ຄາດວ່າລາຄານໍ້າມັນເຊື້ອໄຟໃນລາວຈະສູງຂຶ້ນສູງສຸດໃນຮອບ8ປີ, ຍ້ອນການເໜັງຕີງຂອງລາຄານໍ້າມັນຕະຫລາດໂລກ

ກົມການຄ້າພາຍໃນ ກະຊວງອຸດສາຫະກຳ ຊີ້ແຈງວ່າ: ການປັບຂຶ້ນລາຄານໍ້າມັນພາຍໃນປະເທດໃນວັນທີ 24 ກຸມພາ 2022 ນັ້ນເປັນຜົນມາຈາກ ນ້ໍາມັນເຊື້ອໄຟທີ່ຊົມໃຊ້ພາຍໃນປະເທດ ນໍາເຂົ້າຈາກໄທ ແລະ ສ ສ ຫວຽດນາມ ເປັນຕົ້ນຕໍ ແລະ ລາຄາ ໄດ້ກໍານົດຕາມການເໜັງຕີງຂຶ້ນ-ລົງຂອງລາຄາໃນຕະຫລາດໂລກແຕ່ລະໄລຍະ ເຊິ່ງພາຍໃນປະເທດ ໄດ້ປັບລາຄານ້ໍາມັນເຊື້ອໄຟທຸກໆ 15 ວັນ.

ມາຮອດປັດຈຸບັນ, ການເໜັງຕີງລາຄານ້ໍາມັນເຊື້ອໄຟ ເວົ້າສະເພາະຢູ່ຕະຫລາດສິງກະໂປ ຍັງປັບຂຶ້ນຕໍ່ເນື່ອງ ໂດຍສົມທຽບລາຄາ CIF ວັນທີ 22 ກຸມພາ 2002 (ສະເລ່ຍ ວັນທີ 8- 22 ກຸມພາ 2022) ກັບ ລາຄາ CIF ປະຕິບັດວັນທີ 12 ກຸມພາ 2022 ໃນໂຄງປະກອບລາຄານ້ໍາມັນເຊື້ອໄຟ ຄື:

1) ພາສີ
2) ອາກອນຊົມໃຊ້ (ອກຊ)
3) ອາກອນມູນຄ່າເພີ່ມ (ອມພ) ສະບັບປັບປຸງໃໝ່
4) ກອງທຶນບູລະນະທາງຫລວງ (ກທ ທາງ)
5) ຄັງແຮ
6) ລາຍຮັບ-ລາຍຈ່າຍຂອງພາກທຸລະກິດ (ຄ່າບໍລິການ)

ເຮັດໃຫ້ລາຄາຂາຍຍ່ອຍນ້ໍາມັນແອັດຊັງພິເສດ ປັບຂຶ້ນ 740 ກີບ/ລິດ, ນ້ໍາມັນແອັດຊັງທໍາມະດາ ປັບຂຶ້ນ 670 ກີບ/ລິດ ແລະ ນ້ໍາມັນກາຊວນ ປັບຂຶ້ນ 400 ກີບລິດ.
ການທີ່ລາຄານ້ໍາມັນເຊື້ອໄຟສໍາເລັດຮູບ ເໜັງຕີງຂຶ້ນສູງນັ້ນ ມາຈາກປັດໄຈ
1)ຄວາມບໍ່ເອກະພາບໃນການຜະລິດຂອງກຸ່ມປະເທດຜະລິດນ້ໍາມັນ ໂດຍສະເພາະ ກຸ່ມ OPEC ແລະ ບັນດາປະເທດຜູ້ຜະລິດນ້ໍາມັນ (ລາຍໃຫຍ່),
2)ບັນຫາຄວາມຂັດແຍ່ງກັນຂອງຫລາຍປະເທດ ເຊິ່ງມີຄວາມເປັນໄປໄດ້ທີ່ລາຄານ້ໍາມັນໃນຕະຫລາດໂລກ ຍັງຈະສືບຕໍ່ປ່ຽນແປງຂຶ້ນໃນອັດຕາສູງສຸດຮອບ 8 ປີ.

