ເລວານດອບສະກີ ສ້າງສະຖິຕິຍິງແຮັດທຣິກໄວທີ່ສຸດໃນແຊ໊ມປຽນລີກ

ໂຣເບີດ ເລວານດອບສະກີ ກອງຫນ້າຈອມຖະຫລົ່ມປະຕູຂອງສະໂມສອນ ບາເຢິນ ມິວນິກ ຍັງໂຊຟອມເກັ່ງຕໍ່ເນື່ອງ ຫລັງສ້າງສະຖິຕິຍິງແຮັດທຣິກໄວທີ່ສຸດໃນການແຂ່ງຂັນຢູຟາ ແຊ໊ມປຽນລີກ ໃນເກມທີ່ ບາເຢິນ ມິວນິກ ເປີດສະຫນາມຖະຫລົ່ມ ຊັລບວກ 7-1.

ໂຣເບີດ ເລວານດອບສະກີ ດາວຍິງຕົວເກ່ັງຂອງ ບາເຢິນ ມິວນິກ ຍັກໃຫຍ່ແຫ່ງ ບຸນເດສ ລີກາ ເຢຍລະມັນ ສ້າງຊື່ສຽງອີກເທື່ອຫນຶ່ງ ເມື່ອສ້າງສະຖິຕິຍິງແຮັດທຣິກໄດ້ໄວທີ່ສຸດໃນປະຫວັດສາດ ຢູຟາ ແຊ໊ມປຽນລີກ ໂດຍໃຊ້ເວລາພຽງ 23 ນາທີ ນັບຕັ້ງແຕ່ເລີ່ມເກມໃນການແຂ່ງຂັນຮອບ 16 ທີມສຸດທ້າຍ ນັດ 2 ທີ່ ບາເຢິນ ມິວນິກ ເປີດບ້ານ ຖະຫລົ່ມ ຊັລບວກ ຈາກອອສເຕຣຍ 7-1 ຜ່ານເຂົ້າຮອບກ່ອນຮອງຊະນະເລີດດ້ວຍປະຕູລວມ 2 ນັດ 8-2.

ເກມນີ້ ເລວານດອບສະກີ ໃຊ້ເວລາພຽງ 10 ນາທີ ໃນການຍິງຄົນດຽວ 3 ປະຕູໃນນາທີທີ 12 (ລູກໂທດ),  ນາທີ 21 (ລູກໂທດ) ແລະ 23 ສົ່ງໃຫ້ ບາເຢິນ ຂຶ້ນນຳກ່ອນ 3-0 ກ່ອນທີ່ ແຊສ  ນາບຣີ, ໂທມັສ ມຸລເລີ ຍິງເພີ່ມ 2 ປະຕູ ແລະ ລີຣອຍ ຊາເນ ຈະມາຊ່ວຍກັນຍິງເພີ່ມອີກ 4 ປະຕູ ສົ່ງໃຫ້ ບາເຢິນ ມິວນິກ ຄວ້າໄຊເຫນືອ ຊັລບວກ ໄປຢ່າງຖະຫລົ່ມທະລາຍ 7-1.