ໜ້າເປັນຫ່ວງ ຈຳນວນຜູ້ຕິດໂຄວິດ-19 ຢູ່ໃນໄລຍະຂາຂຶ້ນ

ປັດຈຸບັນຜູ້ຕິດເຊື້ອ ບໍ່ມີທ່າອ່ຽງຫລຸດລົງ ເຊິ່ງຫລ້າສຸດມື້ນີ້ທະລຸກວ່າ 700 ຄົນ ຈາກນີ້ຈຶ່ງຕັ້ງບັນຫາການຫັນປ່ຽນສູ່ການດໍາລົງຊີວິດປົກກະຕິແບບໃໝ່ ແລະ ພາຍຫລັງຜ່ອນຜັນບັນດາມາດຕະການປ້ອງກັນ…ໂດຍຈາກນີ້ໄປບຸນສິນກິນທານນັບມື້ຫລາຍ, ເດືອນກຸມພາຜ່ານມາສັງເກດເຫັນກິດຈະກໍາທີ່ເຕົ້າໂຮມຄົນມີຫລາຍ ຂຶ້ນ ເປັນຕົ້ນ: ດອງ, ບຸນປະເພນີ, ການຊຸມແຊວ ແລະ ບໍລິການກິນດື່ມ ຄຶກຄື້ນຄືນ.

ແນ່ນອນເປັນເລື່ອງປະຕິເສດບໍ່ໄດ້ເພາະຫລາຍທ່ານບອກວ່າ ອົດບໍ່ລົນທົນບໍ່ໄດ້ອີກແລ້ວ ຂໍຈຶກຈັກກ່ອນກໍວ່າກັນໄປ, ແຕ່ຄວາມເປັນຫ່ວງຢ້ານໂຄວິດ-19 ລະບາດໜັັກກວ່າເກົ່າ ກໍຍັງມີຢູ່ຄືກັນ ເຊິ່ງເຫັນໄດ້ແຕ່ລະມື້ຈາກຄະນະສະເພາະກິດເພິ່ນຖະແຫລງຂ່າວ ໂດຍທ່າອ່ຽງປັດຈຸບັນຢູ່ໃນໄລຍະຂາຂຶ້ນບາງແຂວງໂດຍສະ ເພາະນະຄອນຫລວງວຽງຈັນ ກັບຄືນມາເພີ່ມຂຶ້ນ ຈາກເກືອບ 1 ເດືອນຜ່ານມາມີກວ່າ 200 ຄົນເທົ່ານັ້ນ. ຄວາມຈິງກໍຄືຄວາມຈິງ, ພວກເຮົາ ຕ້ອງມີມາດຕະການຮັດກຸມເພື່ອຕອບໂຕ້ ແລະ ຮອງຮັບການລະບາດເທື່ອນີ້ໃຫ້ດີໃຫ້ເຂັ້ມງວດກວ່າເກົ່າ ໝາຍຄວາມວ່າພາກສ່ວນກ່ຽວຂ້ອງຕ້ອງຄົ້ນຄວ້າກໍານົດຢ່າງຈະແຈ້ງຂະໜາດຂອງການຈັດກິດຈະກໍາ ທີ່ເຕົ້າໂຮມຄົນເພື່ອການປະຕິບັດເປັນເອກະພາບໃນລວງດຽວກັນ ແລະໃຫ້ຍືນຍົງ. ເມື່ອວາງລະບຽບແລ້ວ ຕ້ອງຍົກສູງການຕິດຕາມກວດກາ ເຮັດດີຕ້ອງຍ້ອງຍໍ, ຝ່າຝືນ ຕ້ອງປະຕິ ບັດມາດຕະການແຕ່ເບົາຫາໜັກ.

ບັນຫາພະຍາດໂຄວິດ-19 ພວກເຮົາເຮົາຍັງຕ້ອງລະວັງ, ການຫັນປ່ຽນການດໍາລົງຊີວິດປົກກະຕິແບບໃໝ່ ຈະເຮັດແນວໃດໃຫ້ຍືນຍົງ ສຳຄັນຄືການຮ່ວມມືການເປັນຈິດໜຶ່ງໃຈດຽວກັນຜ່ານຜ່າມັນໄປໃຫ້ໄດ້ ແລະຢ່າ ລືມວ່າ “ບໍ່ມີໃຜປອດໄພ ຖ້າທຸກຄົນບໍ່ປອດໄພ” ການສັກວັກຊີນຄົບເຂັມ ແລະ ເຂັມກະຕຸ້ນຕາມແນະນຳຄື ທາງອອກສຳຄັນເພື່ອເສີມສ້າງພູມຄຸ້ມກັນຕໍ່ພະຍາດໂຄວິດ-19 ສາມາດປົກປ້ອງທ່ານ, ຄອບຄົວ ແລະ ສັງ ຄົມ.
.