ລີເວີພູລ ກຽມດຶງ 1 ໃນສຸດຍອດກອງກາງຂອງບາເຊໂລນາ ຮ່ວມທີມ

ສື່ຊື່ດັງຂອງສະເປນ ລາຍງານວ່າ ລີເວີພູລ ສະໂມສອນ ໃຫຍ່ແຫ່ງພຣີເມຍລີກ ອັງກິດ ພວມພິຈາລະນາຄວ້າ ແຟຣັງ ເດິ ຢອງ ກອງກາງທີມຊາດເນເທີແລນຂອງ ບາເຊໂລນາ ມາສູ່ຖິ່ນແອນຟິລໃນລະດູການນີ້.

ສຳລັບ ເຈີເກັນ ຄລອບ ຜູ້ຈັດການທີມລີເວີພູລ ພວມຊອກຫາຕົວເລືອກເພີ່ມຕື່ມໃນຕຳແຫນ່ງກອງກາງທີ່ສາມາດເຮັດໄດ້ດີທັງເກມບຸກ ແລະ ເກມຮັບ ແລະຕາມລາຍງານຫລ້າສຸດຈາກສື່ສະເປນລະບຸວ່າ : ລີເວີພູລ ພວມພິຈາລະນາເຖິງຄວາມເປັນໄປໄດ້ໃນການຄວ້າ ເດິ ຢອງ ທີ່ໄດ້ຮັບການຍ້ອງຍໍວ່າເປັນຫນຶ່ງໃນກອງກາງທີ່ດີທີ່ສຸດຂອງໂລກມາຕື່ມເຕັມໃຫ້ກັບທີມ.

ທັງນີ້ ເຊື່ອກັນວ່າ ບາເຊໂລນາ ຕ້ອງການຄ່າຕົວຂອງ ເດິ ຢອງ ປະມານ 65 ລ້ານປອນ ໂດຍມີ ບາເຢິນ ມິວນິກ ອີກທີມທີ່ພ້ອມຮ່ວມວົງໄລ່ລ່ານັກເຕະຄົນນີ້ແຂ່ງກັບ ລີເວີພູລ.