ຟຣັ່ງ ຮຽກຮ້ອງໃຫ້ ຟີຟ່າ ຕັດ ຣັດເຊຍ ອອກຈາກການແຂ່ງຂັນບານໂລກ
ທ່ານ ໂນແອລ ເລິ ແກຣັດ ປະທານສະຫະພັນບານເຕະຝຣັ່ງ ໄດ້ຮຽກຮ້ອງໄປເຖິງ ສະຫະພັນບານເຕະນາໆຊາດ (ຟີຟ່າ) ໃຫ້ຂັບໄລ່ ຣັດເຊຍ ອອກຈາກການແຂ່ງຂັນບານເຕະໂລກ 2022 ຍ້ອນກໍລະນີການບຸກໂຈມຕີ ຢູເຄຣນ ເຊິ່ງໄດ້ມີການປະທ້ວງໄປທົ່ວໂລກ.
ຈາກສະຖານະການທີ່ເຄັ່ງຕຶງທີ່ເກີດຂຶ້ນໂດຍ ຣັດເຊຍ ໄດ້ຕັດສິນໃຈໂຈມຕີ ຢູເຄຣນ ໃນທ່າມກາງຄວາມບໍ່ລົງລອຍກັນຫຼາຍຢ່າງ ດັ່ງນັ້ນ ວົງການກິລາ, ລວມທັງບານເຕະ, ໄດ້ສະແດງຈຸດຢືນຕໍ່ຕ້ານສົງຄາມເຊັ່ນດຽວກັນ ແລະ ທີ່ສຳຄັນທີ່ສຸດແມ່ນ ໂປແລນ, ສາທາລະນະລັດເຊັກ ແລະ ສະວີເດັນ ໄດ້ອອກມາປະກາດຢ່າງຊັດເຈນວ່າຈະບໍ່ຂໍລົງຫຼິ້ນກັບ ໝີຂາວ ໃນຮອບ ເພລ-ອັອບ ບານເຕະໂລກໃນເດືອນໜ້າ ໂດຍທີ່ ໂປແລນ ມີຄິວພົບກັບ ຣັດເຊຍ ໃນວັນທີ 24 ມີນານີ້ ເພື່ອຊອກຫາທີມຊະນະທີ່ຈະໄປພົບກັບ ສວີເດນ ຫຼື ສາທາລະນະລັດເຊັກ ເພື່ອຄວ້າປີ້ໄປຫຼິ້ນຮອບສຸດທ້າຍບານເຕະໂລກ.
ຈົນລ່າສຸດ ວັນທີ 27 ກຸມພາ ທ່ານ ເລິ ແກຣັດ ໄດ້ສະເໜີຄວາມຄິດໃຫ້ຟີຟ່າຫ້າມ ຣັດເຊຍ ເຂົ້າຮ່ວມການແຂ່ງຂັນບານເຕະໂລກເພື່ອຕອບໂຕ້ການໂຈມຕີຢູເຄຣນ.
“ມັນເປັນສິ່ງທີ່ຂ້ອຍຍັງບໍ່ໄດ້ປຶກສາຫາລືກັບສະຫະພັນບານເຕະອື່ນໆເທື່ອ, ຂ້າພະເຈົ້າຢາກໃຫ້ ຣັດເຊຍ ຖືກຂັບໄລ່ອອກຈາກບານເຕະໂລກ ມັນແມ່ນຄວາມຄິດເຫັນຂອງຂ້ອຍ” ເຂົາໄດ້ບອກກັບສື່ມວນຊົນທ້ອງຖິ່ນ
“ປົກກະຕິແລ້ວຂ້ອຍເຊື່ອວ່າກິລາສາມາດຫຼຸດຜ່ອນຄວາມກົດດັນໄດ້ ແຕ່ເວລານີ້ມັນຫຼາຍເກີນໄປໃນວົງການກິລາ ໂດຍສະເພາະບານເຕະ ພວກເຮົາບໍ່ສາມາດວາງໂຕເປັນກາງໄດ້ອີກຕໍ່ໄປ, ຂ້າພະເຈົ້າຈະບໍ່ຂໍຄັດຄ້ານຖ້າ ຣັດເຊຍ ຖືກຂັບໄລ່ອອກຈາກບານເຕະໂລກ.
