ແຂວງສະຫວັນນະເຂດ ຮ່ວມກັບອົງການອະນຸລັກສັດປ່າ ປະຈໍາ ສປປ ລາວ ຈັດພິທີປ່ອຍແຂ້ນ້ອຍພັນພື້ນເມືອງລາວຄືນສູ່ທໍາມະຊາດ
ແຂວງສະຫວັນນະເຂດ ຕາງໜ້າໂດຍພະແນກກະສິກໍາ ແລະ ປ່າໄມ້ແຂວງ ຮ່ວມກັບອົງການອະນຸລັກສັດປ່າ (WCS) ຈັດພິທີປ່ອຍແຂ້ນ້ອຍພັນພື້ນເມືອງລາວຄືນສູ່ທໍາມະຊາດ ຢູ່ບ້ານຕານສຸມ, ເມືອງຈໍາພອນ ໃນວັນທີ 30 ມິນາ 2022 ໂດຍມີ ທ່ານ ຊູຊາດ ໄຊຍະກຸມມານ, ຫົວໜ້າກົມປ່າໄມ້, ກະຊວງກະສິກໍາ ແລະ ປ່າໄມ້, ທ່ານ ຄໍາຈັນ ສີດາວົງ, ຫົວໜ້າພະແນກກະສິກໍາ ແລະ ປ່າໄມ້ ແຂວງສະ ຫວັນນະເຂດ, ພ້ອມດ້ວຍຫົວໜ້າອົງການອະນຸລັກສັດປ່າ ປະຈຳ ສປປ ລາວ, ຜູ້ຕາງໜ້າອົງການປົກຄອງ 4 ເມືອງເປົ້າໝາຍໂຄງການອະນຸລັກຊີວະນາໆ ພັນທີ່ສໍາຄັນໃນບໍລິ ເວນນໍ້າແບບມີສ່ວນ ຮ່ວມຂອງຊຸມຊົນ ແລະ ແຂກຮັບເຊີນ ເຂົ້າຮ່ວມ.
ແຂ້ນ້ອຍທີ່ນໍາມາປ່ອຍໃນຄັ້ງນີ້ ເປັນແຂ້ນ້ອຍພັນພື້ນ ເມືອງລາວ ຈໍານວນ 47 ໂຕ ໂດຍປ່ອຍໃສ່ອ່າງຈຽວທີ່ນອນຢູ່ໃນຂອບເຂດຈຸດສະຫງວນພາຍໃນເຊຈໍາພອນ ເພື່ອອະນຸ ລັກແຂ້.
ທ່ານ ຊູຊາດ ໄຊຍະກຸມມານ ໃຫ້ຮູ້ວ່າ: ຍ້ອນຊີວະນາໆ ພັນຂອງ ສປປ ລາວ ນັບມື້ຖືກໄພຂົ່ມຂູ່ ເປັນຕົ້ນ: ພື້ນທີ່ປ່າ ໄມ້ຫຼຸດລົງ, ຖິ່ນຢູ່ອາໃສສັດປ່າຖືກທໍາລາຍ ແລະ ສະຖານະ ພາບຂອງແມ່ນໍ້າ, ຫ້ວຍ, ຮ່ອງ, ຄອງບຶງ ແລະ ດິນບໍລິເວນນໍ້າເຊື່ອມໂຊມ ເນື່ອງຈາກພົນລະເມືອງຂອງປະຊາຊົນໃນທ້ອງຖິ່ນນັບມື້ນັບເພີ່ມຂຶ້ນ ເຮັດໃຫ້ມີຄວາມຕ້ອງການພື້ນທີ່ກະສິກໍາ ແລະ ຊົມໃຊ້ຊັບພະຍາກອນດັ່ງກ່າວຫຼາຍຂຶ້ນເລື້ອຍໆ ແຕ່ຂາດການວາງແຜນນໍາໃຊ້ແບບຍືນຍົງ, ດັ່ງນັ້ນ, ໃນວັນທີ 24 ກຸມພາ 2020 ລັດ ຖະບານ ໄດ້ຮັບຮອງເອົາໂຄງການອະນຸລັກຊີວະນາໆ ພັນທີ່ສໍາຄັນໃນບໍລິເວນນໍ້າແບບມີສ່ວນຮ່ວມຂອງຊຸມຊົນໃນ 4 ເມືອງເປົ້າໝາຍຂອງແຂວງສະຫວນນະເຂດ ຄື: ຈໍາພອນ, ໄຊບູລີ, ຊົນບູລີ ແລະ ສອງຄອນ ເຊີ່ງຈັດຕັ້ງປະຕິບັດໂດຍພະແນກກະສິກໍາ ແລະ ປ່າໄມ້ແຂວງສະຫວັນນະເຂດ ຮ່ວມກັບ WCS ເປັນເວລາ 5 ປີ ໂດຍໄດ້ຮັບການສະໜັບສະໜູນຈາກສະຫະພາບເອີ ຣົບ (EU), ອົງການພັດທະນາແຫ່ງປະເທດຝລັ່ງ (AFD) ແລະ ມູນນິທິມາກະເລັດ ຄາຣກິວ (MACP) ທັງໝົດ 1.213.826 ໂດລາສະຫະລັດ. ຜ່ານການຈັດຕັ້ງປະຕິບັດວຽກງານມາຮອດປັດຈຸບັນ ໄດ້ປະສົບຜົນສໍາເລັດວຽກງານໂດຍພື້ນຖານ ຄື: ໄດ້ດໍາເນີນການສໍາຫຼວດຊະນິດພັນ, ຈໍານວນປະຊາ ກອນ, ສາຍພັນ ແລະ ການຂະ ຫຍາຍພັນໃນປີ 2019 ທາງທິມງານຂອງອົງການອະ ນຸລັກສັດປ່າຮ່ວມກັບອົງການປົກຄອງທ້ອງຖິ່ນ ໄດ້ດໍາເນີນການສໍາຫຼວດຊອກຫາຈໍານວນ ແຂ້ນໍ້າຈືດ ຫຼື ແຂ້ພື້ນເມືອງ ແລະ ພົບຮັງໄຂ່ທີ່ກູດຫມາກແຜ້ວ ກຸດຜີນ້ອຍ ເຂດບ້ານຕານສຸມ, ເມືອງຈໍາພອນ, ແຂວງ ສະຫວັນນະເຂດ.
ທ່ານຫົວໜ້າກົມປ່າໄມ້ ໃຫ້ຮູ້ຕື່ມວ່າ: ແຂ້ນ້ອຍທີ່ນໍາມາປ່ອຍຄັ້ງນີ້ ທີ່ທາງໂຄງ ການອະນຸລັກຊີວະນາໆ ພັນທີ່ສໍາຄັນໃນບໍລິເວນນໍ້າແບບມີສ່ວນຮ່ວມຂອງຊຸມຊົນ ໄດ້ອະນຸ ບານໄວ້ເກືອບ 2 ປີ ເມື່ອເຫັນແຂ້ນ້ອຍດັ່ງກ່າວມີສຸຂະພາບແຂງແຮງດີ ພາກສ່ວນກ່ຽວຂ້ອງຈິ່ງຈັດພິທີປ່ອຍລົງສູ່ບຶງທໍາມະຊາດດັ່ງເດີມຂອງມັນ ເພື່ອເປັນຊັບ ສົມບັດຂອງ ສປປ ລາວ ທີ່ຄວນຄຸ້ມຄອງ ແລະ ປົກປັກຮັກສາໄວ້ໃຫ້ຍືນຍົງ ເພາະຢູ່ບໍລິເວນນໍ້າເຊຈໍາພອນ ຍັງມີປະຊາກອນແຂ້ ປະມານ 100 ກວ່າໂຕ ຕາມການປະເມີນຈາກການສໍາຫຼວດເກັບກໍາຂໍ້ມູນ ຂອງຊ່ຽວຊານ ແຕ່ ປີ 2003 ເຖິງປັດຈຸບັນ.
ທ່ານ ຊູຊາດ ໄຊຍະກຸມມານ, ຫົວໜ້າກົມປ່າໄມ້, ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ແຂ້ນ້ອຍພັນພື້ນເມືອງລາວ ເຊີ່ງເປັນແຂ້ນໍ້າຈືດທີ່ປ່ອຍໃນຄັ້ງນີ້ ເປັນຊະນິດແຂ້ທີ່ໂຕບໍ່ໃຫຍ່ ແລະ ບໍ່ເປັນອັນຕະລາຍ ເພາະສ່ວນໃຫຍ່ມັນກິນແຕ່ປາ ແລະ ສັດນ້ອຍນໍ້າປະເພດສັດນໍ້າ, ຂະນະທີ່ປະຊາຊົນ 14 ບ້ານ ພາຍໃນ 4 ເມືອງເປົ້າໝາຍຂອງໂຄງການອະນຸລັກຊີວະນາໆ ພັນທີ່ສໍາຄັນໃນບໍລິເວນນໍ້າແບບມີສ່ວນຮ່ວມຂອງຊຸມຊົນ ໄດ້ອະນຸລັກແຂ້ນໍ້າຈືດນີ້ມາແຕ່ດົນ ຈຶ່ງເຮັດໃຫ້ຍັງເຫຼືອພໍ່ແມ່ພັນໄວ້ແຕ່ບໍ່ຫຼາຍ ແລະ ໃກ້ສູນພັນແລ້ວ ຈຶ່ງເກີດມີໂຄງການອະນຸລັກ ແລະ ຂະ ຫຍາຍພັນແຂ້ດັ່ງກ່າວຂຶ້ນ.
