ສປປ ລາວ ແລະ ສ.ເກົາຫລີ ເປັນເຈົ້າພາບຮ່ວມຈັດກອງປະຊຸມເຈົ້າໜ້າທີ່ອາວຸໂສ ຂອບການຮ່ວມມືແມ່ນ້ຳຂອງ-ສ.ເກົາຫລີ

  ສປປ ລາວ ແລະ ສ.ເກົາຫລີ ໄດ້ເປັນເຈົ້າພາບຮ່ວມຈັດກອງປະຊຸມ ເຈົ້າໜ້າທີ່ອາວຸໂສ ຂອບການຮ່ວມມືແມ່ນ້ຳຂອງ-ສ.ເກົາຫລີ ຂຶ້ນທີ່ເມືອງປາກເຊ, ແຂວງຈຳປາສັກ ໃນວັນທີ 24 ມີນາຜ່ານມານີ້ ພາຍໃຕ້ການເປັນປະທານຮ່ວມ ຂອງ ທ່ານ ສົງການ ຫລວງມຸນິນທອນ, ຫົວໜ້າກົມເສດຖະກິດ, ກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສ ຂອບການຮ່ວມມື ແມ່ນ້ຳຂອງ-ສ.ເກົາຫລີ ແລະ ທ່ານ ຣຽວ ຈິອອງ-ຮຸນ, ຫົວໜ້າກົມກິດຈະການອາຊີໃຕ້ ແລະ ປາຊີຟິກ, ກະຊວງການຕ່າງ ປະເທດຂອງ ສ.ເກົາຫລີ ແລະ ຍັງມີບັນດາຫົວໜ້າເຈົ້າໜ້າທີ່ອາວຸໂສ ພ້ອມດ້ວຍຄະນະ ຈາກປະເທດແມ່ນໍ້າຂອງ (ກຳປູເຈຍ, ມຽນມາ, ໄທ ແລະ ຫວຽດນາມ) ເຂົ້າຮ່ວມຢ່າງພ້ອມພຽງ.

ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ; ທ່ານໄດ້ກ່າວເປີດກອງປະຊຸມວ່າ ປີນີ້ ເປັນປີທີ່ມີຄວາມໝາຍຄວາມສຳຄັນສຳລັບຂອງການຮ່ວມມືແມ່ນ້ຳຂອງ-ສ.ເກົາຫລີ, ເພາະເປັນປີ ທີ່ຈະຕ້ອງໄດ້ສະຫລຸບຕີລາຄາຄືນການຈັດຕັ້ງປະຕິບັດແຜນປະຕິບັດງານແມ່ນ້ຳຂອງ-ສ.ເກົາຫລີ 2014-2017 ແລະ ຮ່າງແຜນປະຕິບັດງານສະບັບໃຫມ່ສໍາລັບສົກປີ 2017-2020 ເພື່ອຈະເປັນບ່ອນອີງໃນການສືບຕໍ່ເສີມຂະຫຍາຍການຮ່ວມມືລະຫວ່າງປະເທດແມ່ນໍ້າຂອງ ແລະ ສ.ເກົາຫລີ ນັບມື້ນັບມີຜົນ ແລະ ກວ້າງຂວາງໃຫ້ຍິ່ງຂຶ້ນກວ່າເກົ່າ.