ນັບແຕ່ຕົ້ນປີ 2022 ເປັນຕົ້ນມາ, ລາຄານ້ໍາມັນເຊື້ອໄຟ ໃນຕະຫລາດໂລກ ເໜັງຕີງສູງຂຶ້ນ ຖ້າທຽບໃສ່ປີຜ່ານມາ, ດັ່ງນັ້ນ, ພາກລັດ ຈຶ່ງພ້ອມກັນຄົ້ນຄວ້າວິທີການແກ້ໄຂ ໂດຍນັບແຕ່ຕົ້ນປີ 2022 ເປັນຕົ້ນມາ ໄດ້ຫລຸດອາກອນມູນຄ່າເພີ່ມ (ອມພ) ລົງເຫລືອ 7% ຈາກ 10% ແລະ ໄດ້ຫລຸດຄັງແຮນ້ໍາມັນເຊື້ອໄຟ ທຸກຊະນິດລົງເປັນແຕ່ລະໄລຍະ ແລະ ມາຮອດປັດຈຸບັນ, ຄັງແຮນ້ໍາມັນເຊື້ອໄຟທຸກຊະນິດ ເຫລືອ 0 ກີບ/ລິດ ທັງນີ້ກໍເພື່ອບໍ່ໃຫ້ສົ່ງຜົນກະທົບຕໍ່ສະພາບເສດຖະກິດໂດຍລວມຂອງຊາດ ກໍຄືຕໍ່ການດໍາລົງຊີວິດປະຈໍາວັນຂອງສັງຄົມ, ການຂົນສົ່ງສິນຄ້າ, ອັດຕາເງິນເຟີ້, ຄ່າຄອງຊີບຫລາຍເກີນໄປ.

ແນວໃດກໍດີເນື່ອງຈາກປັດຈຸບັນ ຄັງແຮນ້ໍາມັນເຊື້ອໄຟເຫລືອ 0 ກີບ/ລິດ, ການປັບລາຄານ້ໍາມັນເຊື້ອໄຟ ໃນວັນທີ 24 ກຸມພາ 2022 ນີ້ ຈຶ່ງຈໍາເປັນຕ້ອງປັບລາຄານ້ໍາມັນເຊື້ອໄຟທຸກຊະນິດຂຶ້ນ ຕາມການເໜັງຕີງຂອງຕະຫລາດ ເຊິ່ງຖ້າທຽບໃສ່ປະເທດໃກ້ຄຽງ ເຊັ່ນ: ສສ ຫວຽດນາມ ຫລື ໄທ ເຫັນວ່າ ເຂົາເຈົ້າເອງ ກໍໄດ້ປັບລາຄານ້ໍາມັນເຊື້ອໄຟຂຶ້ນຕາມການເໜັງຕີງຂອງຕະຫລາດ ໂດຍສະເພາະ ສສ ຫວຽດນາມ ໄດ້ປັບລາຄານ້ໍາມັນເຊື້ອໄຟ ທຸກໆ 15 ວັນ ແລະ ແຕ່ຕົ້ນປີ 2022 ປັບຂຶ້ນແລ້ວ 4 ເທື່ອ (ສະເພາະນ້ໍາມັນກາຊວນໄດ້ປັບຂຶ້ນ 660 ດົງ/ລິດ, 670 ດົງ/ລິດ, 960 ດົງ/ລິດ ແລະ 940 ດົງ/ລິດ ລວມ 4 ເທື່ອ 3.230 ດົງ/ລິດ ຫລື 1.680 ກີບ/ລິດ).

ຕໍ່ສະພາບດັ່ງກ່າວ ຈຶ່ງຮຽກຮ້ອງທະຫານ, ຕໍາຫລວດ, ພະນັກງານ ຕະຫລອດຮອດພໍ່ແມ່ປະຊາຊົນ ບັນ ດາເຜົ່າ ຈົ່ງມີສະຕິ, ປະຢັດມັດທະຍັດໃຊ້ຈ່າຍໃນສິ່ງທີ່ຈໍາເປັນ ໂດຍສະເພາະການຊົມໃຊ້ຍານພາຫະນະ ຫລື ຫັນໄປໃຊ້ຍານພາຫະນະທາງເລືອກ; ຂະນະດຽວກັນກໍຮຽກຮ້ອງບັນດາຜູ້ປະກອບການທຸລະກິດຕ່າງໆ ຈົ່ງຢ່າໄດ້ສວຍໂອກາດຂຶ້ນລາຄາສິນຄ້າຕາມລໍາພັງໃຈ ແລະ ກັກຕຸນສິນຄ້າ ກໍຄືນ້ໍາມັນເຊື້ອໄຟ ໃນໄລຍະລາຄານ້ໍາມັນເຊື້ອໄຟເໜັງຕີງຂຶ້ນ, ຫາກພົບເຫັນການສວຍໂອກາດຂຶ້ນລາຄາສິນຄ້າຈະໄດ້ໃຊ້ມາດຕະການຕາມກົດໝາຍ ແລະ ລະບຽບການ ແລະ ຫາກພົບເຫັນ ການສວຍໂອກາດຂຶ້ນລາຄາສິນຄ້າ ທ່ານສາມາດ ໂທແຈ້ງສາຍດ່ວນ 1510