ໂຈນລັກສາຍໄຟຄືໄພຂົ່ມຂູ່ຄວາມສະຫງົບ ແລະ ສ້າງປາກົດການຫຍໍ້ທໍ້ລະດັບຊາດ

ໂດຍ: ທິດກໍ່າ

ເວົ້າເຖິງສະພາບຄົນບໍ່ດີພາກັນຫາເລາະເຄື່ອນໄຫວລັກສາຍໄຟຟ້າ ຕາມໂຄງການລົງທຶນ ພາຍໃນ ແລະ ຕ່າງປະເທດ ຍັງມີປາກົດໃຫ້ເຫັນຢ່າງລຽນຕິດ, ມີລັກສະນະຕໍ່ເນື່ອງ ແລະ ສ້າງຄວາມເສຍຫາຍໃຫ້ແກ່ວັດຖຸຊັບສິນລວມໝູ່ ແລະ ຂອງປະເທດຊາດບ້ານເມືອງຢ່າງໃຫຍ່ຫລວງ. ຕໍ່ສະພາບດັ່ງກ່າວມານີ້ ມັນສົ່ງຜົນກະທົບຕໍ່ລະບົບເສດຖະກິດ-ສັງຄົມ ແລະ ຄວາມສະຫງົບສຸກຂອງບ້ານເມືອງບໍ່ໜ້ອຍ.

ເນື່ອງຈາກວ່າ ບັນດາສາຍໄຟ ນັບທັງວັດຖຸອຸປະກອນຮັບໃຊ້ຕ່າງໆສ່ວນໃຫຍ່ແມ່ນສາຍໄຟປະເພດດີ ຊະນິດເປັນໂລຫະທີ່ມີມູນຄ່າສູງເຊັ່ນ: ທອງແດງ, ທາດເຫລັກ ແລະ ອຸປະກອນອື່ນໆຫລາຍຊະນິດ. ສະນັ້ນ ເມື່ອຖືກສ້ອມແປງໃຫ້ມັນດີ ແລະ ຮັບປະກັນແຕ່ລະຄັ້ງໄປແລ້ວ ມັນກໍຍັງຖືກໂຈນລັກເອົາໄປຈົນບໍລິສັດດັ່ງກ່າວຕ້ອງຢຸດຕິໃນການສ້ອມແປງຄືນ.

ປາກົດການຜ່ານມາທີ່ມີໃຫ້ເຫັນ ນັບແຕ່ເລີ່ມມີການກໍ່ສ້າງເສັ້ນທາງລົດໄຟຄວາມໄວສູງ ລາວ-ຈີນ ກໍມີຂີ້ລັກເກີດຂຶ້ນທັນທີເຊັ່ນ: ລັກນ໊ອດລາງລົດໄຟ, ລັກສາຍໄຟທີ່ຢັ່ງຢາຍໄປຕາມສາຍທາງລົດໄຟ, ລັກເຫລັກ ແລະ ອຸປະກອນຕ່າງໆທີ່ມີໃນສາຍທາງລົດໄຟຢ່າງຫລວງຫລາຍພາຍມາກ. ຍ້ອນການກະທຳຂອງພວກໂຈນຈັງໄຮໃນຜ່ານມາ ມີບາງລາຍກໍຕາຍຄາທີ່ຍ້ອນຖືກໄຟຟ້າຈັບ, ສ່ວນພວກທີ່ຖືກຈັບໄດ້ຄາຕີນຄາມືນັ້ນກໍມີຫລາຍຄົນ.

ຫລ້າສຸດ ເມື່ອບໍ່ດົນມານີ້ ບໍລິສັດທາງດ່ວນ ໃຫ້ຮູ້ວ່າສາເຫດທີ່ອຸມົງມືດຕະຫລອດປີ ບໍ່ໄດ້ເປີດໄຟຍ້ອນຍ້ອນຖືກລັກຕັດເອົາສາຍໄຟໃນຈຸດດັ່ງກ່າວຊ້ຳແລ້ວຊ້ຳເລົ່າ ນັ້ນເອງ.

