ຈີນພົບຜູ້ຕິດເຊື້ອໂຄວິດ-19 ພາຍໃນປະເທດ ຫລາຍທີ່ສຸດໃນຮອບ 2 ປີ
ທາງການຈີນຢືນຢັນຜູ້ຕິດເຊື້ອໂຄວິດ-19 ຈາກການຕິດເຊື້ອພາຍໃນປະເທດ ເພີ່ມຂຶ້ນຫລາຍກວ່າ 200 ຄົນ ສູງສຸດໃນຮອບ 2 ປີ ໂດຍຕ້ອງຕິດຕາມກຸ່ມກ້ອນໂຮງຮຽນຢູ່ເມືອງຊິງເຕົ່າ.
ວັນທີ 7 ມີນາ 2022, ສຳນັກຂ່າວຕ່າງປະເທດລາຍງານວ່າ: ຄະນະກຳມາທິການສາທາລະນະສຸກແຫ່ງຊາດ (NHC) ລາຍງານສະຖິຕິຜູ້ຕິດເຊື້ອໂຄວິດ-19 ສະສົມໃນຈີນຢ່າງໜ້ອຍ 111.195 ຄົນ ເພີ່ມຂຶ້ນ 327 ຄົນ ແລະ ເສຍຊີວິດສະສົມຢ່າງໜ້ອຍ 4.636 ຄົນ ເປັນສະຖິຕິຄົງທີ່ນັບແຕ່ເດືອນມັງກອນປີຜ່ານມາ.
ສ່ວນຜູ້ຕິດເຊື້ອກຸ່ມຫລ້າສຸດນັ້ນ ແບ່ງເປັນຜູ້ຕິດເຊື້ອຈາກຕ່າງປະເທດ 113 ຄົນ ແລະ ຕິດເຊື້ອພາຍໃນປະເທດ 214 ຄົນ ເປັນສະຖິຕິແຕ່ລະວັນສູງສຸດໃນຮອບໄລຍະເວລາປະມານ 2 ປີ ສ່ວນຫລາຍຢູ່ມົນທົນກວາງຕຸ້ງ, ມົນທົນຈີ່ຫລິນ ແລະ ມົນທົນຊານຕົງ.
ທັງນີ້, ໂດຍສະເພາະເມືອງຊິງເຕົ່າ ເຊິ່ງເປັນໜຶ່ງໃນເມືອງໃຫຍ່ຂອງມົນທົນຊານຕົງ ກວດພົບການຕິດເກີດກຸ່ມກ້ອນ ຢູ່ໂຮງຮຽນມັດທະຍົມຕອນຕົ້ນແຫ່ງໜຶ່ງ ໂດຍເທສະບານເມືອງຊິງເຕົ່າຢືນຢັນຜູ້ຕິດເຊື້ອໃໝ່ ສະເພາະວັນທີ 6 ມີນາຜ່ານມາ 88 ຄົນ ທັງໝົດຕິດເຊື້ອໂອມິຄຣອນ.
