ສ.ສ ອັງກິດຮຽກຮ້ອງໃຫ້ແບນ ໂຣມັນ ອັຟບຣາໂມວິສ ອອກຈາກການເປັນເຈົ້າຂອງທີມເຊວຊີ
ສະມາຊິກສະພາພັກຝ່າຍຄ້ານອັງກິດ ຮຽກຮ້ອງໃຫ້ມີການຫ້າມນັກທຸລະກິດຣັດເຊຍບໍ່ໃຫ້ເປັນເຈົ້າຂອງທີມສິງໂຕນ້ຳເງິນ ລວມທັງຍຶດເຮືອນໃນອັງກິດ
“ຄຣິສ ໄບຣອັນ” ສະມາຊິກພັກແຮງງານ ຊຶ່ງເປັນພັກຝ່າຍຄ້ານຂອງສະຫະລາຊະອານາຈັກ ຮຽກຮ້ອງໃຫ້ມີມາດຕະການຫ້າມ ໂຣມັນ ອັຟບຣາໂມວິສ ຈາກການເປັນເຈົ້າຂອງທີມ ເຊວຊີ ລວມເຖິງຍຶດເຮືອນ 152 ລ້ານປອນ ໃນປະເທດອັງກິດ.
ກ່ອນໜ້ານີ້ ນັກທຸລະກິດຊາວຣັດເຊຍ ໄດ້ຖືກລັດຖະບານອັງກິດຫ້າມບໍ່ໃຫ້ເຂົ້າປະເທດມາແລ້ວໃນປີ 2018 ຍ້ອນມີບັນຫາກ່ຽວກັບວີຊາສັນຊາດຣັດເຊຍ ຈາກຂໍ້ຂັດແຍ່ງກ່ຽວກັບການປະກອບອາຊີບລະຫວ່າງອັງກິດ ແລະ ຣັດເຊຍ ແຕ່ຫຼັງຈາກນັ້ນໃນເດືອນຕຸລາ 2021 ລາວສາມາດເດີນທາງເຂົ້າປະເທດອັງກິດໄດ້ອີກຄັ້ງ ຫຼັງຈາກໄດ້ຮັບວີຊ່າໃນຖານະເປັນພົນລະເມືອງ ອິດສະລາເອວ ຈາກການມີເຊື້ອສາຍຢິວ
ຈົນລ່າສຸດ ຣັດເຊຍກຳລັງຖືກຕຳໜິຕິຕຽນຢ່າງໜັກໜ່ວງຈາກທົ່ວໂລກ ຫຼັງຈາກທີ່ຜູ້ນໍາຂອງປະເທດ ວະລາດິເມຍ ປູຕິນ ໄດ້ສັ່ງໃຫ້ກອງທັບບຸກໂຈມຕີ ຢູເຄຣນ ຊຶ່ງເຮັດໃຫ້ຊີວິດຂອງຜູ້ບໍລິສຸດຫຼາຍຄົນຕົກຢູ່ໃນອັນຕະລາຍ
ຍ້ອນເຫດນີ້ ຈຶ່ງສົ່ງຜົນໃຫ້ຫຼາຍພາກສ່ວນຢູ່ຫຼາຍປະເທດ ເລີ່ມມີການປະກາດຄວໍ່າບາດທຸກສິ່ງທຸກຢ່າງທີ່ກ່ຽວກັບຣັດເຊຍແລ້ວ ບໍ່ເວັ້ນແມ່ນແຕ່ວົງການບານເຕະ, ເຊິ່ງສະມາຊິກພັກແຮງງານອັງກິດ ຄຣິສ ໄບຣອັນ ຮຽກຮ້ອງໃຫ້ມີການສັ່ງຫ້າມເຈົ້າຂອງ ເຊວຊີ ລວມທັງການຍຶດເຮືອນ 152 ລ້ານປອນ ໃນປະເທດອັງກິດອີກດ້ວຍ ເນື່ອງຈາກເຊື່ອວ່າ ໂຣມັນ ອັຟບຣາໂມວິສ ມີສ່ວນກ່ຽວຂ້ອງກັບລັດຖະບານຣັດເຊຍ.
ສະມາຊິກສະພາແຮງງານ ຄຣິສ ໄບຣອັນ ກ່າວວ່າ “ທ່ານ ອັຟບຣາໂມວິສ ບໍ່ຄວນເປັນເຈົ້າຂອງສະໂມສອນບານເຕະໃນປະເທດນີ້ອີກຕໍ່ໄປ? ເຮົາຄວນກວດສອບການຍຶດຊັບສິນຂອງລາວຈໍານວນຫນຶ່ງ ລວມທັງເຮືອນທີ່ມີມູນຄ່າ 152 ລ້ານປອນ ແລະ ກວດສອບໃຫ້ແນ່ໃຈວ່າຄົນອື່ນໆທີ່ມີວີຊາຊັ້ນ 1 ແບບນີ້ບໍ່ມີສ່ວນຮ່ວມໃນກິດຈະກໍາທີ່ເປັນອັນຕະລາຍໃນອັງກິດ”
“Mr Abramovich should no longer be able to own a football club in this country? We should be looking at seizing some of his assets including his 152 million pound home and make sure that other people that have Tier 1 visas like this are not engaged in malign activity in the UK.” pic.twitter.com/yFnWQ8eOG8
— Chris Bryant (@RhonddaBryant) February 24, 2022
ທັງນີ້ ອັຟບຣາໂມວິສ ໄດ້ເຂົ້າມາຄອບຄອງເປັນເຈົ້າຂອງ ເຊວຊີ ຕັ້ງແຕ່ປີ 2003 ແລະ ເປັນສ່ວນສຳຄັນໃນການຍົກລະດັບສະໂມສອນໃຫ້ກາຍເປັນຍັກໃຫຍ່ແຫ່ງວົງການບານເຕະໃນປະຈຸບັນ ລວມທັງຍັງສ້າງສະຖິຕິໄດ້ແຊັມທຸກລາຍການທີ່ເຂົ້າຮ່ວມແຂ່ງຂັນ.
