ອິດສະລາແອນເປີດຜົນວິໄຈໃໝ່ ຊີ້ວັກຊີນໄຟເຊີມີປະສິດທິພາບ ປ້ອງກັນຕິດເຊື້ອໂຄວິດອີກ 82%
ອົງກອນດ້ານສຸຂະພາບຂອງອິດສະລາແອນເປີດເຜີຍຜົນການວິໄຈສະບັບໃໝ່ ພົບວ່າວັກຊີນປ້ອງກັນໂຄວິດ-19 ຂອງໄຟເຊີ ມີປະສິດທິພາບ 82% ໃນການປ້ອງກັນການຕິດເຊື້ອອີກ.
ວັນທີ 18 ກຸມພາ 2022, ຄາລິດ (Clalit) ອົງກອນດ້ານການເບິ່ງແຍງສຸຂະພາບໃຫຍ່ທີ່ສຸດຂອງອິດສະລາແອນ ເປີດເຜີຍຜົນວິໄຈໃໝ່ໃນວັນທີ 17 ກຸມພາ ບົ່ງຊີ້ວ່າ: ວັກຊີນປ້ອງກັນພະຍາດໂຄວິດ-19 ຂອງບໍລິສັດໄຟເຊີມີປະສິດທິພາບ 82% ໃນການປ້ອງກັນການຕິດເຊື້ອອີກໃນກຸ່ມຜູ້ທີ່ຫາຍດີຈາກພະຍາດໂຄວິດ-19 ທີ່ມີອາຍຸ 16-64 ປີ.
ນອກຈາກນີ້, ຜົນວິໄຈຍັງພົບວ່າ ວັກຊີນດັ່ງກ່າວມີປະສິດທິພາບ 60% ໃນກຸ່ມຜູ້ທີ່ຫາຍດີຈາກໂຄວິດ-19 ທີ່ມີອາຍຸນັບແຕ່ 65 ປີຂຶ້ນໄປ.
ສຳນັກຂ່າວຊິນຮົວລາຍງານວ່າ: ຜົນວິໄຈນີ້ ເຊິ່ງເຜີຍແຜ່ໃນວາລະສານການແພດນິວອິງແລນ (New England Journal of Medicine) ລະບຸວ່າ: ນັກວິໄຈຈາກອົງກອນຄາລິດ, ວິທະຍາໄລວິຊາການຊາເປຍ ແລະ ມະຫາວິທະຍາໄລເບນ ກູຣຽນ ໄດ້ຮ່ວມກັນກວດສອບປະສິດທິພາບຂອງວັກຊີນດັ່ງກ່າວໃນການປ້ອງກັນການຕິດເຊື້ອອີກໃນກຸ່ມຜູ້ປ່ວຍທີ່ຫາຍດີແລ້ວ.
ທັງນີ້, ຜົນຈາກການວິໄຈ ເຊິ່ງດຳເນີນການເກັບຂໍ້ມູນຈາກກຸ່ມຕົວຢ່າງຈຳນວນ 149.032 ຄົນ ກວດບໍ່ພົບຄວາມແຕກຕ່າງໃນດ້ານປະສິດທິພາບຂອງວັກຊີນໃນຜູ້ທີ່ເຄີຍຕິດເຊື້ອໂຄວິດ-19 ມາກ່ອນ ບໍ່ວ່າຈະໄດ້ຮັບວັກຊີນມາ 1 ໂດສ ຫລື 2 ໂດສກໍຕາມ.
ໂຣເນນ ອາເບລ ນັກວິໄຈອາວຸໂສຈາກວິທະຍາໄລວິຊາການຊາເປຍ ກ່າວວ່າ: “ການຫາຍດີຈາກພະຍາດໂຄວິດ-19 ປຽບເໝືອນການຮັບວັກຊີນເບື້ອງຕົ້ນ ສິ່ງທີ່ຄວນເຮັດທີ່ສຸດຄືການຮັບວັກຊີນ ເພື່ອກະຕຸ້ນພູມຕ້ານທານທີ່ເກີດຈາກການຕິດເຊື້ອ ແລະ ການສັກວັກຊີນເຂັມດຽວຖືວ່າພຽງພໍແລ້ວ”.
ອ້າງອີງ:
https://www.xinhuathai.com/high/264172_20220218
