ນຳ້ອຸ່ນ ກັບ ນຳ້ເຢັນ ດື່ມແບບໃດດີຕໍ່ຮ່າງກາຍຫລາຍກ່ວາກັນ ?

+ ການດື່ມນຳ້ເຢັນ : ນຳ້ເຢັນປະມານ 45 ອົງສາຟາເຣນໄຮ ເຖິງ 70 ອົງສາຟາເຣນໄຮ ເຮັດໃຫ້ເຮົາຮູ້ສຶກດີໂດຍສະເພາະໃນຍາມຮ້ອນ ຍິ່ງໃສ່ນຳ້ກ້ອນລົງໄປກໍຍິ່ງຮູ້ສຶກສົດຊື່ນຄາຍຮ້ອນໄດ້ດີຫລາຍ, ແຕ່ແນວໃດກໍຕາມ ໄດ້ມີການເປີດເຜີຍວ່າ ນຳ້ເຢັນນັ້ນທຳຮ້າຍເຮົາຫລາຍກ່ວາທີ່ຄິດ !

1. ຍ່ອຍອາຫານໄດ້ຍາກ : ເມື່ອທ່ານດື່ມນຳ້ເຢັນ ເສັ້ນເລືອດຈະຫົດໂຕ ເຮັດໃຫ້ລະບົບການຍ່ອຍອາຫານເຮັດວຽກໜັກຂຶ້ນ ໂດຍສະເພາະການດື່ມນຳ້ເຢັນຫລັງກິນເຂົ້າ ແລະ ອາດສົ່ງຜົນໃຫ້ທ່ານເຈັບທ້ອງ ແລະ ຖ່າຍຍາກ.
2. ຫລຸດຂີດຄວາມສາມາດຂອງສະໝອງ : ຄົນທີ່ດື່ມນຳ້ເຢັນໆໃນຍາມທີ່ຮ່າງກາຍບໍ່ໄດ້ເກີດຄວາມຮູ້ສຶກກະຫາຍນຳ້ນັ້ນ ຈະເຮັດໃຫ້ຂີດຄວາມສາມາດໃນການເຮັດວຽກຂອງສະໝອງຫລຸດລົງໄປທັນທີ ແລະ ເຮັດໃຫ້ຮ່າງກາຍຂອງທ່ານໃຊ້ພະລັງງານເພີ່ມຂຶ້ນ ເພື່ອໃຫ້ນຳ້ທີ່ດື່ມເຂົ້າໄປໄດ້ອຸນຫະພູມສະເລ່ຍຂອງຮ່າງກາຍ ນີ້ແມ່ນເຫດຜົນທີ່ທ່ານບໍ່ຄວນດື່ມນຳ້ເຢັນຈົນກ່ວາທ່ານຈະຮູ້ສຶກເມື່ອຍ ແລະ ບໍ່ສາມາດເຮັດວຽກປະຈຳວັນໄດ້.
3. ຊ່ວຍຫລຸດອັນຕາການເຕັ້ນຂອງຫົວໃຈ : ການດື່ມນຳ້ເຢັນອາດເຮັດໃຫ້ອັດຕາການເຕັ້ນຂອງຫົວໃຈຫລຸດລົງ ມັນກະຕຸ້ນເສັ້ນປະສາດ Vagus ເຊິ່ງເປັນສ່ວນສຳຄັນຂອງລະບົບປະສາດໃນຮ່າງກາຍ, ແຕ່ນຳ້ອຸ່ນຈະຊ່ວຍເຮັດໜ້າທີ່ເປັນໂຕກະຕຸ້ນເສັ້ນປະສາດ Vagus ເພື່ອຫລຸດອັດຕາການເຕັ້ນຂອງຫົວໃຈ ແລະ ອຸນຫະພູມອຸ່ນໆຂອງນຳ້ຈະຊ່ວຍຫລຸດອາການຕັນດັງ ແລະ ຫາຍໃຈບໍ່ສະດວກຂອງຄົນທີ່ເປັນພູມແພ້ໄດ້ດີຫລາຍ.