ຈາກປາກົດການທີ່ເກີດຂຶ້ນຢ່າງຕໍ່ເນື່ອງນີ້ ມັນບໍ່ພຽງແຕ່ມີຜົນກະທົບຕໍ່ເສດຖະກິດ-ສັງຄົມ ແລະ ຄວາມສະຫງົບສຸກຂອງບ້ານເມືອງ, ແຕ່ມັນຍັງລາມໄປກະທົບຕໍ່ບົດບາດ, ກຽດຊື່ສຽງຂອງປະເທດເຮົາຕໍ່ສາກົນ ໂດຍສະເພາະແມ່ນຂາດຄວາມເຊື່ອໝັ້ນຕໍ່ນັກລົງທຶນທີ່ໄດ້ເຂົ້າມາຮ່ວມສ້າງສາພັດທະນາປະເທດຊາດຂອງພວກເຮົາ.

ຫາກຕັ້ງໂຈດກັນວ່າ, ຕໍ່ບັນຫາດັ່ງກ່າວພວກເຮົາຈະພາກັນແກ້ແນວໃດ ?

ກ່ອນອື່ນບໍລິສັດດັ່ງກ່າວຕ້ອງໄດ້ປະສານສົມທົບຮ່ວມມືກັບອຳນາດການປົກຄອງທ້ອງຖິ່ນຢ່າງຈິງຈັງ ເພື່ອຫາວິທີແກ້ໄຂບໍ່ໃຫ້ເກີດມີປາກົດການຫຍໍ້ທໍ້ໃນທ້ອງຖິ່ນຂອງຕົນຢ່າງເດັດຂາດ. ຢາກເຮັດໄດ້ຕ້ອງກຳນົດເປົ້າໝາຍຄົນບໍ່ດີທີ່ມີການເຄື່ອນໄຫວໃນທ້ອງຖິ່ນຂອງຕົນໄປຄວບຄູ່ກັບການຈັດຕັ້ງການປ້ອງກັນເວນຍາມໃນຈຸດຫລໍ່ແຫລມ

ສ່ວນບັນຫາອັນທີສອງ ທາງບໍລິສັດຜູ້ລົງທຶນຕ້ອງຈ້າງບໍລິສັດຮັກສາຄວາມປອດໄພໄປປ້ອງກັນເວນຍາມໃນຈຸດທີ່ມີຄວາມສ່ຽງຕໍ່ການເສຍຫາຍສູງ ເພາະວ່າໃນເມື່ອຈ້າງບໍລິສັດຍາມໄປຮັກສາຄວາມປອດໄພໃຫ້ແລ້ວ ເວລາເກີດການເສຍຫາຍຍ້ອນໂຈນລັກເອົາວັດຖຸສິ່ງຂອງ ທາງບໍລິສັດຮັກສາຄວາມປອດໄພຕ້ອງໄດ້ໃຊ້ແທນຄ່າເສຍຫາຍຕາມມູນຄ່າທີ່ໄດ້ຕົກລົງກັນໃນສັນຍາ. ນີ້ຄືທາງອອກທີ່ດີທີ່ສຸດສຳລັບຜູ້ລົງທຶນ.

ອີກບັນຫາສຸດທ້າຍ ຂະແໜງການມະຫາພາກດ້ານນີ້ຕ້ອງໃສ່ໃຈປົກປ້ອງຊ່ວຍເຫລືອຜູ້ລົງທຶນຢ່າງຈິງຈັງ ແລະ ເດັດຂາດ. ຖ້າບໍ່ດັ່ງນັ້ນ ທັງທຶນ, ທັງວັດຖຸ, ທັງກຳໄລຈະຕົກໄປຢູ່ນຳພວກມືບອນ.