ທ່ານ ຢຸນຊອກຢໍ ຜູ້ສະໝັກຝ່າຍຄ້ານ ໄດ້ຮັບໄຊຊະນະການເລືອກຕັ້ງປະທານາທິບໍດີ ສ.ເກົາຫລີ ໃນການເລືອກຕັ້ງສູສີທີ່ສຸດໃນປະຫວັດສາດ

ທ່ານ ຢຸນຊອກຢໍ ອະດີດໄອຍະການສູງສຸດ ແລະ ຜູ້ສະໝັກຈາກພັກພະລັງປະຊາຊົນ ສ.ເກົາຫລີ (People Power Party) ເຊິ່ງເປັນພັກຝ່າຍຄ້ານສາຍອະນຸລັກນິຍົມ ໄດ້ຮັບໄຊຊະນະໃນການເລືອກຕັ້ງຊີງຕຳແໜ່ງປະທານາທິບໍດີ ສ.ເກົາຫລີ ທີ່ຈັດຂຶ້ນໃນວັນທີ 9 ມີນາ ໂດຍມີຄະແນນນຳຄູ່ແຂ່ງຄືທ່ານ ອີແຈມຢອງ ອະດີດເຈົ້າແຂວງຢອງກີ ຈາກພັກເສລີປະຊາທິປະໄຕ (Liberal Democratic Party) ເຊິ່ງເປັນພັກລັດຖະບານ ໄປແບບສູສີບໍ່ເຖິງ 1%.

ໂດຍຄະນະກຳມະການການເລືອກຕັ້ງເປີດເຜີຍຜົນການນັບຄະແນນທັງໝົດພົບວ່າ: ທ່ານ ຢຸນຊອກຢໍ ໄດ້ຮັບຄະແນນສຽງ 48,56% ນຳໜ້າທ່ານ ອີແຈມຢອງ ທີ່ໄດ້ຄະແນນສຽງ 47,83% ຫລື ຫ່າງພຽງ 0,73% ເຊິ່ງຖືເປັນຜົນການເລືອກຕັ້ງສູສີທີ່ສຸດໃນປະຫວັດສາດຂອງ ສ.ເກົາຫລີ ເຊິ່ງສື່ ສ.ເກົາຫລີ ຫລາຍສຳນັກລະບຸວ່າ: ເປັນການແຂ່ງຂັນທີ່ສູສີແບບບໍ່ໜ້າເຊື່ອ.

ຂະນະທີ່ທ່ານ ຢຸນຊອກຊໍ ກ່າວຖະແຫລງຕໍ່ເຈົ້າໜ້າທີ່ພັກຢູ່ລັດຖະສະພາພາຍຫລັງໄດ້ຮັບໄຊຊະນະ ໂດຍເນັ້ນເລື່ອງການເປັນໜຶ່ງດຽວ ແລະ ຄວາມສະເໝີພາບຂອງປະຊາຊົນ ສ.ເກົາຫລີ.

ສ່ວນທ່ານ ອີແຈມຢອງ ໄດ້ອອກມາປະກາດຍອມຮັບການເສຍໄຊ ແລະ ສະແດງຄວາມຍິນດີຕໍ່ທ່ານ ຢຸນຊອກຢໍ ໂດຍຢືນຢັນວ່າ: ທ່ານພະຍາຍາມເຮັດຢ່າງດີທີ່ສຸດແລ້ວ ແລະ ຂໍສະແດງຄວາມຮັບຜິດຊອບຕໍ່ຜົນເລືອກຕັ້ງທີ່ອອກມາແຕ່ພຽງຜູ້ດຽວ.

ຂະນະທີ່ທ່ານ ຢຸນຊອກຢໍ ກໍສະແດງຄວາມຂອບໃຈຕໍ່ທ່ານ ອີແຈມຢອງ ແລະ ຜູ້ສະໝັກຄູ່ແຂ່ງຄົນອື່ນໆ ແລະ ຊີ້ວ່າ: ການແຂ່ງຂັນນັ້ນ “ສິ້ນສຸດລົງແລ້ວ” ແລະ “ເຮົາຕ້ອງເຮັດວຽກຮ່ວມກັນເປັນໜຶ່ງດຽວ ເພື່ອປະຊາຊົນ ແລະ ສາທາລະນະລັດເກົາຫລີ”.

ສຳລັບທ່ານ ຢຸນຊອກຢໍ ອາຍຸ 61 ປີນັ້ນ ເປັນຈຸດສົນໃຈຈາກການເປັນຜູ້ນຳໃນການສືບສວນຄະດີສໍ້ລາດບັງຫລວງຂອງອະດີດປະທານາທິບໍດີ ປັກກີນເຮ ທີ່ຖືກຖອດຖອນຈາກຕຳແໜ່ງໃນປີ 2017.

ເຊິ່ງໃນການຫາສຽງຜ່ານມາ, ທ່ານປະກາດນະໂຍບາຍຄວາມໝັ້ນຄົງທີ່ເຂັ້ມງວດ ແລະ ດຸດັນເຊັ່ນ: ການຕອບໂຕ້ໄພຄຸກຄາມ ແລະ ການທົດລອງລູກສອນໄຟຈາກ ສປປ ເກົາຫລີ ແລະ ການໃຫ້ຄຳໝັ້ນວ່າຈະເພີ່ມການຕິດຕັ້ງລະບົບຕໍ່ຕ້ານລູກສອນໄຟ THAAD ຂອງອາເມລິກາ ໃນ ສ.ເກົາຫລີ ແລະ ສ່ວນຂອງນະໂຍບາຍຕ່າງປະເທດ ຈະມຸ່ງເນັ້ນການເພີ່ມພູນການພົວພັນກັບຍີ່ປຸ່ນ ແລະ ອາເມລິກາໃນຫລາຍຂຶ້ນ.

ອ້າງອີງ:

https://en.yna.co.kr/view/AEN20220310000854315?section=national/politics