ສະພາຄວາມໝັ້ນຄົງ ສປຊ ລົງມະຕິເປັນເອກະພາບ ຂວ້ຳບາດ ສປປ ເກົາຫລີ ໜັກຂຶ້ນ
ວັນທີ 6 ສິງຫານີ້, ສະພາຄວາມໝັ້ນຄົງແຫ່ງສະຫະປະຊາຊາດລົງມະຕິເປັນເອກະພາບຕາມຂໍ້ສະເໜີຂອງອາເມລິກາທີ່ຈະລົງໂທດ ສປປ ເກົາຫລີ ໃຫ້ໜັກຂຶ້ນ ໂດຍຫ້າມນຳເຂົ້າສິນຄ້າສົ່ງອອກຈາກ ສປປ ເກົາຫລີ ເພື່ອຫວັງຫລຸດລາຍຮັບຕໍ່ປີຈາກສິນຄ້າສົ່ງອອກ ສປປ ເກົາຫລີ 1.000 ລ້ານໂດລາສະຫະລັດ.
ມາດຕະການດັ່ງກ່າວບັງຄັບໃຊ້ກັບ ສປປ ເກົາຫລີ ເປັນເທື່ອທຳອິດນັບແຕ່ປະທານາທິບໍດີ ໂດນັນ ທຣຳ ຜູ້ນຳອາເມລິກາເຂົ້າຮັບຕຳແໜ່ງ ແລະ ເປັນການເນັ້ນວ່າ: ຈີນຕ້ອງການທີ່ຈະລົງໂທດ ສປປ ເກົາຫລີ ເຊິ່ງເປັນພັນທະມິດນຳເຊັ່ນກັນ. ມາດຕະການຊຸດດັ່ງກ່າວຈະຫ້າມການນຳເຂົ້າສິນຄ້າສົ່ງອອກຈາກ ສປປ ເກົາຫລີ ທັງໝົດ ໄດ້ແກ່ຖ່ານຫີນ, ເຫລັກ, ແຮ່ເຫລັກ, ຕາກົ່ວ, ແຮ່ຕາກົ່ວ ລວມທັງປາ ແລະ ອາຫານທະເລ, ຫ້າມຈ້າງແຮງງານໃໝ່ ແລະ ການລົງທຶນຈາກ ສປປ ເກົາຫລີ ເພີ່ມ ໂດຍຄາດວ່າຈະຫລຸດລາຍຮັບຈາກການສົ່ງອອກເຖິງສອງໃນສາມຂອງ ສປປ ເກົາຫລີ ເຊິ່ງຄາດວ່າມີປະມານ 3.000 ລ້ານໂດລາສະຫະລັດໃນແຕ່ລະປີ. ທ່ານນາງ ນິກກີ ແຮລີ ເອກອັກຄະລັດຖະທູດອາເມລິກາ ກ່າວໃນສະພາຄວາມໝັ້ນຄົງວ່າ: ມາດຕະການທີ່ເຂັ້ມງວດຂຶ້ນເພື່ອຍົກລະດັບການລົງໂທດ ສປປ ເກົາຫລີ ແລະ ເປັນສັນຍານເຕືອນໄປເຖິງທ່ານ ກິມ ຈອງອິນ ຜູ້ນຳ ສປປ ເກົາຫລີ.