ກອງປະຊຸມຄັ້ງນີ້ໄດ້ ທົບທວນຄວາມຄືບໜ້າຂອງການຈັດຕັ້ງປະຕິບັດ ຂອບການຮ່ວມມືແມ່ນ້ຳຂອງ-ສ.ເກົາຫລີ ໃນໄລຍະຜ່ານມາ ໂດຍສະເພາະການຜັນຂະຫຍາຍ ຖະແຫຼງການຂອງປະທານຮ່ວມກອງປະຊຸມລັດຖະມົນຕີຕ່າງປະເທດ ແມ່ນ້ຳຂອງ-ສ.ເກົາຫລີ ຄັ້ງທີ 6 ຮັບຮອງເອົາໃນປີ 2016 ແລະ ແຜນປະຕິບັດງານຂອບການຮ່ວມມືແມ່ນ້ຳຂອງ-ສ.ເກົາຫລີ ປີ 2014-2017 ພ້ອມທັງ ສະຫລຸບຕີລາຄາຄືນ ການຈັດຕັ້ງປະຕິບັດບັນດາໂຄງການບູລິມະສິດ ຈໍານວນ 11 ໂຄງການ ແລະ ປຶກສາຫາລື ກ່ຽວກັບທິດທາງການຮ່ວມມືໃນຕໍ່ໜ້າ ໂດຍສະເພາະການຮ່າງແຜນປະຕິບັດງານ ສະບັບໃໝ່ (ປີ 2017-2020) ເພື່ອກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນ້ຳຂອງ-ສ.ເກົາຫລີ ຄັ້ງທີ 7 ທີ່ ສປປ ລາວ ຈະເປັນປະທານຮ່ວມ ກັບ ສ.ເກົາຫລີ ທີ່ຈະຈັດຂຶ້ນໃນຕົ້ນເດືອນ ກັນຍາ 2017 ທີ່ ເມືອງປູຊານ, ສ.ເກົາຫລີ.

ກອງປະຊຸມ ໄດ້ສະແດງຄວາມຊົມເຊີຍ ສ. ເກົາຫລີ  ທີ່ໄດ້ປະກອບສ່ວນ ເຂົ້າໃນກອງທຶນເພື່ອການຮ່ວມມື ແມ່ນ້ຳຂອງ-ສ.ເກົາຫລີ ນັບແຕ່ປີ 2014-2016 ເປັນຈຳນວນເງິນ 2.3 ລ້ານໂດລາສະຫະລັດ ແລະ ຈະປະກອບສ່ວນເປັນຈຳນວນເງິນ 1 ລ້ານໂດລາສະຫະລັດ ຕໍ່ປີເພື່ອນໍາໃຊ້ເຂົ້າໃນການຈັດຕັ້ງປະຕິບັດ ໂຄງການບູລິມະສິດຕ່າງໆໃນ 6 ຂະແໜງການບູລິມະສິດ ຄື: ການພັດທະນາພື້ນຖານໂຄງລ່າງ, ເຕັກໂນໂລຊີຂໍ້ມູນຂ່າວສານ (ICT), ການພັດທະນາສີຂຽວ, ການພັດທະນາແຫລ່ງຊັບພະຍາກອນນ້ຳ, ດ້ານກະສິກໍາ ແລະ ການພັດທະນາຊົນນະບົດ, ແລະ ການພັດທະນາຊັບພະຍາກອນມະນຸດ.

ສໍາລັບການຊ່ວຍເຫລືອ ຂອງ ສ.ເກົາຫລີ ພາຍໃຕ້ ກອງທຶນຂອບການຮ່ວມມືແມ່ນ້ຳຂອງ-ສ.ເກົາ ຫລີ ໃນປີ 2016 ນັ້ນ, ສປປ ລາວ ກໍ່ໄດ້ຮັບການສະໜັບສະຫນູນເງິນທຶນໃນໂຄງການ: “ການພັດທະນາຖານຂໍ້ມູນ ນິຕິກຳຂອງຂະແໜງອຸດສາຫະກຳ ແລະ ການຄ້າ ເພື່ອເປັນການກະກຽມໃຫ້ການເຊື່ອມໂຍງ, ການຮ່ວມມືທາງດ້ານເສດຖະກິດ, ສະຖາບັນ ແລະ ການເປີດກວ້າງທາງດ້ານການຄ້າ’’ ຂອງກະຊວງອຸດສາຫະກຳ ແລະ ການຄ້າ ຊຶ່ງມີມູນຄ່າ 4 ແສນກວ່າ ໂດລາສະຫະລັດ; ແລະ ໃນສົກປີ 2017 ນີ້, ສປປ ລາວ ກໍ່ໄດ້ ນຳສົ່ງເອກະສານແນວຄວາມຄິດໂຄງການ ເພື່ອນຳໃຊ້ກອງທຶນດັ່ງກ່າວຕື່ມອີກ.