ອຢ ໄທ ເລັ່ງກວດສອບໄສ້ກອກອັນຕະລາຍ ຖ້າພົບສານກັນບູດເກີນປະລິມານທີ່ກຳນົດ ຈະມີໂທດໜັກ

ວັນທີ 13 ກຸມພາ 2022, ທ່ານ ວີລະໄຊ ນົນວະໄຊ ຮອງເລຂາທິການຄະນະກຳມະການອາຫານ ແລະ ຢາຂອງໄທ (ອຢ) ເປີດເຜີຍວ່າ: ຈາກຜົນການກວດສອບກໍລະນີມີຜູ້ປ່ວຍຈາກການຮັບປະທານໄສ້ກອກທີ່ຜະລິດຈາກໂຮງງານເຖື່ອນໃນແຂວງຊົນບະລີ ເຊິ່ງຜົນວິເຄາະຈາກຕົວຢ່າງໄສ້ກອກທີ່ຜູ້ປ່ວຍຮັບປະທານທັງ 4 ຕົວຢ່າງ ໄດ້ແກ່ ຍີ່ຫໍ້ລິດ, ຮອດດ໊ອກ, ລົມຄວັນ ແລະ ຟຸດລອງໄກ່ລົມຄວັນ ບໍ່ລະບຸຍີ່ຫໍ້ ພົບວ່າມີປະລິມານສານກັນບູດເກີນຈາກກົດໝາຍກຳນົດເຖິງ 35-48 ເທົ່າ ຈັດເປັນອາຫານບໍ່ບໍລິສຸດ ມີໂທດຕິດຄຸກບໍ່ເກີນ 2 ປີ ຫລື ປັບໄໝບໍ່ເກີນ 20.000 ບາດ ຫລື ທັງຈຳທັງປັບ, ປັດຈຸບັນຢູ່ລະຫວ່າງການດຳເນີນຄະດີ.

ຈາກຂໍ້ມູນເບື້ອງຕົ້ນ ອຢ ໄດ້ປະສານງານກັບສຳນັກງານສາທາລະນະສຸກແຂວງ (ສສຈ) ທົ່ວປະເທດໄທ ຮ່ວມເຝົ້າລະວັງໃນພື້ນທີ່ ໂດຍມີການກວດສອບສະຖານທີ່ຜະລິດ, ສະຖານທີ່ຈຳໜ່າຍ ແລະ ປະຊາສຳພັນແຈ້ງເຕືອນໄພໃຫ້ປະຊາຊົນຮູ້. ປັດຈຸບັນມີແຂວງທີ່ດຳເນີນການກວດເຝົ້າລະວັງສະຖານທີ່ຈຳໜ່າຍໃນທ້ອງຕະຫລາດສຳເລັດແລ້ວ 66 ແຂວງ ມີການສຸ່ມເກັບຕົວຢ່າງຜະລິດຕະພັນໄສ້ກອກທີ່ມີຄວາມສ່ຽງສົ່ງກວດວິເຄາະ 102 ຕົວຢ່າງ (ຢູ່ລະຫວ່າງຖ້າຜົນວິເຄາະ).

ມີການດຳເນີນຄະດີກໍລະນີຈຳໜ່າຍໄສ້ກອກທີ່ບໍ່ມີກາສະແດງ ຄືຢູ່ແຂວງສະລະບຸລີ, ອຸໄທທານີ ແລະ ພະນະຄອນສີອະຍຸດທະຍາ ເຊິ່ງກໍລະນີຂອງແຂວງສະລະບຸລີ ກວດພົບເປັນໄສ້ກອກທີ່ຮັບມາຈາກສະຖານທີ່ຜະລິດເຖື່ອນໃນແຂວງຊົນບຸລີ, ສ່ວນຂອງແຂວງອຸໄທທານີ ກວດສອບພົບມີສິນຄ້າທີ່ກາຄືກັບພົບໃນແຂວງພະນະຄອນສີອະຍຸດທະຍາ ເປັນເຫດໃຫ້ຂະຫຍາຍຜົນດຳເນີນການຈັບກຸມໂຮງງານລັກລອບຜະລິດໄສ້ກອກໂດຍບໍ່ຂໍອະນຸຍາດຢູ່ແຂວງພະນະຄອນສີອະຍຸດທະຍາອີກ 2 ແຫ່ງ ກໍລະນີນີ້ມີການອາຍັດສະຖານທີ່ ແລະ ຂອງກາງມູນຄ່າທັງໝົດ 4,3 ລ້ານກວ່າບາດ ໂດຍກວດຈັບ ແລະ ດຳເນີນຄະດີກັບຜະລິດຕະພັນອາຫານແປຮູບຈາກຊີ້ນສັດທີ່ບໍ່ມີ ອຢ ຈຳນວນ 13 ລາຍການຄື:

