ຈີນຕິດໂຄວິດ-19 ໃນປະເທດ ສູງເຖິງ 1.500 ຄົນຄັ້ງທຳອິດ ນັບແຕ່ເກີດການລະບາດ

ຈີນພົບຜູ້ຕິດເຊື້ອໂຄວິດ-19 ໃນປະເທດວັນດຽວສູງເຖິງ 1.500 ຄົນ ສ້າງສະຖິຕິສູງສຸດນັບແຕ່ເກີດການລະບາດຮອບທຳອິດໃນປີ 2020 ລັດຖະບານສັ່ງທຸກທ້ອງຖິ່ນເລັ່ງຫາມາດຕະການສະກັດໂອມິຄຣອນສ້າງຈຳນວນຜູ້ຕິດເຊື້ອເພີ່ມສູງ.

ວັນທີ 12 ມີນາ 2022,​ ລັດຖະບານຈີນລາຍງານຈຳນວນຜູ້ຕິດເຊື້ອໂຄວິດ-19 ພາຍໃນປະເທດ ຈຳນວນ 1.524 ຄົນ ເຊິ່ງເປັນສະຖິຕິຜູ້ຕິດເຊື້ອປະຈຳວັນສູງສຸດ ນັບແຕ່ເກີດການລະບາດຮອບທຳອິດໃນຕົ້ນປີ 2020 ຈາກການລະບາດຂອງໄວຣັສສາຍພັນໂອມິຄຣອນທີ່ແພ່ກະຈາຍເຊື້ອໄດ້ໄວ ເຮັດໃຫ້ຜູ້ຕິດເຊື້ອເພີ່ມຂຶ້ນຢ່າງວ່ອງໄວ.

ຄະນະກຳມາທິການສາທາລະນະສຸກແຫ່ງຊາດຈີນລະບຸວ່າ: ໃນຈຳນວນຜູ້ຕິດເຊື້ອໂຄວິດ-19 ພາຍໃນປະເທດທີ່ພົບໃນວັນທີ 12 ມີນານີ້ ແບ່ງເປັນຜູ້ຕິດເຊື້ອແບບມີອາການຈຳນວນ 476 ຄົນ ແລະ ຜູ້ຕິດເຊື້ອບໍ່ສະແດງອາການ 1.048 ຄົນ.

ສຳນັກຂ່າວຣອຍເຕີລາຍງານວ່າ: ເຖິງວ່າຈຳນວນຜູ້ຕິດເຊື້ອໂຄວິດ-19 ທີ່ພົບໃນປະເທດຈີນຍັງໜ້ອຍກວ່າເມື່ອທຽບໃສ່ປະເທດອື່ນໆ, ແຕ່ໄດ້ກະຕຸ້ນໃຫ້ລັດຖະບານທ້ອງຖິ່ນເມືອງຕ່າງໆຂອງຈີນ ເລັ່ງຫາມາດຕະການມາສະກັດການແພ່ລະບາດໂດຍໄວທີ່ສຸດ ທັງການເລັ່ງກວດຄັດກອງທາງບຸກ, ໂຈະການຈັດການທີ່ມີການລວມກຸ່ມຂອງຄົນ ແລະ ປ່ຽນຈາກການຮຽນໃນໂຮງຮຽນມາເປັນການຮຽນການສອນອອນລາຍ.

ນອກຈາກນີ້, ລັດຖະບານມົນທົນຈີ່ຫລິນ ທາງຕາເວັນອອກສຽງເໜືອຂອງຈີນ ເຊິ່ງເປັນໜຶ່ງໃນພື້ນທີ່ທີ່ມີການແພ່ລະບາດຢ່າງຮຸນແຮງ ໄດ້ສັ່ງໃຫ້ປົດເຈົ້າເມືອງຈີ່ຫລິນ ແລະ ເຈົ້າແຂວງສາງຊຸນອອກຈາກຕຳແໜ່ງ.

ຂະນະດຽວກັນ, ດິສນີແລນຣີສອດໃນນະຄອນຊຽງໄຮ້ ໄດ້ປະກາດຫລຸດຈຳນວນແຂກທີ່ເຂົ້າຮັບບໍລິການ ພ້ອມກຳນົດໃຫ້ນັກທ່ອງທ່ຽວຕ້ອງສະແດງຜົນກວດໂຄວິດ-19 ເປັນລົບພາຍໃນ 24 ຊົ່ວໂມງກ່ອນເຂົ້າຮັບບໍລິການ.

ສະຖານີໂທລະພາບ CCTV ຂອງຈີນລາຍງານວ່າ: ຄະນະເຮັດວຽກເພື່ອຮັບມືໂຄວິດ-19 ຂອງລັດຖະບານຈີນໄດ້ຈັດກອງປະຊຸມໃນວັນທີ 11 ມີນາ ໂດຍໃນກອງປະຊຸມໄດ້ຍົກວາລະການສະກັດການລະບາດເປັນວາລະສູງສຸດທີ່ລັດຖະບານທ້ອງຖິ່ນທຸກພື້ນທີ່ຕ້ອງດຳເນີນໃນການຍົກລະດັບມາດຕະການປ້ອງກັນ ແລະ ຄວບຄຸມການແພ່ລະບາດໃຫ້ຖືເປັນພາລະກິດສູງສຸດໃນປັດຈຸບັນນີ້.

ອ້າງອີງ:

https://www.reuters.com/…/china-daily-local-covid…/