4. ສ້າງເມືອກໃນຮ່າງກາຍຂອງທ່ານ : ການດື່ມນຳ້ເຢັນເຮັດໃຫ້ເກີດເມືອກໃນຮ່າງກາຍຂອງທ່ານທີ່ຈະຂະຫຍາຍໂຕ, ລະບົບພູມຕ້ານທານຂອງຮ່າງກາຍເສື່ອມລົງ ແລະ ອາດນຳໄປສູ່ສະພາບທີ່ບໍ່ເພິງປະສົງຫລວງຫລາຍ ຕັ້ງແຕ່ເຮັດໃຫ້ນຳ້ມູກໄຫລໄປຈົນເຖິງຄວາມເຈັບປ່ວຍທີ່ຮ້າຍແຮງ.

+ ການດື່ມນຳ້ອຸ່ນ : ນຳ້ອຸ່ນແມ່ນອຸນຫະພູມ 80 ອົງສາຟາເຣນໄຮ ເຖິງ 106 ອົງສາຟາເຣນໄຮ ເຖິງວ່າມັນຈະບໍ່ຄ່ອຍຖືກກັບລີ້ນປານໃດ ແລະ ນີ້ແມ່ນປະໂຫຍດທີ່ຮ່າງກາຍຈະໄດ້ຮັບຈາກການດື່ມນຳ້ອຸ່ນ :

1. ລ້າງພິດໃນຮ່າງກາຍຂອງທ່ານ : ການດື່ມນຳ້ອຸ່ນ ໂດຍສະເພາະຢ່າງຍິ່ງໃນຕອນເຊົ້າ ຈະຊ່ວຍໃຫ້ທ່ານລ້າງສານພິດອອກຈາກຮ່າງກາຍຂອງທ່ານ ທີ່ອາດເຮັດໃຫ້ເກີດພະຍາດຕ່າງໆໄດ້ ເພື່ອໃຫ້ໄດ້ຜົນດີຍິ່ງຂຶ້ນ ໃຫ້ຢອດນຳ້ໝາກນາວລົງໄປໃນນຳ້ອຸ່ນໜ້ອຍໜຶ່ງ ເພື່ອເພີ່ມລົດຊາດກໍຍັງໄດ້ ເພາະວິຕາມິນ C ຈະຊ່ວຍຟຶ້ນຟູແຊນ ແລະ ໄລ່ສານພິດໃນຮ່າງກາຍຂອງທ່ານໄປພ້ອມໆກັນ.
2. ຕໍ່ສູ້ກັບຄວາມເຈັບປວດ : ນຳ້ອຸ່ນໄດ້ຮັບການພິສູດແລ້ວວ່າ ສາມາດຊ່ວຍຫລຸດອາການປວດທີ່ເກີດຈາກການມີປະຈຳເດືອນ ແລະ ອາການເຈັບຫົວ. ນຳ້ອຸ່ນຈະຊ່ວຍເພີ່ມການໄຫລວຽນເລືອດໃຫ້ດີຂຶ້ນ ຫລື ຫາກທ່ານມີອາການຂາປັ້ນ ທ່ານຄວນດື່ມນຳ້ອຸ່ນ ເພາະຈະຊ່ວຍໃຫ້ກ້າມຊີ້ນທີ່ຖືກບີບຮັດນັ້ນຜ່ອນຄາຍລົງ.
3. ຫລຸດລະດັບຄວາມເຄັ່ງຄຽດ : ບໍ່ແມ່ນແຕ່ການລົງໄປນອນແຊ່ໃນນຳ້ອຸ່ນເທົ່ານັ້ນ ຈະຊ່ວຍຫລຸດຄວາມເຄັ່ງຄຽດລົງໄດ້, ການດື່ມນຳ້ອຸ່ນຈັກຈອກເມື່ອຮູ້ສຶກເຄັ່ງຄຽດ ຈະຊ່ວຍໃຫ້ລະບົບປະສາດພາກສ່ວນກາງເຮັດວຽກຢ່າງມີປະສິດທິພາບ.
4. ຊ່ວຍຫລຸດນຳ້ໜັກ : ຜູ້ທີ່ກຳລັງຄວບຄຸມອາຫານຢ່າງເຂັ້ມງວດ ແລະ ອອກກຳລັງກາຍເພື່ອຫລຸດນຳ້ໜັກ ຄວນດື່ມນຳ້ອຸ່ນຫລາຍກ່ວານຳ້ເຢັນ ການຫລຸດນຳ້ໜັກຈຶ່ງຈະໄດ້ຜົນດີກ່ວາ. ນຳ້ອຸ່ນຊ່ວຍເພີ່ມອຸນຫະພູມບໍລິເວນກາງເລົາຄີງໃຫ້ສູງຂຶ້ນ ເຊິ່ງຊ່ວຍເພີ່ມອັດຕາການເຜົາຜານອາຫານ ເຮັດໃຫ້ຮ່າງກາຍເຜົາຜານກາລໍຣີໄດ້ຫລາຍຂຶ້ນ ແລະ ຍັງຊ່ວຍຫລຸດໄຂມັນໃນຮ່າງກາຍລົງໄດ້ນຳ.
