ໂຣນັລໂດ ກຽມສ້າງປະຫວັດສາດພຣີເມຍລີກ ຖ້າໄດ້ລົງສະຫນາມໃຫ້ແມນຢູ ປະທະ ລີດ ຢູໄນເຕັດ

ເວັບໄຊທາງການຂອງ ແມນເຊສເຕີ ຢູໄນເຕັດ ທີມອັນດັບ 4 ຂອງພຣີເມຍລີກ ອັງກິດ ເປີດເຜີຍສິ່ງທີ່ຫນ້າສົນໃຈກ່ອນເກມທີ່ຈະອອກໄປຢາມ ລີດ ຢູໄນເຕັດ ທີມອັນດັບ 15 ໃນວັນອາທິດທີ 20 ກຸມພານີ້ ເວລາ 21:00 (ເວລາໃນລາວ).

ເກມນີ້ຖ້າຫາກ ຄຣິສຕຽນໂນ ໂຣນັລໂດ ຍອດດາວຍິງທີມຊາດໂປຣຕຸເກສ ຖືກ ຣາຟ ຣັງນິກ ຜູ້ຈັດການທີມຊາວເຢຍລະມັນົສ່ງລົງສະຫນາມໃຫ້ ແມນຢູ ປະທະ ລີດ ຢູໄນເຕັດ ກໍຈະກາຍເປັນຜູ້ຫລິ້ນທີ່ໄດ້ພົບກັບຄູ່ແຂ່ງທີມດຽວກັນ ໂດຍມີໄລຍະຫ່າງຈາກຄັ້ງກ່ອນເປັນເວລາດົນທີ່ສຸດໃນປະຫວັດສາດຂອງ ພຣີເມຍລີກ ອັງກິດ.

ຄັ້ງຫລ້າສຸດທີ່ ໂຣນັລໂດ ລົງຫລິ້ນໃຫ້ ແມນຢູ ພົບ ລີດ ຢູໄນເຕັດ ໃນພຣີເມຍລີກ ເກີດຂຶ້ນເມື່ອວັນທີ 18 ຕຸລາ ປີ 2003 ໃນຍຸກທີ່ ເຊີ ອາເລັກ ເຟີກູສັນ ເປັນຜູ້ຈັດການທີມ ເຊິ່ງ ແມນຢູ ບຸກໄປຊະນະ 1-0 ທີ່ ເອລແລນ ໂຣດ ຈາກການຂຶ້ນຫົວຕຳປະຕູໄຊຂອງ ຣອຍ ຄີນ ແລະ ຫາກດາວເຕະອາຍຸ 37 ປີ ໄດ້ລົງສະຫນາມໃນວັນອາທິດນີ້ກໍຈະເຮັດສະຖິຕິດ້ວຍໄລຍະເວລາທີ່ຫ່າງຈາກຄັ້ງກ່ອນເຖິງ 18 ປີ 125 ວັນ.