ມັລດີຟ ຕ້ອນຮັບນັກທ່ອງທ່ຽວກວ່າ 3,5 ແສນຄົນແລ້ວ

ກະຊວງການທ່ອງທ່ຽວມັລດີຟ ເປີດເຜີຍຈຳນວນນັກທ່ອງທ່ຽວທີ່ເດີນທາງເຂົ້າມັລດີຟໃນປີນີ້ ມີຫລາຍກວ່າ 359.000 ຄົນ ເມື່ອໄລ່ຮອດວັນທີ 17 ມີນາຜ່ານມາ ເຊິ່ງເພີ່ມຂຶ້ນຈາກໄລຍະດຽວກັນຂອງປີກ່ອນທີ່ມີນັກທ່ອງທ່ຽວເດີນທາງເຂົ້າ 241.407 ຄົນ.

ສະຖິຕິຈາກກະຊວງການທ່ອງທ່ຽວມັລດີຟ ເຊິ່ງເຜີຍແຜ່ໃນທ້າຍອາທິດຜ່ານມາ ລະບຸວ່າ: ຈຳນວນນັກເດີນທາງຂາເຂົ້າແຕ່ລະວັນສະເລ່ຍມີ 4.790 ຄົນ ແລະ ນັກທ່ອງທ່ຽວພັກຄ້າງຄືນສະເລ່ຍ 8 ວັນ ໂດຍມັລດີຟຕັ້ງເປົ້າໝາຍຮັບຮອງນັກທ່ອງທ່ຽວ 1,6 ລ້ານຄົນໃນປີນີ້ ເຊິ່ງເພີ່ມຂຶ້ນຈາກ 1,3 ລ້ານຄົນຂອງປີກ່ອນ.

ສື່ທ້ອງຖິ່ນລາຍງານວ່າ: ຈຳນວນນັກເດີນທາງຈາກຣັດເຊຍ ແລະ ຢູເຄຣນທີ່ຫລຸດລົງ ສົ່ງຜົນກະທົບຕໍ່ຈຳນວນນັກທ່ອງທ່ຽວໂດຍລວມ ໂດຍປັດຈຸບັນມີການສັ່ງໂຈະບໍລິການຖ້ຽວບິນຕົງຈາກທັງສອງປະເທດສູ່ມັລດີຟ.