ພ້ອມກັນຜ່ານພົ້ນວິກິດເສດຖະກິດທີ່ພວມທ້າທາຍບັ່ນທອນຊີວິດການເປັນຢູ່ຂອງພວກເຮົາ

ໂດຍ: ທິດກໍ່າ

ຜົນກະທົບຈາກໂຄວິດ-19 ມາເປັນເວລາສອງປີກວ່າ ໄດ້ເຮັດໃຫ້ເສດຖະກິດຂອງ ສປປ ລາວເຮົາ ເສຍຫາຍຈຳນວນບໍ່ໜ້ອຍ ໂດຍສະເພາະຂະແໜງການທີ່ໄດ້ຮັບຜົນກະທົບໜັກກໍແມ່ນຂະແໜງການທ່ອງທ່ຽວ, ການບໍລິການ, ໂຮງແຮມ, ຮ້ານອາຫານ ແລະ ຂົງເຂດການຜະລິດຈຳນວນໜຶ່ງ. ຈາກຕົວເລກຜົນເສຍຫາຍໃນບັນດາຂະແໜງການທີ່ກ່າວມານີ້ມີຫລາຍພັນລ້ານກີບຕໍ່ປີ.

ໃນປັດຈຸບັນ, ທ່າມກາງສະພາບການຂອງໂລກ ແລະ ພາກພື້ນພວມຜັນແປໄປຢ່າງໄວວາ, ສັບສົນ ແລະ ຄາດເດົາໄດ້ຍາກ ກໍເປັນປັດໄຈໜຶ່ງທີ່ເຮັດໃຫ້ລະບົບເສດຖະກິດຂອງໂລກ, ພາກພື້ນ ແລະ ຂອງປະເທດເຮົາມີການຜັນຜວນ ໂດຍສະເພາະບັນຫາຄວາມຂັດແຍ່ງລະຫວ່າງຣັດເຊຍກັບອູແກຣນທີ່ພວມຮຸນແຮງຈົນເຖິງຂັ້ນປະເທດຣັດເຊຍຕ້ອງໄດ້ປະຕິບັດການທາງທະຫານ ແລະ ຍັງບໍ່ທັນຮູ້ວ່າມື້ໃດ, ເວລາໃດ ຈະລົງເອີ່ຍກັນດ້ວຍການແກ້ໄຂບັນຫາແບບສັນຕິວິທີ.

ຈາກສະພາບການທີ່ກ່າວມານີ້ ໄດ້ສົ່ງຜົນກະທົບບໍ່ໜ້ອຍຕໍ່ເສດຖະກິດຂອງ ສປປ ລາວເຮົາ ໂດຍສະເພາະບັນຫາລາຄານ້ຳມັນຍິ່ງແພງ, ເງິນກີບຍິ່ງອ່ອນຄ່າລົງ, ລາຄາສິນຄ້າຫລາຍປະເພດພຸ້ງຕົວສູງຂຶ້ນ ຕົວຢ່າງລາຄາຄຳຈາກ 7-8 ລ້ານໃນເມື່ອກ່ອນ ພຸ້ງຂຶ້ນມາເປັນ 12-13 ລ້ານກວ່າກີບພາຍໃນສີ່ຫ້າວັນ. ນອກຈາກນັ້ນ ລາຄານ້ຳມັນຈາກ 7-8 ພັນກວ່າກີບ ຄ່ອຍໆຫຍັບຂຶ້ນມາເປັນ 16 ຫາ 20 ພັນກວ່າກີບພຽງໄລຍະໜຶ່ງເດືອນ. ນອກຈາກສິນຄ້າປະເພດທີ່ກ່າວມານີ້ແລ້ວ ຍັງມີປະເພດປຸ໋ຍ, ອຸປະກອນກໍ່ສ້າງ ແລະ ສິນຄ້າປະເພດອື່ນໆກໍໄດ້ຂຶ້ນລາຄາໄປຕາມໆກັນ. ເມື່ອເປັນຄືດັ່ງວ່ານີ້ ພາກສ່ວນທີ່ໄດ້ຮັບຜົນກະທົບໜັກແມ່ນຜູ້ທີ່ມີລາຍຮັບຕໍ່າເຊັ່ນ: ພະນັກງານ, ທະຫານ, ຕຳຫລວດ, ກຳມະກອນ ແລະ ຜູ້ອອກແຮງງານຫາເຊົ້າກິນຄໍ່າທີ່ອາໄສແຕ່ເງິນເດືອນ ແລະ ເງິນແຮງງານໃນແຕ່ລະເດືອນເປັນພື້ນຖານ.

