ສະພາຄວາມໝັ້ນຄົງ ສປຊ ກ່າວປະນາມ ເຫດການໂຈມຕີດ້ວຍລະເບີດແບບສະຫລະຊີບ ທີ່ເກີດຂຶ້ນຢູ່ປາກິດສະຖານ
ວັນທີ 6 ມີນາ 2022, ສະພາຄວາມໝັ້ນຄົງອົງການສະຫະປະຊາຊາດ ໄດ້ອອກຖະແຫລງການກ່າວປະນາມເຫດການໂຈມຕີດ້ວຍລະເບີດແບບສະຫລະຊີບທີ່ເກີດຂຶ້ນຢູ່ປາກິດສະຖານໃນຫວ່າງມໍ່ໆມານີ້.
ຖະແຫລງການກ່າວວ່າ: ລັດທິກໍ່ການຮ້າຍທຸກຮູບແບບລ້ວນແຕ່ເປັນໜຶ່ງໃນໄພຂົ່ມຂູ່ທີ່ຮ້າຍແຮງທີ່ສຸດທີ່ມີຕໍ່ສັນຕິພາບ ແລະ ຄວາມໝັ້ນຄົງສາກົນ, ປະເທດຕ່າງໆຕ້ອງພະຍາຍາມສຸດຂີດເພື່ອສະກັດກັ້ນໄພຂົ່ມຂູ່ຈາກການເຄື່ອນໄຫວຂອງລັດທິກໍ່ການຮ້າຍທີ່ມີຕໍ່ສັນຕິພາບ ແລະ ຄວາມໝັ້ນຄົງໃນສາກົນ. ຕ້ອງລົງໂທດຜູ້ກະທຳຜິດ, ຜູ້ບົງການ, ຜູ້ໃຫ້ທຶນ ແລະ ຜູ້ສະໜັບສະໜູນການເຄື່ອນໄຫວລັດທິກໍ່ການຮ້າຍຕາມກົດໝາຍ.
ຖະແຫລງການໄດ້ຮຽກຮ້ອງໃຫ້ປະເທດຕ່າງໆຕັ້ງໜ້າດຳເນີນການຮ່ວມມືກັນກັບລັດຖະບານປາກິດສະຖານ ແລະ ຝ່າຍທີ່ກ່ຽວຂ້ອງອື່ນໆ ໂດຍອີງຕາມກົດໝາຍສາກົນ ແລະ ພັນທະທີ່ໄດ້ກຳນົດໄວ້ໃນມະຕິທີ່ກ່ຽວຂ້ອງຂອງສະພາຄວາມໝັ້ນຄົງອົງການສະຫະປະຊາຊາດ. ຖະແຫລງການຍັງໄດ້ສະແດງຄວາມເຫັນໃຈ ແລະ ສົ່ງຄວາມຢື້ຢາມຖາມຂ່າວຢ່າງຈິງໃຈທີ່ສຸດຕໍ່ຄອບຄົວຜູ້ປະສົບເຄາະຮ້າຍໃນເຫດການດັ່ງກ່າວ ກໍຄືລັດຖະບານປາກິດສະຖານ.
