ນາຍົກອັງກິດ ຮຽກຮ້ອງໃຫ້ ຢູຟາ ຖອດ ຣັສເຊຍ ອອກຈາກເຈົ້າພາບນັດຊີງ ຢູຟາ ແຊ໊ມປຽນລີກ
ທ່າມກາງກະແສກໍ່ສົງຄາມລະຫວ່າງ ຣັສເຊຍ ແລະ ຢູເຄຣນ ສົ່ງຜົນໃຫ້ໃນວົງການບານເຕະເລີ່ມມີການອອກມາຕໍ່ຕ້ານສົງຄາມ ແລະ ຮຽກຮ້ອງໃຫ້ຍົກເລີກການຈັດນັດຊີງຊະນະເລີດຂອງການແຂ່ງຂັນບານເຕະ ຢູຟາ ແຊ໊ມປຽນ ລີກ ໃນປີນີ້ເຊິ່ງຈະຈັດຂຶ້ນສະຫນາມ ເຄຣສຕອບສະກີ ຫລື ກາສພຣອມ ອາຣີນາ ໃນເມືອງເຊນປີເຕີສະເບີກ ປະເທດຣັສເຊຍ ໃນວັນທີ 28 ພຶດສະພານີ້.
ແນວໃດກໍຕາມ ຢູຟາ ໄດ້ອອກມາຖະແຫລງຢືນຢັນວ່າບໍ່ມີແຜນການທີ່ຈະປ່ຽນນັດຊີງຊະນະເລີດຂອງ ຢູຟາ ແຊ໊ມປຽນ ລີກ ໃນລະດູການນີ້ຢ່າງແນ່ນອນ ແຕ່ກໍມີແຜນສຳຮອງພ້ອມທີ່ຈະປ່ຽນເຈົ້າພາບນັດຊີງຊະນະເລີດໃນທັນທີ ຫາກມີເຫດການຮຸນແຮງ.
ທ່ານ ບໍໍຣິສ ຈອນສັນ ນາຍົກລັດຖະມົນຕີຂອງອັງກິດໄດ້ອອກມາຮຽກຮ້ອງໃຫ້ ສະຫະພັນບານເຕະຢູໂຣບ ຫລື EUFA ປ່ຽນແປງສະຫນາມຈັດການແຂ່ງຂັນຊີງຊະນະເລີດຂອງ ຢູຟາ ແຊ໊ມປຽນ ລີ ໃນປີນີ້ ເນື່ອງຈາກມີຄວາມເຫັນວ່າສະຖານະການໃນຕອນນີ້ບໍ່ປອດໄພໃນປະເທດແຖບນັ້ນ ແລະ ຄວນທີ່ຈະຫລິ້ນທີ່ສະຫນາມທີ່ປອດໄພກວ່ານີ້.
ມີລາຍງານເພີ່ມຕື່ມວ່າ ສະຫະພັນບານເຕະຢູໂຣບ ອາດພິຈາລະນາເລືອກ ເວມບຣີ ໃນນະຄອນລອນດອນ ປະເທດອັງກິດ ເປັນສັງວຽນແທນ ໂດຍສະເພາະຫາກໃນລະນີທີ່ມີ 2 ທີມຈາກອັງກິດໂຄຈອນມາຊີງກັນເອງຄືໃນລະດູການຜ່ານມາ.
ເຊິ່ງນັດຊີງປີກາຍກໍມີການປ່ຽນແປງສະຫນາມຈາກນະຄອນຫລວງອິສຕັນບູລ ປະເທດຕຣຸກີ ກໍຕ້ອງຍ້າຍມາຈັດທີ່ເມືອງປໍໂຕ ປະເທດໂປຣຕຸເກສ ແທນ ເນື່ອງຈາກສະຖານະການໂຄວິດ-19 ໃນຕຣຸກີເວລານັ້ນເປັນວິກິດ.
