ປກສ ເມືອງສີສັດຕະນາກ ຈັບເປົ້າໝາຍຄ້າຂາຍຢາເສບຕິດໄດ້ 3 ຄົນ ພ້ອມຂອງກາງຢາບ້າ

ພັທ ສີທາດ ໜູການ ຮອງຫົວໜ້າພະແນກຕຳຫລວດ ກອງບັນຊາການ ປກສ ເມືອງສີສັດຕະນາກ ນະຄອນຫລວງວຽງຈັນ ໃຫ້ຮູ້ວ່າ: ວັນທີ 22 ມີນາ 2022 ເວລາ 15:00 ໂມງ ເຈົ້າໜ້າທີ່ ປກສ ເມືອງສີສັດຕະນາກ ໄດ້ລົງແກ້ໄຂເປົ້າໝາຍຢາເສບຕິດໄດ້ 1 ຄົນ ທ້າວ ວິນັນດາ ຫລື ມິກ ອາຍຸ 38 ປີ ຫວ່າງງານ ບ້ານ ສີສັງວອນ ກວດຄົ້ນຕົວພົບເຫັນຢາບ້າ 22 ເມັດ ແລະ ຢາໄອສ 1 ຖົງນ້ອຍ, ຈາກນັ້ນສືບຕໍ່ເຂົ້າກວດຄົ້ນເຮືອນຜູ້ກ່ຽວ ຢູ່ບ້ານສີສັງວອນ ເມືອງໄຊເສດຖາ ນວ, ພົບເຫັນຢາບ້າອີກຈຳນວນ 375 ເມັດ ໃນຂະນະກຳລັງກວດຄົ້ນເຮືອນພົບເຫັນ ນ້ອງຊາຍຂອງຜູ້ຖຶກຫາ ຈຶ່ງໄດ້ກວດຄົ້ນຕົວ ພົບເຫັນຢາບ້າອີກ 1 ເມັດ, ຈຶ່ງໄດ້ນຳຕົວພວກກ່ຽວມາສອບສວນ.

ຜ່ານການສອບສວນ ທ້າວ ວິນັນດາ ຫລື ມິກ ໃຫ້ການຮັບສາລະພາບຕໍ່ເຈົ້າໜ້າທີ່ວ່າ: ຢາບ້າ 397 ເມັດ ແລະ ຢາໄອສ 1 ຖົງນ້ອຍ, ເຈົ້່າໜ້າທີ່ກວດພົບເຫັນແມ່ນຂອງຕົນເອງແທ້, ໄດ້ເລີ່ມເສບຢາບ້າມາແຕ່ປີ 2020, ຊື້ມານຳກຸ່ມໄວລຸ້ນຢູ່ຮ້ານອິນເຕີເນັດຄາເຟ ເຂດບ້ານທາດຫລວງຄັ້ງລະ 10 ເມັດ ຫາ 20 ເມັດ ມາເພື່ອເສບ ຕົກມາຮອດຕົ້ນປີ 2021 ຊື້ມາຄັ້ງລະ 200 ຫາ 400 ເມັດ ເພື່ອມາແບ່ງຂາຍໃຫ້ກຸ່ມໄວລຸ້ນພາຍໃນບ້ານ; ສ່ວນທ້າວ ວິພາລິນ ຫລື ຄິວ ຮັບສາລະພາບວ່າ: ຕົນໄດ້ເລີ່ມເສບຢາບ້າມາແຕ່ປີ 2020 ເຖິງປັດຈຸບັນ ເສບມື້ລະ 1 ຫາ 2 ເມັດ.

ໃນເວລາ 17:00 ໂມງ ມື້ດຽວກັນ ເຈົ້າໜ້າທີ່ໄດ້ຂະຫຍາຍຜົນເຂົ້າຈັບກຸມ ກຸ່ມຄ້າຂາຍຢາເສບຕິດ ໃນຂະນະນັດສົ່ງຊື້ຂາຍຢາເສບຕິດ ພ້ອມທັງກວດຄົ້ນຕົວພົບເຫັນຢາບ້າຈຳນວນ 198 ເມັດ, ແລ້ວນຳຕົວມາສອບສວນເບື້ອງຕົ້ນຊາບຊື່ທ້າວ ໄກ່ແກ້ວ ຫລື ໄກ່ ອາຍຸ 29 ປີ ຫວ່າງງານ ບ້ານທາດຫລວງໃຕ້ ເມືອງໄຊເສດຖາ ນວ, ພົວພັນເສບຢາເສບຕິດມາແຕ່ປີ 2013 ເສບມື້ລະ 1 ຫາ 2 ເມັດ ແລະ ຄ້າຂາຍຢາບ້າ ໃນຕົ້ນປີ 2022 , ຢາບ້າກວດພົບເຫັນຊື້້ມານຳແມ່ຍິງຄົນໜຶ່ງບໍ່ຮູ້ຊື່ ແລະ ທີ່ຢູ່, ຕໍ່ກັບຜູ້ຖືກຫາເຈົ້າໜ້າທີ່ໄດ້ສົ່ງຕົວໄປສູນກັກກັນເພື່ອກັ່ນກອງຫາເຊື້ອພະຍາດໂຄວິດ-19 ພາຍຫລັງຄົບກຳນົດຕາມມາດຕະການປ້ອງກັນຄວບຄຸມການແຜ່ລະບາດພະຍາດໂຄວິດ ຈຶ່ງຈະໄດ້ນຳຕົວມາດຳເນີນຄະດີເພື່ອເລັ່ງຊອກຫາຜູ້ຮ່ວມຂະບວນການມາລົງໂທດຕາມກົດໝາຍ.