ໄມ ດີນ ປິດສາກຜູ້ຕັດສິນພຣີເມຍລີກ 22 ປີ ກຽມຜັນຕົວໄປຄຸມຫ້ອງ VAR

‘‘ ເດລີ ເມລ ’’ ສື່ກິລາຊື່ດັງຂອງອັງກິດ ລາຍງານວ່າ : ໄມ ດີນ ຜູ້ຕັດສິນຊື່ດັງຂອງການແຂ່ງຂັນພຣີເມຍລີ ອັງກິດ ປະກາດກຽມແຂວນຫມາກຫວີດ ຫລັງຈາກຈົບລະດູການນີ້ຢ່າງແນ່ນອນ ປິດສາກ 22 ປີ ທີ່ເຮັດຫນ້າທີ່ເປັນຜູ້ຕັດສິນທີ 1 ໃຫ້ກັບວົງການບານເຕະອັງກິດ.

ປັດຈຸບັນ ໄມ ດີນ ໃນອາຍຸ 52 ປີ ລາວເຮັດຫນ້າທີ່ຕັດສິນລີກສູງສຸດຂອງປະເທດ ແລະ ສູງສຸດລະດັບນາໆຊາດມາແລ້ວຫລາຍເກມ ໄດ້ຢຸດເສັ້ນທາງຜູ້ຕັດສິນທີ 1 ໄວ້ພຽງ 22 ປີ ແລະ ມີລາຍງານວ່າ ນັບຕັ້ງແຕ່ລະດູການຫນ້າເປັນຕົ້ນໄປ ລາວຈະຜັນຕົວຈາກຜູ້ຕັດສິນໃນສະຫນາມ ໄປນັ່ງຢູ່ໃນຫ້ອງ VAR ແລະ ຊ່ວຍເປັນຫູເປັນຕາຕໍ່ຜູ້ຕັດສິນໃນສະຫນາມຕໍ່ໄປ.

ສຳລັບ ໄມ ດີນ ເລີ່ມເສັ້ນທາງເປັນຜູ້ຕັດສິນບານເຕະມາຕັ້ງແຕ່ປີ 2000 ໃນອາຍຸ 30 ປີ ໃນຕອນນັ້ນ ແລະ ກ້າວຂັ້ນຂຶ້ນມາເປັນຜູ້ຕັດສິນຊັ້ນນຳຂອງວົງການໃນເວລາພຽງບໍ່ເຖິງປີເທົ່ານັ້ນ ເຊິ່ງຕະຫລອດ 22 ປີ ລາວລົງຕັດສິນໃນ ພຮີເມຍລີກ ໄປແລ້ວຫລາຍເຖິງ 553 ເກມ ແລະ ຂຶ້ນເປັນຜູ້ຕັດສິນທີ່ແຈກໃບແດງຫລາຍທີ່ສຸດໃນປະຫວັດສາດຂອງວົງການ ເຊິ່ງຫລາຍເຖິງ 114 ໃບ.