ຊ່ວງອາຍຸຂອງຄົນໄວເຮັດວຽກ ຈັດສັນການເງິນແນວໃດຈຶ່ງດີ
ໄວເຮັດວຽກຖືເປັນຊ່ວງອາຍຸທີ່ຫລາຍຄົນມັກຈະປະສົບຄວາມສຳເລັດໃນຊີວິດ ທັງເລື່ອງໜ້າທີ່ວຽກງານ, ການເງິນ ແລະ ຊີວິດຄອບຄົວ, ແຕ່ເລື່ອງທີ່ຄວນໃຫ້ຄວາມສຳຄັນ ແລະ ບໍ່ຄວນຖືເບົາກໍແມ່ນ ການຈັດສັນເລື່ອງການເງິນໃນຊ່ວງອາຍຸຕ່າງໆ ເຊິ່ງມື້ນີ້ພວກເຮົາກໍມີຄຳແນະນຳທີ່ໜ້າສົນໃຈມາຝາກບັນດາທ່ານດັ່ງນີ້ :
- ອາຍຸ 25 ປິ ຕ້ອງເລີ່ມມີວິໄນໃນການທ້ອນ :
– ຊ່ວງອາຍຸນີ້ສຳຄັນແນວໃດ : ໄວໜຸ່ມທີ່ຫາກໍຈົບການສຶກສາມາ ມັກມີບັນຫາການທ້ອນເງິນບໍ່ຄ່ອຍໄດ້ ຈຶ່ງຕ້ອງມີວິໄນ ແລະ ໃຫ້ສັນຍາກັບຕົນເອງວ່າຈະຕ້ອງທ້ອນເງິນໃຫ້ໄດ້.
– ຄວນເຮັດແນວໃດ : ຕັ້ງເປົ້າທ້ອນເງິນໃຫ້ໄດ້ຢ່າງໜ້ອຍ 10% ຂອງເງິນລາຍຮັບທີ່ໄດ້ໃນແຕ່ລະເດືອນ.
- ອາຍຸ 45 ປີ ຕ້ອງທ້ອນເງິນໃຫ້ຫລາຍຂຶ້ນ :
– ຊ່ວງອາຍຸນີ້ສຳຄັນແນວໃດ : ເປັນໄວທີ່ເງິນລາຍຮັບຢູ່ໃນຊ່ວງເກືອບສູງສຸດຂອງຊີວິດຄົນເຮັດວຽກ ຈຶ່ງມີຄວາມສາມາດໃນການທ້ອນເງິນໄດ້ຫລາຍ.
– ຄວນເຮັດແນວໃດ : ໃຫ້ລອງຄຳນວນເບິ່ງວ່າເມື່ອເຖິງໄວກະສຽນເຮົາຈະຕ້ອງມີເງິນຫລາຍປານໃດເພື່ອຊ່ວຍແຮງຈູງໃຈໃນການເພີ່ມຈຳນວນເງິນທ້ອນໃຫ້ຫລາຍຂຶ້ນ.
- ອາຍຸ 60 ປີ ໃຫ້ຄວາມສຳຄັນກັບເລື່ອງກອງທຶນປະກັນສັງຄົມ :
– ຊ່ວງອາຍຸນີ້ສຳຄັນແນວໃດ : ເປັນໄວທີ່ຈະໄດ້ເງິນບຳເໜັດ ຫລື ບຳນານຈາກອົງການປະກັນສັງຄົມແລ້ວ.
– ຄວນເຮັດແນວໃດ : ເອົາເງິນທີ່ໄດ້ຈາກອົງການປະກັນສັງຄົມໄປເພີ່ມມູນຄ່າໃຫ້ອອກໝາກຜົນຫລາຍຂຶ້ນ ແທນການຝາກທະນາຄານໄວ້ ໂດຍອາດຈະເອົາໄປລົງທຶນຫຸ້ນ ຫລື ທຸລະກິດໃດໜຶ່ງ ຂຶ້ນກັບວ່າຮັບຄວາມສ່ຽງໄດ້ຫລາຍໜ້ອຍປານໃດ ເປັນຕົ້ນ.
