ສິງກະໂປ ປະກາດ ຄຸມໂຄວິດໄດ້ແລ້ວ ຍົກເລີກຂໍ້ຈຳກັດເດີນທາງເຂົ້າປະເທດ ຍົກເລີກໃສ່ຜ້າປິດປາກ-ດັງກາງແຈ້ງ

ສິງກະໂປປະກາດຍົກເລີກຂໍ້ຈຳກັດຄຸມໂຄວິດ-19, ຫລຸດຜ່ອນຂໍ້ຈຳກັດຮັກສາໄລຍະຫ່າງທາງສັງຄົມ, ຍົກເລີກໃສ່ຜ້າປິດປາກ-ດັງກາງແຈ້ງ.

ວັນທີ 25 ມີນາ 2022, ທ່ານ ລີຊຽນລຸງ ນາຍົກລັດຖະມົນຕີສິງກະໂປ ປະກາດແຜນຫລຸດຜ່ອນຂໍ້ຈຳກັດຄວບຄຸມພະຍາດໂຄວິດ-19 ເພີ່ມຕື່ມ ຫລັງຈຳນວນຜູ້ຕິດເຊື້ອໃໝ່ຫລຸດລົງຕໍ່ເນື່ອງ.

“ການຕໍ່ສູ້ກັບພະຍາດໂຄວິດ-19 ເດີນທາງມາເຖິງຈຸດປ່ຽນສຳຄັນ ແລະ ເຮົາຈະດຳເນີນຂັ້ນເດັດຂາດເພື່ອໃຊ້ຊີວິດຮ່ວມກັບມັນ” ທ່ານ ລີຊຽນລຸງ ກ່າວຜ່ານການຖ່າຍທອດສົດທາງໂທລະພາບ ແລະ ອອນລາຍ.

ມາດຕະການແກ້ໄຂຄວາມປອດໄພໃໝ່ ເຊິ່ງຈະມີຜົນບັງຄັບໃຊ້ວັນທີ 29 ມີນາ ຄວບຄຸມການຂະຫຍາຍການລວມກຸ່ມຂອງປະຊາຊົນຈາກ 5 ຄົນ ເປັນ 10 ຄົນ ແລະ ຄວາມຈຸສູງສຸດຂອງການເຂົ້າຮ່ວມກິດຈະກຳ ແລະ ສະຖານທີ່ຕ່າງໆ ພ້ອມອະນຸຍາດພະນັກງານກັບໄປເຮັດວຽກຢູ່ສຳນັກງານໄດ້ 75% ແລະ ຍົກເລີກການບັງຄັບໃສ່ຜ້າປິດປາກ-ດັງຂະນະຢູ່ກາງແຈ້ງ.

ເນື່ອງຈາກເຊື້ອໄວຣັສສາຍພັນໂອມິຄຣອນ “ຢູ່ພາຍໃຕ້ການຄວບຄຸມແລ້ວ” ສິງກະໂປຈຶ່ງສາມາດຫລຸດຜ່ອນການເດີນທາງຂ້າມຊາຍແດນ ໂດຍປັບປຸງຂໍ້ກຳນົດກວດພະຍາດ ແລະ ກັກຕົວ ລວມທັງຍົກເລີກ “ຂໍ້ຈຳກັດສ່ວນຫລາຍສຳລັບຜູ້ເດີນທາງເຂົ້າສິງກະໂປທີ່ສັກວັກຊີນປ້ອງກັນພະຍາດໂຄວິດ-19 ຄົບໂດສແລ້ວ”.

ສຳນັກຂ່າວຊິນຮົວລາຍງານວ່າ: ການປ່ຽນແປງຄັ້ງນີ້ຈະກະຕຸ້ນຂະແໜງທຸລະກິດຕ່າງໆ ໂດຍສະເພາະການທ່ອງທ່ຽວ ແລະ ຊ່ວຍສິງກະໂປກັບຄືນສູ່ຕຳແໜ່ງສູນກາງທຸລະກິດ ແລະ ການບິນ, ແຕ່ສິງກະໂປຈະຍັງໃຊ້ “ແນວທາງທີ່ຮອບຄອບ” ທີ່ໃຊ້ມາກວ່າ 2 ປີ ແລະ ພິຈາລະນາການຫລຸດຜ່ອນຂໍ້ຈຳກັດເພີ່ມຕື່ມຖ້າສະຖານະການດີຂຶ້ນ ເພື່ອປ້ອງກັນຈຳນວນຜູ້ຕິດເຊື້ອເພີ່ມສູງອີກ.

ທັງນີ້, ກະຊວງສາທາລະນະສຸກສິງກະໂປລາຍງານການກວດພົບຜູ້ຕິດເຊື້ອໂຄວິດ-19 ໃໝ່ 8.478 ຄົນ ໃນວັນທີ 25 ມີນາ ສົ່ງຜົນໃຫ້ຈຳນວນຜູ້ຕິດເຊື້ອສະສົມໃນປະເທດມີທັງໝົດ 1.053.139 ຄົນ ແລະ ຜູ້ເສຍຊີວິດເພີ່ມອີກ 6 ຄົນ ດັນຈຳນວນລວມຜູ້ເສຍຊີວິດເພີ່ມຂຶ້ນເປັນ 1.226 ຄົນ.

ເຖິງຢ່າງໃດກໍຕາມ, ຈຳນວນຜູ້ຕິດເຊື້ອທີ່ປິ່ນປົວຢູ່ໂຮງໝໍຍັງຫລຸດລົງຕໍ່ເນື່ອງ ໂດຍເຫລືອພຽງ 873 ຄົນ ໃນວັນທີ 24 ມີນາ ຫລຸດລົງຈາກລະດັບຂອງວັນທີ 23 ມີນາ ເຊິ່ງມີຜູ້ຕິດເຊື້ອທີ່ຍັງຢູ່ໃນໂຮງໝໍ 951 ຄົນ ຖືເປັນວັນທີສອງຕິດຕໍ່ກັນທີ່ຈຳນວນຜູ້ຕິດເຊື້ອໃນໂຮງໝໍຂອງສິງກະໂປຫລຸດລົງຕໍ່າກວ່າ 1.000 ຄົນ ນັບແຕ່ວັນທີ 4 ກຸມພາຜ່ານມາ.

ສ່ວນອັດຕາການສັກວັກຊີນໃນປັດຈຸບັນ ປະຊາກອນໃນສິງກະໂປປະມານ 95% ສັກວັກຊີນຄົບໂດສແລ້ວ ແລະ 71% ໄດ້ຮັບວັກຊີນເຂັມກະຕຸ້ນແລ້ວ.

ອ້າງອີງ:

https://www.straitstimes.com/…/daily-new-covid-19-cases…

https://www.xinhuathai.com/high/272405_20220325