ໂຄງການຄຸ້ມຄອງປ່າໄມ້ບ້ານ ໄດ້ຮັບການສະໜັບສະໜູນຈາກ KFW 7,76 ລ້ານເອີໂຣ ແລະ ລັດຖະບານລາວຈຳນວນ 0,76 ລ້ານເອີໂຣ ໄລຍະເວລາ 7 ປີ (2019-2025)
ອີງຕາມການລາຍງານຂ່າວຂອງ ຂ່າວສານກະສິກຳ,ປ່າໄມ້ ແລະ ພັດທະນາ ຊົນນະບົດ ໃຫ້ຮູ້ວ່າ: ວັນທີ 14 ກຸມພາ 2022 ນີ້ ຄະນະຊີ້ນຳໂຄງການຄຸ້ມຄອງປ່າໄມ້ບ້ານ ໄດ້ຈັດກອງປະຊຸມຄັ້ງທີ II ຂຶ້ນເພື່ອລາຍງານສະພາບການເຄື່ອນໄຫວວຽກງານຂອງໂຄງງການ ໂດຍການເຂົ້າຮ່ວມຂອງທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂຄງການຄຸ້ມຄອງປ່າໄມ້ບ້ານ ເປັນໂຄງການໜຶ່ງທີ່ມີຄວາມສໍາຄັນໃນການສ້າງຄວາມເຂັ້ມແຂງໃຫ້ບ້ານເປັນເຈົ້າການຄຸ້ມຄອງ, ປົກປັກຮັກສາປ່າໄມ້ ແລະ ພັດທະນາປ່າໄມ້ໃນເຂດຄຸ້ມຄອງຂອງບ້ານ ໃຫ້ມີຄວາມອຸດົມສົມບູນຕາມທີ່ໄດ້ກໍານົດໄວ້ ໃນມາດຕາ 39 ຂອງກົດໝາຍວ່າດ້ວຍປ່າໄມ້ ສະບັບປັບປຸງໄລຍະເວລາຈັດຕັ້ງປະຕິບັດໂຄງການແມ່ນ 7 ປີ (2019-2025).
ເປົ້າໝາຍຈັດຕັ້ງປະຕິບັດຂອງໂຄງການແມ່ນກວມເອົາ 70 ບ້ານ ຂອງສອງເມືອງຄື: ເມືອງໂພນໄຊ, ແຂວງຫລວງພະບາງ ແລະ ເມືອງພຽງ ແຂວງ ໄຊຍະບູລີ ງົບປະມານລວມທັງໝົດແມ່ນ 7,76 ລ້ານຢູໂຣ ໃນນັ້ນ, ເງິນຊ່ວຍເຫລືອລ້າຈາກທະນາຄານເພື່ອການພັດທະນາປະເທດເຢຍລະມັນ (KfW) ຈໍານວນ 7 ລ້ານຢູໂຣ ແລະ ຈາກການປະກອບສ່ວນຂອງລັດຖະບານ ສປປ ລາວ ຈຳນວນ 0,76 ລ້ານຢູໂຣ.
ເປົ້າໝາຍ ແລະ ແຜນກິດຈະກໍາຫຼັກຂອງໂຄງການ ແມ່ນເລັ່ງໃສ່ວຽກງານຄຸ້ມຄອງປ່າໄມ້ຂັ້ນບ້ານ ຄຽງຄູ່ກັບການ ປັບປຸງຊີວິດການເປັນຢູ່ຂອງປະຊາຊົນ ໃນເຂດພື້ນທີ່ເປົ້າໝາຍຂອງໂຄງການ, ສ້າງຄວາມອາດສາມາດທາງດ້ານເຕັກນິກວິຊາການໃຫ້ແກ່ພະນັກງານຂັ້ນສູນກາງ, ແຂວງ, ເມືອງ ແລະ ຊາວບ້ານໃນການຄຸ້ມຄອງ, ປົກປັກຮັກ, ພັດທະນາປ່າໄມ້ ແລະ ນຳໃຊ້ປ່າໄມ້ ໃນຂອບເຂດປົກຄອງຂອງບ້ານ ໃຫ້ມີຄວາມຍືນຍົງ.