5. ຊ່ວຍເພີ່ມການໄຫລວຽນເລືອດ : ນຳ້ອຸ່ນຊ່ວຍໃຫ້ການໄຫລວຽນຂອງເລືອດໄດ້ຢ່າງເປັນອິດສະຫລະ ເຮັດໃຫ້ເລືອດໄປລ້ຽງອະໄວຍະວະຕ່າງສະດວກຂຶ້ນ ນັ້ນໝາຍຄວາມວ່າຫາກເຮົາມີອາການປວດເມື່ອຍ ການດື່ມນຳ້ອຸ່ນຈະຊ່ວຍເພີ່ມເລືອດໄປລ້ຽງ, ຊ່ວຍຫລຸດອາການອ່ອນເພຍ ແລະ ຫລຸດອາການປວດໄດ້ເປັນຢ່າງດີ. ນອກຈາກນີ້ ຍັງຊ່ວຍເພີ່ມການໄຫລວຽນເລືອດໃນແຊນຜິວໜັງທົ່ວຮ່າງກາຍ ສົ່ງຜົນໃຫ້ເຮົາມີສຸຂະພາບຜິວທີ່ສົດໃສຂຶ້ນ.
6. ຊ່ວຍຍ່ອຍອາຫານ : ເພື່ອປັບປຸງການຍ່ອຍໃຫ້ດີຂຶ້ນ ລອງດື່ມນຳ້ອຸ່ນເປັນປະຈຳ ນຳ້ອຸ່ນຈະຊ່ວຍກະຕຸ້ນໃຫ້ຕ່ອມຍ່ອຍອາຫານເຮັດວຽກໄດ້ຢ່າງຖືກຕ້ອງ ຊ່ວຍຈັດການກັບອາຫານໃນກະເພາະ ດັ່ງນັ້ນ ລະບົບຍ່ອຍກໍຈະບໍ່ຕ້ອງເຮັດວຽກໜັກເກີນໄປ ທັງຍັງໃຊ້ພະລັງງານໃນຂະບວນການຍ່ອຍໜ້ອຍລົງນຳ, ແຕ່ທັງນີ້ກໍບໍ່ຄວນດື່ມນຳ້ທີ່ຮ້ອນຈົນເກີນໄປ ເພາະການດື່ມນຳ້ຮ້ອນອາດເປັນອັນຕະລາຍຕໍ່ເນື້ອເຍື່ອໃນປາກ ແລະ ຫລອດອາຫານໄດ້.
7. ຢຸດສະງັກກ່ອນໄວ : ຄວາມເຖົ້າແກ່ຊະລາກ່ອນອາຍຸເປັນໜຶ່ງໃນຝັນຮ້າຍທີ່ສຸດສຳລັບແມ່ຍິງ ການດື່ມນຳ້ອຸ່ນ 1 ຈອກໃນຕອນເຊົ້າ ສາມາດຫລຸດບັນຫາຜິວໜ້າໝອງຄຳ້ເສື່ອມໂຊມໄດ້ ເຊັ່ນ : ບັນຫາສິວ, ຮອຍຫ່ຽວຍານກ່ອນໄວ,​ ຈຸດດ່າງດຳ ທັງຍັງຊ່ວຍກະຕຸ້ນການສ້າງອີລາສຕິນໃຕ້ຊັ້ນຜິວໜັງຂອງເຮົານຳ ສາເຫດເປັນຍ້ອນນຳ້ອຸ່ນຊ່ວຍກະຕຸ້ນລະບົບໄຫລວຽນເລືອດ, ລະບົບຕ່ອມນຳ້ເຫລືອງໃຫ້ເຮັດວຽກເປັນປົກກະຕິ ແລະ ະລະບົບຮໍໂມນຕ່າງໆພາຍໃນຮ່າງກາຍຂອງເຮົາເຮັດວຽກເປັນປົກກະຕິຂຶ້ນ ເຮົາຈຶ່ງມີສຸຂະພາບຜິວທີ່ດີທັງຜິວໜ້າ ແລະ ຜິວກາຍ.