ປກສ ເມືອງຫາດຊາຍຟອງ ຈັບຜູ້ຄ້າຂາຍຢາເສບຕິດ 2 ຄົນ ພ້ອມພ້ອມຂອງກາງ ຢາອີ ແລະ ຢາໄອສ໌

ພັທ ເກດສະໜາ ພິຈິດ ຫົວໜ້າພະແນກຕຳຫລວດ ກອງບັນຊາການ ປກສ ເມືອງຫາດຊາຍຟອງ ໃຫ້ຮູ້ວ່າ: ໃນວັນທີ 12 ກຸມພາ 2022, ເວລາປະມານ 13:15 ໂມງ ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ພະແນກຕຳຫລວດ ປກສ ເມືອງຫາດຊາຍຟອງ ໄດ້ເຂົ້າຈັບກຸມເປົ້າໝາຍທີ່ເຄື່ອນ ໄຫວຄ້າຂາຍຢາເສບຕິດຢູ່ບ້ານດົງໂພສີ ເມືອງຫາດຊາຍຟອງ  2 ຄົນ ຄື: ທ້າວ ອານຸພາບ ຫລື ຕ້າ ອາຍຸ 29 ປີ ຢູ່ບ້ານໜອງບອນ ເມືອງໄຊເສດຖາ ນວ ພ້ອມຂອງກາງຢາບ້າ ຈຳນວນ 4 ມັດ ເທົ່າກັບ 8.000 ເມັດ, ຢາໄອສ໌ 7 ຖົງນ້ອຍ, ໂທລະສັບ 1 ໜ່ວຍ ແລະ ລົດເກັງວີ ອອດສີຂາວ ໝາຍເລກທະບຽນ ນຄ 9444 ກຳແພງນະຄອນ ແລະ ທ້າວ ມານາຈິດ ຫລື ຕູ່ນີ່ ອາຍຸ 32 ປີ ຢູ່ບ້ານສາຍລົມ ເມືອງຈັນທະບູລີ ນະຄອນຫລວງວຽງ ຈັນ ພ້ອມຂອງກາງຢາໄອສ໌ 4 ຖົງນ້ອຍ, ຢາອີ 5 ເມັດ ແລະ ໂທລະສັບ 1 ໜ່ວຍ.

ຜ່ານການສອບສວນ ທ້າວ ຕ້າ ສາລະພາບວ່າ: ຜ່ານມາ, ໄດ້ຮ່ວມກັບ ທ້າວ ຕູ່ນີ່ ຄ້າຂາຍຢາເສບຕິດແທ້; ຢາບ້າທີ່ນໍາມາຂາຍແມ່ນໄດ້ໂທລະສັບສັ່ງຊື້ນໍາຄົນຢູ່ບ້ານໜອງບຶກ ເມືອງສີໂຄດຕະບອງ ນະຄອນຫລວງວຽງຈັນ ຈຳນວນ 4 ມັດ ເທົ່າກັບ 8.000 ກີບ; ພາຍຫລັງທີ່ໄດ້ຢາບ້າແລ້ວ ກໍນຳມາຂາຍໃຫ້ໄວລຸ້ນມົ້ວສຸມຢາເສບຢູ່ເຂດບ້ານດົງໂພສີ ເມືອງຫາດຊາຍຟອງ ນະຄອນຫລວງວຽງຈັນ.

ທ້າວ ຕູ່ນີ່ ສາລະພາບວ່າ: ຜ່ານມາ, ຜູ້ກ່ຽວເຄີຍຖືກດຳເນີນຄະດີມາແລ້ວ 1 ຄັ້ງ ໃນປີ 2016 ຢູ່ເມືອງສີສັດຕະນາກ ໃນຂໍ້ຫາຄ້າຂາຍຢາເສບຕິດ ປະເພດຢາບ້າ ຖືກສານຕັດອິດສະຫລະພາບຈຳຄຸກ 5 ປີ ກ່ອນຖືກປ່ອຍຕົວອອກໃນປີ 2020 ແລ້ວກັບມາຄ້າ-ຂາຍຢາບ້າຮ່ວມກັບ ທ້າວ ຕ້າ ກ່ອນຖືກເຈົ້າໜ້າ ທີ່ ປກສ ເມືອງຫາດຊາຍຟອງ ຈັບຕົວໄປດຳເນີນຄະດີ.

ປັດຈຸບັນ, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດພະແນກຕຳຫລວດ ປກສ ເມືອງຫາດຊາຍຟອງ ກຳລັງເລັ່ງສອບສວນຂາຍຫຍາຍຜົນ ເພື່ອຊອກຫາກຸ່ມແກ້ງຜູ້ຮ່ວມຂະບວນການດຽວກັນມາດໍາເນີນຄະດີຕໍ່ໄປ.

ຂໍ້ມູນ: ຄວາມສະຫງົບ