ສານກິລາໂລກ ຕັດສິນໃຫ້ສາວ ສະເກັດໃຊ້ຢາ ເຮັດໃຫ້ຣັສເຊຍອາດໂອກາດໄດ້ຫລຽນຄຳໂອລິມປິກລະດູຫນາວ
ສານອະນຸຢາໂຕຕຸລາການກິລາ (CAS) ຕັດສິນໃຫ້ ຄາມິລາ ວາເລຍວາ ນັກກິລາສະເກັດນຳ້ກ້ອນສາວອາຍຸ 15 ຂອງທີມຄະນະກຳມະການໂອລິມປິກຣັສເຊຍ ຍັງສາມາດແຂ່ງຂັນຕໍ່ໄປໄດ້ໃນກິລາໂອລິມປິກຫນາວ 2022 ທີ່ນະຄອນປັກກິ່ງ ສາທາລະນະລັດ ປະຊາຊົນຈີນ ເຖິງວ່າຈະມີຜົນຢືນຢັນວ່າລາວກວດສານກະຕຸ້ນບໍ່ຜ່ານ ເຊິ່ງອອກມາຫລັງຈົບການແຂ່ງຂັນສະເກັດນຳ້ກ້ອນ ປະເພດທີມ ໂດຍທີ່ທີມຊາດຣັສເຊຍ ເຮັດຄະແນນເປັນອັນດັບ 1 ແຕ່ຍັງບໍ່ໄດ້ຮັບຫລຽນຄຳ.
ກ່ອນຫນ້ານີ້ ຄະນະກຳມະການໂອລິມປິກສາກົນ (IOC) ໄດ້ເລື່ອນພິທີມອບຫລຽນລາງວນສະເກັດນຳ້ກ້ອນປະເພດທີມໃນໂອລິມລະດູຫນາວ 2022 ແບບບໍ່ມີກຳນົດ ທັງທີ່ແຂ່ງຂັນຈົບຕັ້ງແຕ່ວັນຈັນທີ 7 ກຸມພາ ເຊິ່ງຄະນະກຳມະການໂອລິມປິກຣັສເຊຍ ຄວ້າໄຊເຫນືອ ສາທາລະນະລັດ ອາເມລິກາ ອັນດັບ 2 ແລະ ຍີ່ປຸ່ນ ອັນດັບ 3.
ສາເຫດເນື່ອງຈາກ ຄາມິລາ ວາເລຍວາ ນັກກິລາສາວດາວເດ່ັນຂອງທີມຣັສເຊຍ ຖືກຕຳຫລວດພົບວ່າມີການໃຊ້ຢາ ‘‘ ໄຕຣມີຕາຊີດນ ’’ ຈາກຕົວຢ່າງໃນປັດສະວະໃນການແຂ່ງຂັນຊີງແຊ໊ມຣັສເຊຍ ເມື່ອວັນທີ 25 ທັນວາປີກາຍ ເຊິ່ງຢາຕົວນີ້ຊ່ວຍໃນການປິ່ນປົວອາການເຈັບຫນ້າເອິກ ແຕ່ຢູ່ໃນບັນຊີສານຕ້ອງຫ້າມຂອງອົງການຕໍ່ຕ້ານການໃຊ້ສານກະຕຸ້ນໂລກ ຫລື ວາດາ ມາຕັ້ງງແຕ່ເດືອນມັງກອນ ປີ 2014 ເພາະມີຜົນຕໍ່ການເພີ່ມປະສິດທິພາບ ໂດຍສະເພາະໃນກິລາທີ່ຕ້ອງໃຊ້ຄວາມອົດທົນຂອງຮ່າງກາຍ.
ເລື່ອງທີ່ ຄາມິລາ ວາເລຍວາ ໃຊ້ສານຕ້ອງຫ້າມ ຖືກເປີດເຜີຍກ່ອນການມອບຫລຽນລາງວັນໃນວັນທີ 8 ກຸມພາ ເຮັດໃຫ້ ກຳມະການໂອລິມປິກທີ່ໄດ້ຮັບລາຍງານເລື່ອງນີ້ ຕັດສິນໃຈຢຸດພິທີມອບຫລຽນພ້ອມກັບລົງໂທດຫ້າມແຂ່ງຂັນຊົ່ວຄາວ ເນື່ອງຈາກເປັນນັກກິລາສະເກັດນຳ້ກ້ອນຍິງຄົນທຳອິດໃນປັກກິ່ງເກມ 2022 ທີ່ໃຊ້ທ່າໂດດຫມູນຕົວກາງອາກາດ 4 ຮອບໄດ້ສຳເລັດ ຈົນເຮັດໄດ້ເຖິງ 178,92 ຄະແນນ.
ສ່ວນອົງການຕໍ່ຕ້ານການໃຊ້ສານກະຕຸ້ນຂອງຣັສເຊຍ ໄດ້ຂໍອຸທອນໃຫ້ພັກໂທດຫ້າມແຂ່ງຂັນຕໍ່ຂອງລາວ ເພື່ອຊ່ວຍທີມຊາດຣັສເຊຍຫວັງຫລຽນຄຳຕໍ່ໄປລາຍການທີ່ເຫລືອ ແຕ່ ຄະນະກຳມະການໂອລິມປິກສາກົນ ກໍຍື່ນຄັດຄ້ານໄປຍັງສານກິລາໂລກ ເພື່ອຕັດສິນກໍລະນີນີ້ໂດຍເລ່ັງດ່ວນ ແລະ ໃຫ້ເກີດຄວາມຍຸດຕິທຳກັບຊາດອື່ນໆ ຂະນະທີ່ສຳນັກງານກວດສານຕ້ອງຫ້າມລະຫວ່າງປະເທດ (ໄອທີເອ- International Testing Agency ) ໄດ້ຢືນຢັນວ່າລາວມີຜົນກວດສານກະຕຸ້ນເປັນບວກໃນວັນທີ 11 ກຸມພາ.
