ຄັ້ງທຳອິດງານເທສະການໝາກພ້າວ ຢູ່ເມືອງສາລະວັນ ມີຄວາມພ້ອມເກືອບ 100% ແລ້ວ
ແຫລ່ງຂ່າວແຂວງສາລະວັນລາຍງານວ່າ: ໃນລະຫວ່າງກາງເດືອນມີນາ 2022 ບ້ານນາໄຊນ້ອຍ ເມືອງ ແລະ ແຂວງສາລະວັນ ຈະໄດ້ຈັດງານເທສະການໝາກພ້າວເປັນຄັ້ງທຳອິດ ເພື່ອຊຸກຍູ້ສົ່ງເສີມ ແລະ ຍົກລະດັບໝາກພ້າວນາໄຊ ໃຫ້ນັບມື້ໄດ້ຮັບຄວາມນິຍົມຫລາຍຂຶ້ນ ແລະ ກາຍເປັນທ່າແຮງທີ່ສຳຄັນຂອງພໍ່ແມ່ປະຊາຊົນ, ເປັນເສັ້ນທາງແຫ່ງການທ່ອງທ່ຽວ ລາວທ່ຽວລາວ ກໍຄືການພັດທະນາເສດຖະກິດ-ສັງຄົມຂອງບ້ານເມືອງໃຫ້ນັບມື້ຂະຫຍາຍຕົວຢ່າງໝັ້ນຄົງ.
ໂດຍຊາວບ້ານໄດ້ສຸມໃສ່ສ້າງຂະບວນການຢ່າງຟົດຟື້ນ ເພື່ອຫ້າງຫາກະກຽມໃຫ້ແກ່ການຈັດງານເທສະການໝາກພ້າວນາໄຊ ເຊິ່ງໄດ້ກໍານົດສະຖານທີ່ຈັດງານ, ສະຖານທີ່ວາງສະແດງຜະລິດຕະພັນ ແລະ ສິນຄ້າຕ່າງໆ, ອະນາໄມຕາມຂອບເຂດບ້ານ, ຕັດຮອນງ່າໄມ້ຕາມແຄມເສັ້ນທາງ, ສິ່ງກີດຂວາງຕ່າງໆ ແລະ ປັບປຸງຮ້ານຂາຍເຄື່ອງຕ່າງໆ, ທັງຍັບຍ້າຍຮ້ານທີ່ໃກ້ເສັ້ນທາງ ເພື່ອເຮັດໃຫ້ມີຄວາມສວຍງາມ ແລະ ສະດວກ ຕິດພັນກັບການປະດັບເອ້ຍ້ອງ. ພ້ອມນັ້ນ ກໍໄດ້ຕິດຕັ້ງດອກໄຟຊູລາເຊວ ເຍືອງທາງ ສຳເລັດແລ້ວ 25 ດອກ ໂດຍການສະໜັບສະໜູນຈາກຫລາຍພາກສ່ວນ.
ທ່ານ ສົມຈິດ ສຸລິຍະເຕັນ ນາຍບ້ານນາໄຊນ້ອຍ ໃຫ້ຮູ້ວ່າ: ງານເທສະການດັ່ງກ່າວເປັນຄັ້ງທຳອິດທີ່ຈະໄດ້ຈັດຂຶ້ນ ເພື່ອການສົ່ງເສີມການຜະລິດຂອງປະຊາຊົນ. ດັ່ງນັ້ນອຳນາດການປົກຄອງບ້ານໄດ້ນຳພາ, ສົມທົບກັບປະຊາຊົນ ເລີ່ມສ້າງຂະບວນຢ່າງຮອບດ້ານເປັນຕົ້ນ: ການອະນາໄມ, ການກະກຽມ ນັບແຕ່ກາງເດືອນມັງກອນ 2022 ຈົນເຖິງປັດຈຸບັນ ແລະ ຈະສືບຕໍ່ປະຕິບັດໄປ ຈົນກວ່າຈະສຳເລັດ 100%, ເພື່ອເຮັດໃຫ້ງານດັ່ງກ່າວ ດໍາເນີນໄປດ້ວຍບັນຍາກາດເບິກບານມ່ວນຊື່ນ ແລະ ມີຜົນສຳເລັດຕາມຄາດໝາຍ.
ພ້ອມນີ້, ກໍໄດ້ຄົ້ນຄວ້າຄັດເອົາຜະລິດຕະພັນ ທີ່ຈະມາວາງສະແດງ, ປະກວດ ແລະ ນຳສະເໜີພາຍໃນງານ ເຊັ່ນ: ໝາກພ້າວ, ອາຫານພື້ນບ້ານ, ບັ້ງເຂົ້າຫລາມ ແລະ ອື່ນໆ, ທັງໄດ້ມີການຝຶກຊ້ອມ, ກະກຽມການແຂ່ງຂັນກິລາ ພື້ນບ້ານ ກໍ່ຄືກິລາໝາກພ້າວ ໃນຮູບແບບຕ່າງໆ ເພື່ອສ້າງສີສັນໃນງານ ໃຫ້ມີຄວາມມ່ວນຊື່ນ ແລະ ສ່ອງແສງໃຫ້ເຫັນເຖິງຄຸນຄ່າມູນເຊື້ອວັດທະນະທຳ ອັນເກົ່າແກ່. ມາຮອດປັດຈຸບັນ ມີຄວາມພ້ອມເກືອບ 100%.