ແນວໃດກໍຕາມ, ຫາກຕັ້ງໂຈດກັນວ່າ ເພື່ອຜ່ານພົ້ນຈາກວິກິດດັ່ງກ່າວ ພວກເຮົາຈະພາກັນເຮັດແນວໃດ ?. ກ່ອນອື່ນໝົດຕ້ອງເຂົ້າໃຈວ່າສະພາບທີ່ມັນເກີດຂຶ້ນນີ້ສ່ວນໜຶ່ງແມ່ນເປັນບັນຫາລວມຂອງໂລກ ໃນນີ້ມີຫລາຍປະເທດຍິ່ງມີຜົນກະທົບໜັກກວ່າເຮົາ ແລະ ມີຫລາຍປະເທດກໍມີການເດີນຂະບວນປະທ້ວງເພື່ອຄັດຄ້ານ ແລະ ຮຽກຮ້ອງລັດຖະບານຂອງຕົນມີມາດຕະການແກ້ໄຂໂດຍດ່ວນ. ສະເພາະປະເທດເຮົາເປັນປະເທດທີ່ມີເສດຖະກິດບອບບາງຢູ່ແລ້ວກໍຍິ່ງໄດ້ຮັບຜົນກະທົບຊ້ຳເຕີມຂຶ້ນຕື່ມ.

ສະນັ້ນ, ວິທີທາງອອກອັນດັບຕົ້ນໆກໍຄືການປະຢັດມັດທະຍັດ, ຫລຸດຜ່ອນການໃຊ້ຈ່າຍທີ່ບໍ່ຈຳເປັນ. ອັນສອງມາ ໃນໄລຍະສະເພາະໜ້າຕ້ອງຫາວິທີຫັນສູ່ການຜະລິດເພິ່ງຕົນເອງກຸ້ມຕົນເອງ ນັບແຕ່ການປູກການລ້ຽງພາຍໃນຄອບຄົວເຫລືອກິນແລ້ວສະໜອງໃຫ້ຕະຫລາດພາຍໃນ ແລະ ສົ່ງອອກໃຫ້ຫລາຍໆ ເພາະຕະຫລາດຮອງຮັບໃນການສົ່ງອອກໃນປັດຈຸບັນຄືຈີນທີ່ເປັນຕະຫລາດໃຫຍ່ສຸດຂອງລາວເຮົາ. ສ່ວນບັນຫາອັນສຸດທ້າຍນີ້ ປັດຈຸບັນພັກ ແລະ ລັດຖະບານເພິ່ນກໍບໍ່ໄດ້ນິ້ງນອນໃຈພະຍາຍາມຊອກທຸກວິທີເພື່ອເລັ່ງແກ້ບັນຫາທີ່ເກີດຂຶ້ນໃຫ້ມີຄວາມສະຫງົບໂດຍໄວ ເຊິ່ງໜຶ່ງໃນບັນດາບັນດາທີ່ຍົກຂຶ້ນມາຄົ້ນຄວ້າແກ້ໄຂໃນກອງປະຊຸມວິສາມັນປະຈຳເດືອນມີນາ ກໍຄືບັນຫາຊອກວິທີທາງອອກຈາກລາຄານ້ຳມັນແພງ, ເງິນກີບອ່ອນຄ່າ, ບັນຫາວິກິດເສດຖະກິດ ແລະ ອື່ນໆ.

ອີກສິ່ງໜຶ່ງທີ່ໃຫ້ພວກເຮົາອົດໃຈລໍ ກໍຄືປະເທດເຮົາໄດ້ມີໂຮງກັ່ນນ້ຳມັນແລ້ວ 2 ແຫ່ງ ເປັນຕົ້ນຄືບໍລິສັດເປໂຕຼເຄມີລາວ ຈຳກັດ ສາມາດຜະລິດນ້ຳມັນໄດ້ 3 ລ້ານໂຕນຕໍ່ປີ ແລະ ເມື່ອບໍ່ດົນມານີ້ ກໍມີບໍລິສັດປຸງແຕ່ງນ້ຳມັນເຊື້ອໄຟຍອດງື່ມພາວເວີ ທີ່ສາມາດປຸງແຕ່ງນ້ຳມັນ 100 ລ້ານລິດຕໍ່ປີ. ເມື່ອໃດສອງໂຮງງານໃນລາວໄດ້ເລີ່ມຜະລິດຢ່າງຈິງຈັງ ສາມາດສະໜອງຢູ່ພາຍໃນປະເທດ ສົມທົບກັບການຊື້ນ້ຳມັນນຳເຂົ້າ ຄິດວ່າລາຄານ້ຳມັນຢູ່ບ້ານເຮົາຄົງຫລຸດລົງຢ່າງແນ່ນອນ.