້າໜົມ, ເຄື່ອງປຸ່ງ, ອາຫານແຫ້ງ ແລະ ເຄື່ອງດື່ມ ລວມມີມູນຄ່າທັງໝົດ 5 ລ້ານ 5 ແສນກວ່າກີບ;

ທັ້ງນີ້ ກໍ່ເພື່ອຮັບປະກັນໃຫ້ສິນຄ້າທີ່ວາງຈໍາໜ່າຍຢູ່ບັນດາຮ້ານຂາຍເຄື່ອງ ຢູ່ພາຍໃນເມືອງເມິງໄດ້ມາດຕະຖານ, ມີຄຸນນະພາບ ທັງຮັບປະກັນຄວາມປອດໄພ ຂອງຜູ້ບໍລີໂພກ ເພາະການນຳໃຊ້ສິນຄ້າທີ່ໝົດອາຍຸ ຫຼື ສິນຄ້າປອມແປງ ແມ່ນມີຜົນກະທົບຮ້າຍແຮງ ຕໍ່ສຸຂະພາບຂອງຜູ້ຊົມໃຊ້.