ກອງປະຊຸມປຶກສາຫາລື-ຄົ້ນຄວ້າການພັດທະນາລະບົບການຈັດເກັບຄ່າທຳນຽມ-ຄ່າບໍລິການຢູ່ດ່ານສາກົນຜ່ານ Easy Pass

ວັນທີ 28 ມີນາ 2022 ນີ້, ຄະນະຮັບຜິດຊອບຕາມຂໍ້ຕົກລົງ ສະບັບເລກທີ 0199/ກງ, ລົງວັນທີ 21 ມັງກອນ 2022, ໄດ້ຈັດກອງປະຊຸມປຶກສາຫາລື, ຄົ້ນຄວ້າກ່ຽວກັບການພັດທະນາລະບົບການຈັດເກັບຄ່າທຳນຽມ-ຄ່າບໍລິການຂອງຂະແໜງການລັດ ທີ່ກ່ຽວຂ້ອງຢູ່ດ່ານສາກົນແບບລວມສູນຜ່ານລະບົບຈັດເກັບແບບທັນສະໄໝ (Easy Pass).

ໂດຍການເປັນປະທານຂອງທ່ານ ວົງວັນເພັງ ພູມສະຫວັນ ຮອງຫົວໜ້າກົມພາສີ, ທັງເປັນຫົວໜ້າຄະນະລົງສຳຫຼວດ, ປະເມີນມູນຄ່າການລົງທຶນຕົວຈິງ, ສໍາລັບການປັບປຸງ, ຜັນຂະຫຍາຍລະບົບຈັດເກັບຄ່າທໍານຽມ ແລະ ຄ່າບໍລິການ (Easy Pass) ຢູ່ບັນດາດ່ານສາກົນ, ມີທ່ານ ນິເວດ ຟອງແສງແກ້ວ ຮອງຫົວໜ້າກົມເຕັກໂນໂລຊີຂໍ້ມູນຂ່າວສານການເງິນ, ທັງເປັນຮອງຫົວໜ້າຄະນະຮັບຜິດຊອບຕາມຂໍ້ຕົກລົງ ສະບັບເລກທີ 0199/ກງ, ມີບັນດາຄະນະພະແນກ, ວິຊາການຂອງສອງກົມ ແລະ ຕາງໜ້າທະນາຄານທີ່ກ່ຽວຂ້ອງເຂົ້າຮ່ວມ.

ຊຶ່ງອີງຕາມຂໍ້ຕົກລົງຂອງລັດຖະມົນຕີກະຊວງການເງິນ ໄດ້ຕົກລົງແຕ່ງຕັ້ງຄະນະເພື່ອລົງສໍາຫຼວດ, ປະເມີນມູນຄ່າການລົງທຶນຕົວຈິງ, ສໍາລັບການປັບປຸງ, ຜັນຂະຫຍາຍລະບົບຈັດເກັບຄ່າທໍານຽມ ແລະ ຄ່າບໍລິການ (Easy Pass) ຢູ່ບັນດາດ່ານສາກົນຂອງແຂວງຄໍາມ່ວນ, ສະຫວັນນະເຂດ ແລະ ແຂວງຈໍາປາສັກ, ໂດຍໄດ້ມີການສົມທົບກັບທະນາຄານພັດທະນາລາວ, ລົງສໍາຫຼວດຢູ່ບັນດາດ່ານສາກົນເພື່ອອອກແບບພັດທະນາຕາມມາດຕະຖານການພັດທະນາລະບົບແບບລວມສູນການເກັບຄ່າທໍານຽມ ແລະ ຄ່າບໍລິການແບບທັນສະໄໝຢູ່ດ່ານສາກົນໃນຂອບເຂດທົ່ວປະເທດ, ທັງປະເມີນມູນຄ່າການລົງທຶນຕົວຈິງໃນການພັດທະນາລະບົບທັງໝົດ ແລະ ຕິດຕັ້ງຜັນຂະຫຍາຍຢູ່ບັນດາດ່ານສາກົນ, ຄົ້ນຄວ້າຮ່າງບົດວິພາກເສດຖະກິດຫຍໍ້ໃນການຜັນຂະຫຍາຍລະບົບດັ່ງກ່າວ, ເພື່ອເປັນບ່ອນອີງໃນການເຈລະຈາກັບບໍລິສັດຜູ້ພັດທະນາ ແລະ ສະເໜີກະຊວງການເງິນ ພິຈາລະນາອານຸມັດ ຈັດຕັ້ງປະຕິບັດຜັນຂະຫຍາຍລະບົບ Easy Pass.

ໃນກອງປະຊຸມດັ່ງກ່າວໄດ້ປຶກສາຫາລືກົນໄກໃນການພັດທະນາລະບົບການຈັດເກັບຄ່າທຳນຽມ ແລະ ຄ່າບໍລິການ ຂອງຂະແໜງການພາກລັດຢູ່ດ່ານສາກົນໃນທົ່ວປະເທດໃຫ້ລວມສູນຢູ່ຈຸດດຽວ ແລະ ຫັນເປັນທັນສະໄໝ ຕາມການສ້າງທ່າຫັນປ່ຽນໃໝ່, ເພື່ອສ້າງສິ່ງອໍານວຍຄວາມສະດວກໃຫ້ແກ່ຜູ້ໃຊ້ບໍລິການ, ຫຼຸດຜ່ອນຫຼາຍຂັ້ນຫຼາຍຕອນ, ຫຼຸດຜ່ອນພະນັກງານ, ສ້າງຄວາມໂປ່ງໃສໃນການຈັດເກັບລາຍຮັບເຂົ້າງົບປະມານ ແລະ ອັດຊ່ອງຫວ່າງໃນການຮົ່ວໄຫຼຂອງລາຍຮັບ.