ເຊົາເກດ ເຊື່ອ ເຄນ ທຸບສະຖິຕິດາວຍິງອັງກິດໃນບານໂລກ 2022
ແກເລັດ ເຊົາເກດ ຜູ້ຈັດການທີມຊາດອັງກິດ ເຊື່ອຫມັ້ນ ແຮຣີ ເຄນ ຈະສາມາດທຳລາຍສະຖິຕິດາວຍິງສູງສຸດຂອງທີມຊາດ ໃນບານໂລກ 2022 ຮອບສຸດທ້າຍ.
ຄວາມເຄື່ອນໄຫວຫລັງຈາກທີ່ ທີມຊາດອັງກິດ ເປີດສະຫນາມເວມບຣີ ເອົາຊະນະ ທີມຊາດ ສະວິດເຊີແລນ ໄປ 2-1 ໃນການແຂ່ງຂັນມິດຕະພາບ ເມື່ອຄືນວັນເສົາທີ່ຜ່ານມາ.
ເກມນີ້ ແຮຣີ ເຄນ ກອງຫນ້າຂອງທີມ ທັອດແນມ ຮັອດສະເປີ ຍິງລູກໂທດຊ່ວຍໃຫ້ອັງກິດ ແຊງຊະນະ ສະວິດເຊີແລນ ໄດ້ສຳເລັດ ແລະ ຖືເປັນປະຕູທີ 49 ຂອງລາວໃນນາມທີມຊາດ ທຽບເທົ່າກັບ ເຊີ ບ໊ອບີ ຊາລຕັນ ດາວຍິງລະດັບຕຳນານເປັນທີ່ຮຽບຮ້ອຍແລ້ວ ແລະ ຕາມຫລັງດາວຍິງສູງສຸດ ເວນ ຣູນີ ທີ່ຍິງໄປ 53 ປະຕູ ຢູ່ພຽງ 4 ຫນ່ວຍເທົ່ານັ້ນ ເຊິ່ງ ເຊົາເກດ ເຊື່ອວ່າ ເຄນ ຈະທຳລາຍສະຖິຕິດັ່ງກ່າວໄດ້ຢ່າງແນ່ນອນ.
ເຊົາເກດ ກ່າວວ່າ : ‘‘ ຂ້ອຍຢາກໃຫ້ລາວເຮັດສະຖິຕິໃນບານໂລກ 2022 ຮອບສຸດທ້າຍ ຂ້ອຍຄິດວ່າລາວອ່າວໃຈເຢັນກັບເລື່ອງນີ້ ຫມັ້ນໃຈວ່າລາວຈະໄປເຖິງຈຸດນັ້ນໄດ້ ເພາະສະຖິຕິໃນການຍິງປະຕູຕໍ່ເກມຂອງລາວນັ້ນສຸດຍອດຫລາຍ ຂ້ອຍຄິດວ່າລາວຮູ້ວ່າມີຄົນເຝົ້າຕາມລາວຢູ່ ຖ້າບໍ່ສາມາດເຮັດໄດ້ກ່ອນບານໂລກ ຜູ້ຄົນກໍຈະບອກກັນວ່າລາວຜົນງານຕົກ ແລະ ສົມຄວນຢູ່ໃນທີມຫລືບໍ່ ທຸກຄົນຈະສຸມມາໃສ່ລາວ ແຕ່ຂ້ອຍຄິດວ່າລາວຄຸ້ນເຄີຍກັບການຮັບມືເລື່ອງນີ້ ແລະ ຂ້ອຍຄິດວ່າລາວໃຈເຢັນຫລາຍກັບເລື່ອງນີ້ ’’.
