ການກຳເນີດເກີດຂຶ້ນຂອງພັກປະຊາຊົນປະຕິວັດລາວ (ໂອກາດວັນສ້າງຕັ້ງພັກຄົບຮອບ 67 ປີ 22 ມີນາ 1955-22 ມີນາ 2022)

ທ້າຍສະຕະວັດທີ XIX, ພວກລ່າເມືອງຂຶ້ນໄດ້ເຂົ້າມາຢຶດຄອງປະເທດລາວ, ຫວຽດນາມ, ກໍາປູເຈຍ ເປັນ ຫົວເມືອງຂຶ້ນຂອງພວກເຂົາ ແລະ ພາຍໃຕ້ແອກປົກຄອງຂອງພວກລ່າເມືອງຂຶ້ນຝຣັ່ງປະຊາຊົນອິນດູຈີນໄດ້ຖືກກົດຂີ່ຂູດຮີດຢ່າງໜ່ກໜ່ວງ; ດ້ວຍຈິດໃຈຮັກຊາດ, ບໍ່ຍອມເປັນຂ້ອຍຂ້າ, ປະຊາຊົນລາວບັນດາເຜົ່າຢູ່ຫລາຍບໍລິເວນໂດຍພາຍໃຕ້ການເປັນຄັນທຸງຂອງບັນພະບູລຸດທີ່ຮັກຊາດໄດ້ລຸກຮືຂຶ້ນຕໍ່ສູ້ຢ່າງເດັດດ່ຽວພິລະ ອາດຫານ, ແຕ່ຂະບວນຕໍ່ສູ້ເຫລົ່ານັ້ນລ້ວນແຕ່ຖືກປາບປາມຢ່າງໂຫດຮ້າຍປ່າເຖື່ອນ.

ວັນທີ 3 ກຸມພາ 1930, ພັກກອມມູນິດອິນດູຈີນໄດ້ສ້າງຕັ້ງຂຶ້ນພາຍໃຕ້ການຊີ້ນໍາໂດຍກົງຮອບດ້ານຂອງປະທານໂຮ່ຈີມິງ. ນັບແຕ່ໄດ້ສ້າງຕັ້ງຂຶ້ນ,ພັກກອມມູນິດອິນດູຈີນ ໄດ້ວາງແນວທາງຍຸດທະສາດ, ຍຸດໂທບາຍການປະຕິວັດອິນດູຈີນອອກຢ່າງສອດຄ່ອງ ແລະ ນໍາພາການປະຕິວັດຢູ່ອິນດູຈີນຕໍ່ສູ້ຕ້ານການຮຸກຮານຂອງພວກລ່າເມືອງຂຶ້ນ ແລະ ຍາດໄດ້ໄຊຊະນະຢ່າງຕໍ່ເນື່ອງຈາກໄຊຊະນະນີ້ໄປສູ່ໄຊຊະນະໃໝ່ຢ່າງບໍ່ຢຸດຢັ້ງ, ການປະຕິວັດຂອງປະເທດເຮົາ ໄດ້ກໍ່ຕັ້ງເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ອັນເປັນເງື່ອນໄຂສໍາຄັນໃຫ້ແກ່ການສ້າງຕັ້ງພັກມາກຊິດຢູ່ປະເທດເຮົາໃນໄລຍະຕໍ່ມາ. ປີ 1934, ອົງຄະນະພັກແຄວ້ນລາວໄດ້ສ້າງຕັ້ງຂຶ້ນ ຊຶ່ງເປັນບາດກ້າວທໍາອິດແຫ່ງການປັບປຸງຂະຫຍາຍການຈັດຕັ້ງພັກ ແລະ ອົງການຈັດຕັ້ງມະຫາຊົນ.

ຈາກນັ້ນອົງຄະນະພັກແຄວ້ນລາວໄດ້ຍູ້ແຮງການປຸກລະດົມຂົນຂວາຍກໍາລັງປະຕິວັດ ໂດຍຖືເອົາຊາວໄຮ່ນາ ແລະ ຊັ້ນຄົນຕ່າງໆຢູ່ເຂດຊົນນະບົດ ແລະ ບໍລິເວນຊົນເຜົ່າ ເປັນກໍາລັງພື້ນຖານຂອງການປະຕິວັດ. ກໍາລັງການປະຕິວັດ ໄດ້ຂະຫຍາຍຕົວ ແຕ່ໜ້ອຍຫາຫລາຍ, ການຕໍ່ສູ້ໄດ້ເກີດຂຶ້ນແຕ່ຕໍ່າຫາສູງໃນທົ່ວປະເທດຈົນສາມາດຢຶດອໍານາດ 23 ສິງຫາ 1945 ແລະ ກ້າວສູ່ປະກາດເອກະລາດອັນເປັນປະ ຫວັດສາດຂອງຊາດລາວໃນວັນທີ 12 ຕຸລາ 1945.

ຈາກນັ້ນບໍ່ເທົ່າໃດປີກໍໄດ້ສ້າງຕັ້ງກອງທັບປະຊາຊົນລາວໃນວັນທີ 20 ມັງກອນ 1949 ແລະ ສ້າງຕັ້ງແນວລາວອິດສະລະໃນວັນທີ 13 ສິງຫາ 1950. ນັບແຕ່ນັ້ນມາ, ການຈັດຕັ້ງແນວລາວອິດສະລະໄດ້ກາຍເປັນຄັນທຸງສໍາຄັນເຕົ້າໂຮມ, ດຶງດູດເອົາທຸກຊັ້ນຄົນເຂົ້າຮ່ວມການປະຕິວັດໄດ້ຢ່າງກວ້າງຂວາງ ແລະ ແຂງແຮງ.

ກອງປະຊຸມໃຫຍ່ຄັ້ງທີ II ຂອງພັກກອມມູນິດອິນດູຈີນ ປີ 1951 ໄດ້ມີມະຕິຕົກລົງໃຫ້ແຕ່ລະປະເທດສ້າງຕັ້ງພັກເອກະລາດຂອງຕົນຂຶ້ນ ແລະ ບົນພື້ນຖານນັ້ນ, ບັນດາສະຫາຍສະມາຊິກພັກກອມມູນິດອິນດູຈີນທີ່ເປັນຄົນລາວກໍໄດ້ຈັດຕັ້ງ”ຄະນະກໍາມະການປະຊາຊົນລາວ” ຂຶ້ນເພື່ອສືບຕໍ່ນໍາພາການປະຕິວັດຢູ່ລາວ ແລະກະ ກຽມຄວາມພ້ອມດ້ານຕ່າງໆເປັນເວລາ 4 ປີຈຶ່ງສາມາດດໍາເນີນກອງປະຊຸມໃຫຍ່ຄັ້ງທໍາອິດ( ຄັ້ງທີ I)ຂອງຕົນຂຶ້ນໃນວັນທີ 22 ມີນາ 1955 ຢູ່ບ້ານນາແມວ ເມືອງວຽງໄຊ ແຂວງຫົວພັນ ຊຶ່ງເປັນເຂດທີ່ໝັ້ນຂອງການປະຕິວັດໃນເວລານັ້ນ ແລະ ໄດ້ເອີ້ນວ່າ: “ພັກປະຊາຊົນລາວ” ໂດຍປະທານ ໄກສອນ ພົມວິຫານ ເປັນເລຂາທິການໃຫຍ່ຂອງພັກປະຊາ ຊົນລາວ.