ສະເພາະຢູ່ລາວ, ແຂ້ນໍ້າຈືດພັນພື້ນເມືອງທໍາມະຊາດ ແມ່ນມີຢູ່ສະເພາະເຂດເຊຈໍາພອນທີ່ກວມເອົາ 4 ເມືອງຂອງແຂວງສະຫວັນນະເຂດ ຄື: ຈໍາພອນ, ໄຊບູລີ, ຊົນບູລີ ແລະ ສອງຄອນ ພຽງແຫ່ງດຽວເທົ່ານັ້ນ. ຂະນະທີ່ຢູ່ໃນບັນດາປະເທດໃນພາກພື້ນ ຫລາຍປະເທດໄດ້ສູນພັນໄປແລ້ວ. ອີງຕາມຂໍ້ມູນຫລ້າສຸດ ແຂ້ຊະນິດນີ້ ຍັັງເຫລືອຢູ່ສະເພາະໃນລາວ ແລະ ກໍາປູເຈຍ ເທົ່ານັ້ນ, ສ່ວນຢູ່ປະເທດອື່ນເຂົາເຈົ້າໄດ້ເອົາໄປຂະຫຍາຍພັນລ້ຽງຢູ່ໃນສວນສັດ ແລະ ຟາມຕ່າງໆ, ດັ່ງນັ້ນ ໂຄງການອະນຸລັກຊີວະນາໆ ພັນທີ່ສໍາຄັນໃນບໍລິເວນນໍ້າແບບມີສ່ວນຮ່ວມຂອງຊຸມຊົນ ເຊີ່ງເປັນແຜນງານໜຶ່ງທີ່ຈັດຕັ້ງປະຕິບັດໂດຍ WCS ຮ່ວມກັບພະແນກກະສິກໍາ ແລະ ປ່າໄມ້ແຂວງສະຫວັນນະເຂດ ໂດຍຜ່ານການຮັບຮອງຈາກກະຊວງກະສິກໍາ ແລະ ປ່າໄມ້ ເຊີ່ງໄດ້ຮັບການສະໜັບສະໜູນຈາກສະຫະພາບເອີຣົບ (EU), ອົງການພັດທະນາແຫ່ງປະເທດຝລັ່ງ (AFD) ແລະ ມູນນິທິມາກະເລັດ ຄາຣກິວ (MACP) ໄດ້ເຂົ້າໄປຍົກລະ ດັບຄວາມສາມາດຂອງປະຊາຊົນ 14 ບ້ານພາຍໃນ 4 ເມືອງເປົ້າໝາຍ ໃຫ້ຮູ້ຈັກຕິດຕາມແຂ້ຈໍານວນໜຶ່ງທີ່ເປັນແມ່ພັນໄປວາງໄຂ່ ແລ້ວເອົາໄຂ່ດັ່ງກ່າວມາເພາະພັນ ແລະ ອະນຸບານໄວ້ເພື່ອປ່ອຍຄືນສູ່ທໍາມະຊາດເມື່ອມັນແຂງແຮງຂຶ້ນ, ພ້ອມນີ້ ໄດ້ຍົກລະດັບຄວາມສາມາດໃຫ້ປະຊາຊົນໃນການຄຸ້ມຄອງ ແລະ ປົກປັກຮັກສາແຂ້ທີ່ໄດ້ປ່ອຍໄປໃຫ້ມັນເຕີບໂຕ ແລະ ບໍ່ສູນພັນ.
ແຂ້ນໍ້າຈືດ ຈັດຢູ່ໃນບັນຊີສັດຫວງຫ້າມປະເພດ I ຂອງລາວ. ສ່ວນການປ່ອຍແຂ້ພັນພື້ນ ເມືອງລາວຄືນສູ່ທໍາມະຊາດໃນຄັ້ງນີ້ ແມ່ນເປັນຄັ້ງທີ 2 ແລ້ວ, ແລະ ນັບຈາກນີ້ເປັນຕົ້ນໄປຈະຈັດພິທີປ່ອຍແຂ້ດັ່ງກ່າວຄືນສູ່ທໍຳມະຊາດທຸກປີເພາະມີໄຂ່ແຂ້ທີ່ໄດ້ນໍາມາເບາະແລະອະນຸບານໄວ້ແລ້ວ ເຊີ່ງແຂ້ນ້ອຍທີ່ຈະປ່ອຍຕ້ອງມີອາຍຸ 2 ປີ ຈິ່ງສາມາດປ່ອຍຄືນສູ່ທໍາມະຊາດໄດ້ ເຊີ່ງປັດຈຸບັນກະຊວງກະສິກໍາ ແລະ ປ່າໄມ້ ພວມຮ່ວມກັບ WCS ຫາວິທີຕິດຕາມແຂ້ທີ່ໄດ້ປ່ອຍໄປ ເພື່ອຮັບຂົງເຂດການເຄື່ອນໄຫວຂອງພວກມັນ.
ຂ່າວຈາກ: LNTV