1. ຜະລິດຕະພັນອາຫານແປຮູບ ກາ ເຄນ ໝູຊີສ (ມີເປືອກ)
2. ຜະລິດຕະພັນອາຫານແປຮູບ KC ຄອກເທລລົມຄວັນໄກ່ (ມີເປືອກ)
3. ຜະລິດຕະພັນອາຫານແປຮູບ KC ຄອກເທລລົມຄວັນໝູ (ມີເປືອກ)
4. Super-Rich ໄສ້ກອກຊີສນົມ (ມີເປືອກ)
5. Super-Rich ຄອກເທລລົມຄວັນ (ມີເປືອກ)
6. Super-Zaab ໄສ້ກອກແຟຣງໄກ່ (ມີເປືອກ)
7. ເຄນຈິ ຟຸດລອງຊິສ (ມີເປືອກ)
8. ເຄນຈິ ຟຸດລອງລົມຄວັນໝູ (ມີເປືອກ)
9. ຜະລິດຕະພັນອາຫານແປຮູບ KC
10. KC ໝູຍໍອຸບົນ
11. ຜະລິດຕະພັນອາຫານແປຮູບ ກາ FC ຈຳໂບ້ຄລາສສິກ (ມີເປືອກ)
12. ຜະລິດຕະພັນອາຫານແປຮູບ ກາ ຣິຊ ໄສ້ກອກລົມຄວັນ (ມີເປືອກ)
13. ຜະລິດຕະພັນອາຫານແປຮູບ ໄສ້ກອກ ບໍ່ມີກາ

ນອກຈາກນີ້ ສສຈ ທຸກແຂວງຂອງໄທໄດ້ແຈ້ງເຕືອນໃຫ້ຜູ້ປະກອບການເພີ່ມຄວາມເຂັ້ມງວດໃນຂະບວນການຜະລິດ ໂດຍສະເພາະຂັ້ນຕອນການເພີ່ມວັດຖຸກັນເສຍ ແລະ ກໍລະນີສຳນັກງານອາຫານ ແລະ ຢາ FDA ກະຊວງສາທາລະນະສຸກມຽນມາ ໄດ້ເຕືອນປະຊາຊົນຫ້າມຮັບປະທານໄສ້ກອກຈາກປະເທດໄທ ຍີ່ຫໍ້ “ລິດ” ນັ້ນ, ອຢ ໄດ້ຂໍການຮ່ວມມືໃຫ້ສາທາທຸກແຂວງທີ່ຕິດຊາຍແດນເພີ່ມການເຝົ້າລະວັງແຫລ່ງຈຳໜ່າຍໃນຕະຫລາດຊາຍແດນ ແລະ ເພີ່ມການແຈ້ງເຕືອນໄພຜູ້ບໍລິໂພກໃຫ້ຄວບຄຸມຫລາຍຂຶ້ນ.

ຮອງເລຂາທິການຄະນະກຳມະການອາຫານ ແລະ ຢາຂອງໄທ ຍັງກ່າວອີກວ່າ: ຂໍເຕືອນໃຫ້ຜູ້ຜະລິດໄສ້ກອກຕ້ອງຂໍອະນຸຍາດສະຖານທີ່ຜະລິດໃຫ້ຖືກຕ້ອງ ເປັນໄປຕາມຄຸນນະພາບມາດຕະຖານ GMP ແລະ ຄຳນຶງເຖິງຄວາມປອດໄພຂອງຜູ້ບໍລິໂພກ, ສ່ວນຜູ້ບໍລິໂພກຄວນເລືອກຊື້ໄສ້ກອກທີ່ມີເລກສານອາຫານໃນກອບເຄື່ອງໝາຍ ອຢ, ມີຊື່ອາຫານ, ຊື່ ແລະ ທີ່ຕັ້ງຂອງຜູ້ຜະລິດ, ວັນເດືອນປີຜະລິດ ຫລື ໝົດອາຍຸ ຫລື ຄວນບໍລິໂພກກ່ອນ, ສ່ວນປະກອບ ແລະ ຂໍ້ມູນວັດຖຸເຈືອປົນອາຫານ, ນ້ຳໜັກສຸດທິ, ຊື້ຈາກຮ້ານຄ້າທີ່ມີຫລັກແຫລ່ງໜ້າເຊື່ອຖື.

ອ້າງອີງ:

https://web.facebook.com/1683658098593742/posts/2969359976690208/?_rdc=1&_rdr